کھوار سفر نامہ پڑاو 1

کھوار سفر نامہ: قزاقستانار گنی ازبکستانہ پت اولو پڑاو: آستانہ اوچے نورلی ژو نیویشاک: نور شمس الدین قزاقستانو دارلخلافہ آستانہ بسی نیشی اسوم۔ نورلی ژولوتے بیمان۔ نورلی ژول ریلو اسٹیشنو نام۔ آستانہ ریلو جو اسٹیشن شینی۔ پرانو اسٹیشنوتے آستانہ ون رینیان نوغوتے نورلی ژول یا آستانہ ٹو۔ آستانہ ریل دی جُو قسمہ شینی ای نوغ ای پرانو۔ آستانہ تان دی ہݰ، نوغ اوچے پرانو جُو حصہ شینی۔ بو ݰئیلی شہر موژو سین بیران۔ سینو نام دریائے ایشم مگم ہیہ ژاغو روئے ہوتے یاسیلو سین دی رینیان۔ سینو فروسکی ویݰکی پرانو آستانہ کھوڑی ویݰکی نوغ ۔ مگر ہیا نوغ اوچے پرانو رے آستانہ نامے سینو ہوتے بونڈری کوریک بوختہ لکیر نو۔ بو ژاغہ ہیت ایغو موژی نیسی قڑینجہ مینجی دی بیتی شینی۔ خاص کوری نوغ آستانہ سینہ پھار نیسی پرانو آستانو نسین پیڅھیرو ژاغان سورا دی قبضہ کوری اسور۔ وا ہݰ دی کی فروسکی ویݰکی یعنی پرانو آستانو دی سینو نستو ورازار پونگا نوغ آستانو غون کوری اسونی۔ ہین سینار پھوک دودیری کی بغاؤ پرانو آستانہ واقعی پرانو رے ہوݰ کورین بویان۔ آستانو موژو بوغک ہیہ سین قازقستانو ای لوٹ شہر گراگنڈہ و نسہ کورا شروع بیتی یو گیتی موژو اف نیسی روسہ بی دریائے ارتشہ دویان۔ ارتش دریا چینہ شروع بیتی آستاناری مشرقو ویݰکی سیمی اوچے پاولدار نامین قازقستانو جو مشہور شہران موژو درے تھے ایہہ بی اُروسہ داخل بویان۔ قازقستانہ تمامو شہران ہݰ پوشیتم دریا شہرو موژو بیران۔ خاص کوری سیمی اوچے آستانو تھے برابر موژو تن۔ آستانو موژو بوغک ایشمو سین شمالو ویݰکی بی سیمی اوچے پاولدارو موژو درے روسا گیرو ارتشو سینو سوم جوست بویان۔ ہے ارتش اچی خور کیہ دریاہو سم جوست بیتی ایہہ بی بحر منجمد شمالیہ بیران۔ اوغ ݯوکتو بوغدؤ غون ساران۔ ایہہ بی ریکو۔ اسپہ ݯھترارو غون اوغ سف ای ویݰکی نو بینیان۔ ہیہ کیہ سین جنوبہ شروع بیتی شمالو ویݰکی بیران کیاغ شمالہ شروع بیتی جنوبو، کورا مشرقار مغرب وا کورا مغربار مشرقو۔ ملک لوٹ، کورا جنوب ژانگیہ شیرا ریکو، کورا شمال اسمانتو شیر ، کورا مغرب ایہہ پھورا نایور وا کورا مشرق۔ اوغان قصوو درونگار نو کوم نگہہ اباتھہ بوسی۔ اچی گیور بسی تان نیشیسی۔ خائے تھے بس آستانو شہرو موژو بیران۔ نست شہر ژانک بیک جم مہ خیالہ۔ سین آستانو براق موژتو چھینی شیر۔ سینو ای ویݰکی نوغ ای ویݰکی پرانو آستانہ۔ ہیا ۵۱ نمبرو بس سینو کھوڑی ویݰکی نوغ آستانو موژو اف بیران۔ اف موژا بی یو خومی ۵۰ نمبرو بسی کی نیشتم ہیس مہ گنی سیرا پھار نیسی اچی ݯوکتو بی نورلی ژولہ بیر۔ سینو کی تقسیم جوݰیتم نورلی ژول پرانو آستانہ گویان۔ مگر پرانو آستانہ څیق شہر اوشوئے ہیہ پرانو آستانو ورازہ انگیتی بیابان ژاغو جوش سال پروشٹی آباد کوری ساؤزے شیر۔ ہے نسین آبادی دی سف نوغ۔ پرانو ہیش کیاغ ہیرا نکی۔ جو آستانان موژو دریاہو کورا دی بی لوڑیکو بالکل دریاہ نو سریر۔ ژویو غون کوری آسونی ہو۔ نسین ݰئیلی کوسیکو ژاغہ۔ سالہ چھورمس ہیس یوز ݯاکوران۔ اپریل مسو آخرار گنی اگستو آخرا پت ہے موژتو رویان بچے کھشٹی وا درمیانہ سائزو کروز کاسینیان۔ مگر اوغ اوݰک بیکین کورا سینو اوتیکو یا اوسنیکو سسٹم نیکی۔ پاؤلدار اوچے سیمیا ہݰ نظام دی شیر۔ خاص کوری پاولدارو دریا بو ݰئیلی کوری بیچ ساؤزے شینی۔ سمندرا بوغدؤ غون سریران۔ روئے اف بی اوغو کیچئین بیتی ای نیسی شوغورا لاہتونیان۔ آستانہ ہݰ کی لوہتین ہوئے دی بوار بو ای مس ہݰ لوہتین بوئے۔ اوغ اوچے موسم کھاڑ اوݰک بیکین دیتی ہیا اوغو اوتی ای کی نیستاو اوزی بریکو تاب۔ ہے اوݰک سینو ٹیکی درزینار دی زیادہ سیر شینی۔ چھوچو ݯھوئے بجار گنی بوتو جوش بجا پت سرکاری بس پورا شہرو نیسین غیردی بہچونیان۔ مختلف نمبرو بس مختلف راہا کاسینی۔ آستانہ بسہ سفر کوریک بو لوٹ سہولت بلکہ بعض وخت تن گاڑیہ بیکو سار دی بسہ کوسیک جم ساران۔ بس امبوخ کاسینیان ہیتن رہ الگ وخت مقرر عام گاڑی والا بندے انگیتی بسو راہی نو نیسینی۔ عموماً ہݰ پاشیش کی مرسڈیز والا ٹریفکہ بیشیر منٹ پھساؤ اسور ہتے نسو بس انگار نیسی بیران مگر ہیس تن ہے گاڑی بسو روڈی نیزیکو نو بوئے۔ کی نیستائے تن چالن ہو رے موبائلہ نہ صرف میسج گوئے بلکہ جوش منٹ اچہ تہ اکاونٹہ پیسہ چھیتی حکومتو اکاونٹہ بغانی رے دی میسج گوئے۔ عام گاڑیانتے ہے رہ بند صرف ایمبولینس ہے راہو استعمال کونی۔ ملکو دارلخلافہ بیکو باوجودا پولوسانان، فوجیان، بیورکریٹ یا سیاستدانان پروٹوکولو گاڑی ہائی نو پوشی اسوم ہاتیت ہو بینیا نوا کیا خبر۔ بس اسٹاپہ بیکو نیشیکو ژاغہ شیر۔ سف اسٹاپین ختان دی ساؤزے شینی۔ اوݰاکیہ اندرینی روپھی یا نیشی بسو انتظار کوس۔ بسی کیہ کولانو عورتو الگ سیٹ نو۔ ہیں اکابیرانان اوچے اسپیشل رویاں بچے ژاغا شیر۔ موبائلہ بی لوڑیکوتت پتہ بوئے کی کیہ نمبرو بس کیہ ٹیمہ کیہ ژاغہ راہی بوئے وا کیہ ٹیمہ کورا تارور رے۔ ہزار اوچے قسمہ بس شہرو موژی غیردی شینی۔ ڈرایئور شیشو ختانی اسور کیلنڈیر یا کرایہ گانک کا نکی۔ بسی ہیرا ہیا کیوآر کوڈݯاکے شینی۔ روئے ایہہ نیسی کیوآر کوڈ اسکین کوریکو تیتان اکاونٹہ پیسہ چھیتی حکومتو اکاؤنٹہ بیران۔ بو کم کا خاص کوری څیڅیق اوچے اکھابیر بسو کارڈ دی استعمال کونیان۔ کرایہ دیکو دی شاباشی دیاک کا نکی نو دیکو دی بشار کوراک کا نکی مگر اوا ای دفعہ دی کوس کرایہ نو دیکو نو پوشیتم ۔ ایہہ نیسیکو کو سم موبائلو پھار کوری داسینی یا کارڈو ہتے مشینہ دونی۔ بس تو نیسی اف خومیکو کرایہ ۱۱۰ ٹینگا۔ چاہے جو منٹ پونہ بعاؤ یا جو گھنٹہ۔ قازقستانو روپیہ و نام ٹنگا۔ ساٹھ پاکستانی روپیہ دیکو ای شور اوچے جوش ٹینگا بویان۔ آستانہ نامو قولہ نوغ اوچے پرانو۔ نوغ آستانو ہر گنزولو مختلف ڈیزائن و آسمانو سر ݱانگ بلڈنگ، پرانو آستانہ اورسو وختو ہتے پستامبا ختان، نوغ آستانہ کندوی څاکے ژاغہ جدید دور و شاپنگ مالز پرانو آستانو گنزولین څیق څیق دکان۔ نوغ آستانو روڈ فراخ، پون غوسان رہ الگ، سائکلان رہ الگ، بسان رہ الگ۔ پرانو آستانہ ای قسمہ رہ، نوغ آستانو راہان ناسین بلڈنگ پرانو آستانو راہان نسین کانلاوش، نوغ آستانہ شیشہ اوچے سیمنٹ پرانو آستانہ گمبوریو اوچے گھاس، نوغ آستانہ گیاک وختو مݰقری پرانو آستانہ بوغدو زمانو نݰانی۔ مگر نوغ اوچے پرانو آستانہ ہر حسابہ ایعو سار خور دی نو۔ پھاتی اشناری ایعو غون دی مثلا کھاڑ صفا، گندگی ہاتیی دی نو پاشیس ہائیی دی نو۔ انجاروم اوچے پیاروم ہیتن اوچے ہمیتن موژی کیہ خاص فرق نکی۔ کھاڑ تن دنیا مست ہفتہ پونچ بس گوردوغو غون کوروم کونی۔ جو بس مکمل عیاشی۔ خاص کوری ادینو بوتہ څیق سو لوٹو دورا نو تھییونی۔ درونگ چھوئے کوسی ژوتی "پی" پھونی براخ بومتو دیتی ہفتو شام بیکو ہاؤل ہوشہ گونی۔ آستانو لوان دیتی آوا دی آستانہ والان غون ہوشار نیسی دیخ کی نو نورلی ژولو نسین نیسی بیم۔ بس آرامہ گانیتائے۔ پھارو ہیرا نارواہ لوٹ شیشہ بلڈنگ شیر۔ تیرا لیلوٹ کوری نورلی ژول نیویشی شیر۔ ہیہ آستانو ہتے نوغ ریلوے اسٹیشن۔ بشیر منٹ اچہ ہموغاری ای ریل قازقستانو ترویو نمبرا لوٹ شہر شمکنتو تے بیران۔ اوا ہیے ریلی نیشی شیمنکتہ بیم ہتیرا دامہ نے اوہتی انوس ازبکستانی بیمن۔ بس روپھیتائے اوا تن بیکھان بارے اف خامیم۔ پیسہ دی دامہ ناؤر۔ اندرینی بی ریلی کی نیشتم تھے پیساتے اسٹیشن اوچے ریلو قصان کوم۔ پیش کش: #مئیرݯھترار