کھوار سفر نامہ پڑاو 2

کھوار سفر نامہ: قزاقستانار گنی ازبکستانہ پت جوؤ پڑاؤ: آستاناری گنی گراگنڈہ پت نیویشاک: نورشمس الدین ریل راہی بیتی تمامو وخت ہوئے۔ پھوک مدا پروشٹی ریلو شیشا نیݰی لوڑیکو آستانو لوٹ لوٹ عمارت، روئے، اوݯھی وا موٹر غیچی گیاؤ اوشونی ہینسے ہتیت کیاغ کورا نیکی۔ آستانہ بغائے۔ کراگنڈو انتظار شیر۔ بیری غیچ الیپھیکو ژاغہ پت میدان۔ نگہہ کورا ݯھیتور غیچی گونیان،زیادہ خالی۔۔ کورا گھاس اوچ کورا نو۔ شامو دوپیدو، میدانو موژو ریل دے بیران۔ پھار نسہ یور ځہیچ باؤ گویان۔ ہݰ سایران کی چھوئے اوچے روشتی گݯ ݯوکیک کونیان۔ پھوک مدا اچہ چھوئے روشتیو موڑا دوئے۔ ہیس دُنیو دستور مگر ای وختہ ہر کورا چھوئے نو بوئے۔ بیری کندوری چھوئے باؤ کی گویان ریلو اندرینی ہانی تان روشتی زیادہ بویان۔ بیری خاموشی باؤ گیکو اندرینی ہواز رانہ ران زیادہ بونیان۔ بیری دنیا روپھی شیر رے ساران مگر اندرینی حرکت بند نو۔ روشتی، ہواز وا حرکت زندگیو علامت۔ بیری چھوئی اوچے خاموشیو لوڑیکو سار اندرینی گیک جم۔ ہیہ اندرینی مہ نسی تروئے ژون خور اسونی۔ ایوالی پروشٹہ نیشی موبائل کیتیران۔ جوالی ہے ٹیکٹو تن بستران ساؤزینیان۔ ہنیسے تھیسوم انگیتی سوری دیکو وا موڑتو درئیکو څادار، ورازنی ہنو وا ای څیق تاؤلیہ اسپتے پرانی اوا تان ہیتن ساؤزے ہیا کولی بیتی اسوم مہ نسین ہمی روئے دی تان دنیا مست۔ میتان سوم سلام دُعا بی شیر جم بلاتی کی ہوئے میتان بارا پیستے لو دوم۔ ہنیسے اسیکہ دیانی۔ نورلی ژولہ تان ݯوکی شروع کوسی۔اوا بسی نیشی نورلی ژولہ توری اسیتام۔ بسہ یو خومیتام کی شئے نا پُرسان معاملہ۔ نورلی ژولو دواہتو بیلہ تان بس سٹاپ۔ ہر منٹہ مختلف نمبرو بس گونیان اوچے بینیان۔ روئے اسٹیشنار سامانان بارے یو نیسی شہرو ویݰکی بوغاک بسی نیشاؤ بینیان یا شہرار گیاؤ ہیرا یو خومی اندرینی بنیان۔ میٹرو ٹرینو اسٹیشن دی ہے گوݯہ تن جو قدمہ شیر مگر ہیس چالو نوما بوئے ہیہ سال اگست مسی افتتاح شیر رینیان۔ بس اسٹاپ ریلوے اسٹیشنو بیلہ تان۔ اسٹیشنو ختان تان نو نسین خور ختان دی نوغ۔ اسٹیشنو نیݰیاری لوڑیکو تان اندرینی خور کیہ معاملہ بوئے رے ساران، واقعی ہݰ دی۔ ہیس نوغ اسٹیشن مگر بینیان ہیراری نوغ اوچے پرانو کھاڑ قسمو ریل۔ ہے اسٹیشن اوچے پرانو اسٹیشنو موژی ہݰ تان فرق کیچہ کی نوغ اوچے پرانو آستانو موژی۔ بلڈنگ ہتو دی بو لوٹ مگر ڈیزائن اوروسو وختو۔ ہسے تروئے بیشیر سال پرانو بیرائے ہمو جوش سال دی نو بی شیر۔ نوغ دورو مطابقہ ڈیزائن کوری شیر۔ دنیا بو امبوخ ملکان ایئر پورٹان سار دی جدید وا ہر سہولتہ مڑاغ۔ ہیراری ملکو اندرینی لوٹ شہران تے وا ملکار نیݰیوتے دی ریل بینیان۔ قزاقستانو سفان سار جدید اسٹیشن۔ زندگیو تمام سہولتن ہے اسٹیشنو اندرینی دیتی اسونی۔ بیشیر قسمو کیفے تان شینی۔ ژیبیک پیکو ہر معاملہ برابر۔ درونگار ہال باک رویان بچے پوریکو ہوٹل دی ملاو بوئے مگر لاونج تن ہانی ݰئیلی وا پرسکون ساؤزے شیر کی پوریکو بچے ہوٹل گنیکو ضرورت دی شاید نو۔ اوا اسٹیشنو اندرینی گیتی لوڑی ہوس بیرو بیراتام ۔ ہنیہ لوڑیتام کی ریل راہی بیکو تے جوش منٹ بہچی شیر۔ تیزے پلیٹ فارمو مݰکی ہتیرا توریتام۔ فکس ٹیمہ ریل راہی اریر۔ جوش اوشٹ گھنٹہ ہیا شمکنتہ تارور۔ ہتیعار چھوچھین ازبکستانی بیم۔ ازبکستانی بیکو بچے قازقستانو کیہ دی شہرا کی ریلی نیشین ہوئے آخری بیر قزاقستانو شِمکنت رے شہرا تان۔ شمکنتار کارہ ، بسہ وا ریلہ نیشی ازبکستانی بین بوئے۔ شمکنتار پھار بوغاوا کارہ بیکو وخت کم لیگوران، ریل تروئے گھنٹہ اوچے پھت کوسی سَریا گاش رے ای لوٹ دیہہ بیران۔ وا ہیغار ایمیگریشن بیکار اچی تھے ازبکستانہ داخل بین بویاں۔ قزاقستانو علاقہ پاکستانو سار چھور گنا زیادہ لوٹ، آبادی بو کم۔ پورا مُلکہ جو کروڑ روئے دی نکی۔ عذاب ہݰ کی ہے قافہ روئے دی کا مشرقہ آباد کا مغربہ، کا شمالہ کا جنوبا۔ ژاغہ میدان بیکین ایغو نسہ توریکو بچے جم وا ارزان ذریعہ ریل۔ ہتیعین قزاقستان ریلا مڑاغ۔ پیستے لو دیتی اسیتام دی مہ خیالہ ریل دی جو قسمہ شینی ای نوغ ای پرانو۔ نوغان تے تالگو ٹرین رینیان، ہمیت تیز وا ہر حوالہ نوغ۔ پرانانتے لوکل ٹرین رینی ہمیت اوروسو زمانو۔ ہمیت تالگوان مقابلہ آرامہ کاسینی څیق لوٹ ہر اسٹیشنہ روپھونی۔ لکہ ہش جوݰور کی ہمیت بونیار ریشنو بوغاوا چت پھار کوشٹا بی اچی یی چرون اوریرا دی توری تھے اف بینی۔ چرون اوچے کوراغا خسوخس زیئتہ دی روپھیک تھے بوختو ٹیکہ لکھی شیر۔ کوس خفا نو کونی، غُوز کاسینی کم کرایا گنینی، غریبو تے واہڅ۔ کم پیسہ گنی دی راہی مقررہ وختہ کونی ہر ژاغہ مقررہ وختہ تارونی ریل صاف ستھرا وا پرسکون۔ تالگو نوغ وا جدید ریل۔ ہمیت کاسینی دی تیز وا اسٹیشینن روپھونی دی کم وخت۔ بلکہ صرف لوٹ اسٹیشنن چت روپھونیان۔ ہیہ ریلی جو نفریان موژا کمرہ دی شینی چھوردی وا غیژی نفریو دی۔ وا کمرار علاوہ خالی سیٹ دی شینی بسان غون۔ ہیرا نیشی بین دی بوئے ہو کرایہ کم۔ نیوف جوش گھنٹو بچے ہیت بو جم کھولاؤ سیٹ بے غش نیشین بویان۔ اوا شمکنتار پھار ریلہ کی باتم ہݰ سیٹ گنی بیم ہسے ݰوئے ژاغہ ہیا پھوک دودیری وا چھویو سفر اوشوئے ہتعین پوریکو بݰ سیٹ گنی اسوم موژو دیاؤ پھوک ٹوک بین بوئے رے۔ ہائی نیسیکو سم نوغ څدار ورازنی وغیرہ دونیان۔ ریلی اوݰک پیݯ اوغ شیر تانتے چائے کافی ساؤزے پیکو بوس۔ صفا واش روم، مناسب رسٹورنٹ ریلو اندرینی شینی۔ یعنی پیک ژیبیکو معاملہ بلکل برابر۔ قزاقستانہ ہر شہرا بلکہ تقریبا ہر لوٹ دیہا دی ریل توری شینی۔ مگم عام کی لو پھریتم ہیہ ریلو تروئے لوٹ وا مصروف رہ شینی۔ ہیتن موژی جو رہ قدیمو سلک روڈان قسمہ رو ساؤز بیتی شینی۔ اولو رہ یی ناسو گویان۔ مشرقی ویݰکیار یعنی روسو سائیبریا و علاقار قازقستانہ داخل باک ہے راہین گوئے۔ چایئنار گیتی دی ہیا راہہ دین بویان۔ ہمو1930 عیسویا روس ساؤزیرو بیرائے۔ Turksibہمو نام۔ یعنی ترکستان سایئبریا روٹ۔ ترکستان قزاقستانومغربی حصہ۔ بو تاریخی ژاغہ۔ شِمکنت ترکستانار پھوک رو مشرقو ویݰکی گیتی ای لوٹ شہر۔ ہیہ راہو تے ہاتے قدیمی شمالی سِلک روڈو ای نوغ شکل ریکو بوسی۔ لکہ ہݰ جوشور کی ہیہ رہ قازقستانو مشرقو ویݰکی ایہہ ورازا شروع بیتی پونگہ بی الماتی رے شہرا توری ہے پونگین پھار بی جنوب مغربہ شِمکنتہ بی ہیغار ازبکستانو دارولخلافہ تاشقندا تاروران۔ قدیم ہتے سِلک روڈ دی ہموݰ تن بیرائے بس فرق ہݰ بیرائے کی ہسے اولہ شِمکنتہ بی چوکتو بی روسو موژین پھار نیسی یوکرین موژی یوروپو مشرقی حصو سم توراؤاستائے۔ مگر اچہ رو ہے شِمکنتہ موڑو بی تاشقندا بی ہتیعار اف بی ثمرقند وا بُخارو موژین بوغاک کیہ مرکزی راہ کی اوشوئے ہتیرا دی تورا ؤاستائے۔ عام طورا سلک رہ کی رینیان ہتیت ہے مرکزی راہو لوؤ دونیان۔ قدیمو ہے سِلک رہ کاروبارو بچے ساؤز بیتی اوشونی، موجودہ ہیہ ریلان راہو اورُوس تن حکومتو وختہ ہے شِمکنتی وا ازبکستانی فصل خاص کوری کپاس ()کیݰی ہاتیتان پوشی لیرو غون کوری تانتے الیکو بچے ساؤزیرو بیرائے۔ مسئلہ ہیا دی سِلکو تن بیرائے۔ ازبکستانو تے ہتے وختہ "کپاسو ریاست" راوا بیرانی۔ ہیرا کیݰیرو کپاسان شِمکنتہ انگیتی ہیا شیروان سم کوری تن کارخانہ زاپ ساؤزے ریلہ دیتی اوروس تانتے الاوا بیرائے۔ یعنی راہان یا ریلان ساؤزیکہ ہوست سلکو تن شیرائے۔ ای رہ پھار نسو یعنی مغربو ویݰکی اروسار یو گویاں۔ قازقستانو پھار نسو تروئے صوبان "اکتُوبے"، "قَزَل اوردا" وا "تُرکستان" و موژو یو نیسی گویان۔ ہے نسو درے گیتی ازبکستانی بوغاکاان لوٹ بیچان دی شِمکنت ۔ یعنی قازقستانو پھار نسو درے گین ہوئے یا یی نسو یا مہ غون موژو درے شِمکنتہ نو بی ریل ازبکستانی بیکو کیہ لو تن نکی۔ ہین مغربو ویݰکی پھار آخری کونو ای خور رہ شک بیرائے ہسے دی ازبکستانی نیساک بیرائے۔ قزاقستانو ہے ریجنو نام منگیستاؤ وا ہیس ازبکستانو ای خود مختار ریجن "کراکل پاکستان" و سم ملاو بویان۔ نیوشیکا Karakalpakistan بویان رینیان ہو قراقالپاقستان۔ مگر بو کم ریل ہو بوغاک بیانی وا کیہ بو معروف رہ نو بیرائے ہیس۔ روسار قزاقستانو موژو درے کی گین ہوئے لوٹ پڑاؤ قزاقستانو دارلخلافہ آستانہ۔ ہیا جوؤ لوٹ وا مصروف راہ۔ روسو مشہور شہر پِیٹرسبرگ وا روسو دارلخلافہ ماسکواری ریل ہیہ راہو کوسی آستانو تے گونی۔ ہموغار تھے خور ژاغان تے بینی۔ ہیہ ہے روڈو سار بیشیر سال اچہ ساؤزے شک بیرائے۔ آستانہ ریلی نیشی شمال مغربو ویݰکی تھروسکی کی باؤ جو بسہ روسو دارالخلافہ ماسکوا تورین بویان وا ہیہ آستانار جنوبو ویݰکی بی کرغزستان، ازبکستان وا ترکمانستانی بین بوئے۔ ہیہ راہ جنوبو ویݰکی گیتی شُو رے ای ژاغہ بیران۔ ہتیرا مشرقو ویݰکیار گیاک Turksib رہ الماتیہ گیتی فروسکی ویݰکی چھیتی ہے شُوا گویان۔ یعنی شُو رے ہے اسٹیشنہ مشرقی راہ اوچے مرکزو موژو گیاک راہ اییہ تارونیان۔ ۔ اوا تالگو ریلی نیشی موژو گیاک ہیہ راہو بیمان۔ ہیہ راہہ شُوا توریکار پروشٹی تروئے لوٹ اسٹیشن شینی۔ کراگنڈہ، ژانارکا وا سَریہ شارغن۔ تالگو لوٹ اسٹیشنہ روپھوئے ہر اسٹیشنہ نو۔ جو اسٹیشینن سورین نیسائے ہیہ اچتو کراگنڈہ گیلیک۔ شاپیرو لوؤ دیکو گوئے راردو۔ کراگنڈہ ریکو سم ریلو رفتار کم ہوئے۔ پسہ دی تن رفتارو کم کورور اوا دی موقعاری فائدہ اوسنے ݯت گوݯو خومی اسٹیشنو ویڈیو ساوزے انسٹاگرامو تے اہیہ نئیم۔ ریل کی اچی راہی اریر کوشش کوری ہے ہائی نو بی پسہ گنی ازبکستانی بیم۔ پیش کش: #مئیرݯھترار