نصیحت

تت بپو وار وا اسپہ ذمہ داری نیویشاک: احتشام الرّحمٰن بوزمانہ پروشٹی اخبارو کالمہ رسول حمزہتوفو نیویشیرو ہیہ واقعو رے اسیتام۔ ای نانو ای پھولوک ژاؤ تونج بیتی اسور۔ کندوری ہا سال پھار بی شینی۔ ہے نان دی اکھابیر بیتی اسور، عمرو آخری وختہ کا گیتی ہوروتے را اسونی کی تہ ژاؤ ہموݰ ژاغا اساک بیرائے۔ ہنیسے گویان۔ ہے نان خوشان بیتی اسور مہ ژاؤ گویان رے دُنیئین ای بیتی اسور۔ ہے مݰقری انگیاکوتے ای لو دیتی ژاؤتے پروشٹ ویݰئے اسور۔ "تو مہ ہے ژاؤو سار بشار کورے کی ہیس تان تت بپو وارو روخڅی تھے نو اسور کی روخڅی اسور تھے ہوروتے راوے کی وا مہ نسوتے دی نو گیتی ہے ژاغاری اچی بوغار۔ " ہے موش ہیرا بی ہوروسار بشارو کوریکو ہیس نو اوا تان وارو نو روخڅی اسوم ریکو تو گنی گیتی اسور۔ ہیہ واقعاری روشن علی خانو نانو واقعہ مہ یادی گویان۔ ژاؤ ژانگہ زخمی بیتی اسور مگم روشن علی خانو نان ڈاقو ویݰئیران کی "لوڑی گے مہ ژاؤ پروشٹوار زخمیہ اچھاوار تھے نو۔ اچھاوار زخمی کی بیرائے متے خبر دی مو انگے۔" ڈاق گیتی ران کی نو سف زخمی پروشٹاوار ریکو تھے ہورو نان بیران اور تان تان ژاؤو علاجو کویان۔ روشن علی خانو نانو واقعہ انگار مہ یادی ہائے۔ لو دیاؤشتام تت بپو وارو اہمیتو۔ ہنون زمانا نان گینی تان وارو اہمیتو روخڅی اسونی۔ ہورو بو وجوہات شینی۔ سفوسار لوٹ وجہ سوشل میڈیا وا دنیو ای موشٹہ دیہہ ساؤز بیک۔ ہیغار علاوہ اسپہ چونکہ انگریزانان غلام بہچی اسوسی تھے اسپہ انگریزی کوریکو بو لوٹ اعزاز جاݰوسی۔ کیہ زبانو ݯیݯھیک شوم کوروم نو۔ ہر ای زبانو ݯیݯھیلیک مگم تان وارو روخڅی خور وارو کوریک کیہ جم اشناری نو۔ ہنون زمانو څیڅیق تان نو لوٹھوروانان دی کھوار تونج بیتی شیر۔ مثلًا ہنون زمانا "مینو" لفظ ختم بیتی "مہمان" بیتی شیر۔ "لہازیو" ژاغا"بیماری" عام بیتی شیر۔ "ژانو" ژاغا "جان" بیتی شیر۔ "نانو" ژاغا "ممی/مام" وا "تتو" ژاغا "ڈیڈی" بیتی شیر۔ ہمی کھوار تونج رویان راہِ راستہ انگیکو بچین تعلیمی اداران موژی لینگ لینڈ اسکولو فرنگی پرنسپل کوروم کویان۔ باقی تمام ادارہ انگریزی زبانو ݯییݯھئیکو موژی اسونی۔ انگریزی زبانو ݯیݯھیک جم مگم ہورو ترقی اوچے سربلندیو نݰانی جوݰیک کیہ عقلو کوروم نو۔ تنظیمی طورا مئیر تنظیم ݰئیلی وا اکیڈیمک کوروم کویان۔ انفرادی طورا فرید احمد رضا صاحب څیڅیقان کھوارو ویلٹی انگیکو بچین کوشش کویان۔ اسپہ وار اسپہ پہچان۔ ہتے موش را اسور نا کی خوشپ صرف تان وارا پوشین بوئے۔ خور زبانان ݯیݯھیک کیہ غلط نو مگم تان وارو روخڅی خور واران ݯیݯھیک خوشپو ڑوسپی نو نیزیکو نو بیرؤ غون کوروم۔ پیش کش: #مئیرݯھترار