شیر خانو آزادی

شیرخانو آزادی (آخری قسط) نیویشاک: مستنصر حسین بریژایو ژوربسو موشو بو لوٹ ذمہ داری درازے اسیتائے۔ ہے لوؤ دیکو دی ہیس تان سار شاراو اوشوئے، کوریکو گمبوری خان میکی اوچے شاپیر خانو کیہ ردِعمل بوئے رے ہوت جم اندازہ اوشوئے۔ ہنیسین ہر ای سیکنڈ ملکھونو زندگیو بچین اہم اوشوئے۔ ملکھون نا امیدیوتے تھان دیتی تان پیغامو دورہ تارے پھوک محکم بیتی اسیتائےمگر ہوت ہے تکلیفیار نیسیک ناممکن ساراو اوشوئے۔ ملکھونو گومیت نست ہے لو و تان بوک(ژور بسو) سوم پرائے، ہیس تان ملکھونو سوم رابطو مسلسل کوششہ اسیتائے مگر ہے حالتہ بوئے رے گمان نوکوراو اوشوئے۔ ژور بس دی آسمنار لشٹہ پرائے۔ آخر فیصلہ ہݰ ارینی کی ایگان کوری دورو کولانان سوم موش لو دوئے وا عورتانان سوم بوک۔ ہے انوس چھاغو دیکوت تان ژور بس نانو، درزی کائیو ، شک کائیگنیان وا مرگستو(روژایو) سوم دی ٹیلیفونہ لو پرائے۔ ہیت سف ملکھونو حالاتو بارا کار کوری غمزدہ وا ہتو ہیتغار نیزی انگیکو بچین امادہ ہونی۔ مسٔلہ کولانان اوشوئے، شاپیر خانو ژانہ کیاغ اوشوئے کیہ خبر مگر "کیہ چارہ، ہیس تو جزا، پیچ پونگین روپھی بی آستائے" ریتائے۔ گمبوری خان میکیو و نسہ جو بس لو اژین تان نو ہوئے، تروئیو انوس جمار پھوک لو و شروغ کوریکو سوم تان، اشپاشور آسمانہ چوکیتائے۔ نہ لو و پورہ کار اریر بس شروغ ہوئے، جمارو دی آپکی پیستائے، ہیہ دوروت کی ہائے اوا ہوتو ماریم ریتائے۔ گمبوری خان میکیوت ہیہ لو و دی واضح کورین نو ہوئے کی ملکھون دوروت کھیو گویان، ہتیغار نیزی انگیلیک رے۔ بوت بیکو شاپیر خانو نان شاپیر خانو تاتوت پکہ کاردو بیرائے، چھوچی بیکو جماروت نیسائے۔ سخت جنجال کوری جماروت "تو بیش نفری مہ دورو موژی لو نو دیت" ریکو جمار پیڅھی تان دوروت بغائے۔ دورو حالت ہنیسن پروشٹو سار دی ویشیراو ہوئے، سفان فروخ 12 بجہ، لو کیاغ ریکو دورو عورتان خور کیاغ مشکینیان وا کولانو خور کیاغ۔ ہش بیتی شاپیر خانوت ہتو بوکو دی تھامامو کال ہانی ،پھوک نان توسوم دیمیتائے، شاپیر خان عورتانان ڈالہ ہائے۔ شاپیر خان بی گومیتو خیشے آلائے۔ ݯھوئے بس پورہ ہونی گمبوری خان میکیو کیہ پستیکو راہ نو ہوئے۔آخری چھویو سف سفو بیتی گمبوری خان میکیوت اݰقالی کوریکو ہیس راضی ہوئے، مگر شرط ہݰ کی ملکھونو نیزی دوروت نو انگیتی ہاسٹلہ پچھین بوئے۔ چھوچین شپیر خان دی دفتروت نو بائے سف دوری نیشی ملکھونو کالوت انتظار کوراو اوشونی، ہݰ بیتی پیشین بیکو ملکھون کال اریر۔ شاپیر خان تان توسوم لوا چوکی تو دلاسہ دیتی تہ اچی انگوسی ریتائے، ملکھونو پتو، تو موشو موبائیل نمبر وا خور مغلوماتان دی گنیتانی۔ مگر تاتو شرطو لو و ہتوت نو پرانی۔ ملکھون سفان نمبرن نیویشی گنتائے وا کالو بند ارینی۔ شاپیر خان تان گومیتو گنی ای رشتہ دار پولیس افسرو نسہ بائے، وا ہتو ہدایتہ شہرہ بی دیہو ای وکیلو پوشیتانی وا قانونی راہو اختیار ارینی ۔ تھمامو وقت پھار بائے، عدالتی کاروائی دی ہونی تھے ملکھونو ججو پروشٹہ بیانوت مشکیتانی۔ملکھونو موش دورا تان تھویکو ہاتو پازہ تارے نگاہ کی طلاق مشکیمان ریتاو تہ ماریم رے،کیہ لوان کی دیلیک ہتو چیچھے گنی عدالتہ ہائی۔ ہیغار نست پیشیہ دی ملکھونو موش شاپیر خانو دھمکی دیتی اسیتائے"ملکھونو کی الیک مشکمیان ہو لاشو پست دوم تازہ الیکو نو بومی "رے، ہے انوس دی شاپیر خانوت ہے لو و تان دیتی عدالتوت ایہ بغائے۔ ملکھون ہے زیدانار آزادیو فیصلو کوری استائے، بہتی یا تازہ ہو ہے موشو سار نیسلیک اوشوئ۔ ججو پروشٹہ ہے ڈاقو تمام دھوکہ وا دھمکیان لوان واضح پرائے۔ جج حالتو ہوش اریر فوری ہو آزاد کوری دوروت آلیکو حکمو پرائے۔ ملکھونو موش قہرو موژی ہے ہائی پرائی، ملکھونو ماریکو دھمکیو پرائے۔ جج ہو 2 ہفتہ پولیس تحویلہ لکیھکو حکمو پرائے۔ عدالت برخواست ہوئی، ملکھونو موش ہیرہ پیڑینگی اریر "اوا ای نو ای انوس ملکھونو لاشو پیسہ دورہ تاریم " رے شوت چھوئیکو، پولوساں رکھیشی ہو گیٹہ پچھان ارینی۔ ہیہ حالتو پوشی گمبوری خان میکی دی تان شرطو روخسیتائے، سف ای بیتی دورو ویشکی بغانی ۔ ہنیسن دور دی ملکھونوت تنگ بیتی اوشوئے، ہو موش ہو کیانی کوئی رے دورو روئے ہو ہاسٹلوت نو ویشیکو پکا فیصلو ارینی، دیہو رویان سار شاری دورار بیری نو نسیر، وا دوری گیاکان موڑار کمرائی بند حال بوئی۔ سالوت ہائےملکھونو ہیہ روٹینار نیکو کیہ ذریعہ غیچی نو ہائے۔ خدایو مہربانی ملکھونو بیریو ملکوت ویزہ نیستائے، تنخواہ دی جم ہال بیکو ژاغہ، جہازو ٹکٹ اچی ہوسوم 2 خور ہو ملگیری کموران ، دورو روئے دی محکم ہونی ملکھونو ہیا روٹین کیہ بدل بویا رے، ملکھونو موخہ دی پھوک ژینگی ہائے۔ تھے ہے انوس دی ہائی ،نان اوچو تات جوست بیتی ملکھونو ایر پورٹہ التی پرویزی ہانی۔ ہے انوس گمبوری خان میکیو دوری پرانو خوشانی اچی گیک شروغ ارینی۔ لش بیتی ملکھونو پونگ دی نوغ ژاغہ چوکیتانی، دپادپ دورت پیسہ انزیکہ پرائے، گمبوری خان میکیو شانہ گاڑی، عالیشان دور، ژور بسوت دی شاپیر خان دور تیار اریر ،پیسہ ملکھون انزیکو۔ تھے اللہ شاپیر خانوت اولاد دی پرائے ہو بوک (مرگست )دی ہش بیتی پکہ نوکری گنی شاپیر خانو دفترو گوچہ ڈیوٹی شروغ اریر، وا اژیلیو دی ای بیتی خیالو لکیھکا پرانی۔ شاپیر خانو نان دونان نوغ چاکے کی ہاسیر چھیر اولیر، ملکھون زاق کائیو پیسان دی توت پرائے، گمبوری خان میکیو واسکٹو اوچو کوٹو رنگان ہنیسن اشمارے کورا تاریکو بش نو ہونی، دیہا کا دی کی لحاز بوئے یا کیہ ہش معاملہ بوئی ملکھون ہتو دی خیالہ بیتی پیسہ انزیر۔ ملکھون ہنیسن دورو گل گلزار غیریتائے وہ دیہا دی ہر مجبوردارو تات اوچو نان غیریتائے، مگر تان ژانو دشمان ساوز بیتی آستائے۔ ملکھونو پروشٹہ کیہ وخت کی پھار شوخسی اوشوئے ہیس ہو زندگیو خالو ہمیشو بچین نیگونو کوری اوشوئے، ہو زندگیو ہنیسن اولانو ترجیح وخت پھار شخڅیک اوشوئے۔ نا چھویو اورارو نا انوسو سکون، ناچار ملکھون پھوک ہردیو خور کوم رے نیشو دنیا قدم لکھیتائے، پھوک بیتی پھوک بیتی ہو طلب زیادہ ہوئے، ہس ہو استعمالو ذیادیتائے آخر ای وخت ہاش ہائے کی ملکھونوت ہوموشو ژیرہ چاکیرو اشروان ژاغو نشہ گنیتائے۔ ملکھونو 3 سال بیتی اوشوئے دوروت دی نو گیتی، ہو جو وجہ اوشونی، ای وجہ ملکھون راو اوشوئےکی دورو رویانتین پتہ کی ہوئے ہتیتان ہردی شینیر، جو و وجہ ملکھونوت ڈاکٹران جواب دیتی استانی، ہیس دوناو اوشوئے دورہ بی چھٹی تیرے گیاوا ہسپتالی کوریلیک بوئے، کی ہوئے مہ اچی یی گیکو نو لاکونی ہے پیسہ اوچے گاڑی زمینان سوم بیتی مہ علاجوت نو بونی، دورو روئے اچی غریب بونی۔ تان خوشانیان سار اشتروخیرو ملکھون دورو رویان بچین تان ژانو سورا انگیتی دوروت گیک نو مشکاو اوشوئے، آخری سال ملکھونو کال دی کم ہونی پیسہ انزیک دی کم ہونی، ہیس ذیاد ڈیوٹیوت دی بیکو نو بیتی بے خودہ بیتی پوراو اوشوئے۔ ملکھونو نازک قالیپوت آخیر ژار باڑیتائے وا ای انوس ملکھون ہمیشو بچین تان نازک غیچھان یو نیشیتائے۔ دیہا کوری خبر پرانی وا گمبوری خان میکیو دوری ہے ݰا خبرو گنی دیہو کولانو ہانی۔ ملکھونو لاش ٹھیک 3 بسہ دورا تورتائے مگر ہو ہتے سابقہ موشو ہوستین نو بلکہ ہوت ویزہ دیرو کمپنی ہو ݰیلی کوری ہو آخری رسوماتان ادا اریر۔ ملکھونو تمام غیارمار گنی زپان سوم کوری ہیلتھ انشورنسو مدا بو امبوخ پیسان دی کمپنیو اہلکار انگیتی ملکھونو دورو رویانتے حوالہ ارینی۔ ملکھونو عمرو مقابلہ ہو یادو ووری ہو دورو رویان وا شوئے بیروان ژانو پالیکو بچین غیر فانی بیرائے۔ ملکھون نازک اشناری نو بہچور اوشک ژاغا ملکھون مشکیر نازک ہوا ....... پسہ کوستے کی ہیا کہانی شاپیر خانو کم ملکھونو ذیاد سریران پسہ ملکھونو ہے موشو کردارو ٹیکہ دی غور کوریلیک بوئے، کو ریکو ہیہ کہانیہ اصل شاپیر دی ہیس اسور وا آزاد دی۔ نوٹ: (ہیہ کہانیو تمام کردار وا واقعات خیالی شینی، کیہ کردار یا واقعہ کوس حقیقی زندگیو سم کی ناگہان دی ہم آہنگ بیتی شیر ہیس اتفاقی بوئے) پیش کش: #مئیرݯھترار