اژیلیان سوم مشقولگی

اژیلیان سُوم مشقولگی نیویشاک: قاضی شفیق "کیاغ دی ریکو بݰاؤنو" رے ہیہ خو بو مشہور متل کھوارو۔ فارسیہ متال دیتی مُلّا آں باشد کہ چُپ نشود" رینی۔ مہ دی زندگیو بو زیات حصّہ دݰمانانان سوم شوخڅی شیر۔ ہتے وجہین مہ دی عادت ہݰ کی لوو اسکوردی کوریکو نو بوم۔ ژینگوغ تان عاداتار مجبور مضمون پساتے درونگار ساریر مگم پورا کی لوڑیتامی البت پِسہ وخت ضائع نو بوئے مگم تحریرہ بیرو مہ غلطیان اصلاح کی اریتامی پسہ سار بو مینادار بوم۔ لُو ہݰ کی ہیہ نمیژو اولو انوس بیروان پوشاؤ ہیرا یارا بی کوسی کوسی زوغوردا، شامو نمیژو کوری دورا توری براخ چاغ ہوتام۔ پھوک خذمتی نیزیم رے تھروسکی بیکو سوم اژیلی سلام کوری مہ نسہ گیکو سفان سوم دُوچھار ہوتام۔ ہیت مہ ݰویہ تان نیشی تان اشٹوکا ݯوکیتانی، مشقول ہونی، ہوسی بروخچی درونگار کوریکو مہ دی نو تھیئیلی ژان سکون نو بیتی څیقیو فہل اچی متے گیکو اوا دی پھار غیری اژیلیان سوم ہل ہاویز بیتی لو ݯوکیتام۔ کیہ دی لوو موژی ژاؤ متے ریر کی دادا ! مہ ہیہ اسپڅارو پیسان خلتو لوڑے کی کیچہ ٹیپ پیسہ شینی، ای گنی اݰماریتام کی واقعی ای ہزار اوچے سوت شور روپیہ بیرانی ہے عمرہ اسپہ سوت روپیہ نو پوشیرُو۔ مہ ژاؤ ! تو تان پیسان پشاوے کی ریکو ای نیزیتائے کی شُوت بیرُو، کپاکپی تائیتو غون ہانہ دیکو بݰ کوری ٹموٹوک ای جوش کی بیرائے۔ مگم مہ ژاؤ ہانی دنیا پیڅھیرو څیق کی پیسو ای پیسہ کیہ نو جاݰور۔۔ وا دی اخیر څیق وا نگہ تان اسپڅارو بو پیسان پوشی شکست بوئے رے لوو خوری غیریکو بچین اوا مذاق اریتام اے مہ ژاؤ ویچھاکو ژق تیریت نا رے۔ ہوئے تتے اوا دوم نا تہ خلتہ دی ٹیپ بوئے ریکو ای ݯت تان کایو موختُو لوڑی شُونو موڑا ہوسیتائے۔۔ سفان سار څیق ژورو پیسان ای گنی لوڑیتام کی پورا جُو ہزار روپیہ بیرانی۔ اے مہ خونزہ پری تُو کورار الاؤ لا ریکو مہ ژاؤ ران کی اے دادا "پالُوم شُوغُور لمبُور باتیر" رے تہ کارا نیکیا؟؟ تہ ہیہ شوتوق ژور ہے ای کرکانو سار دی اُوچُوتُو ایمیتی انگار بٹی، اچی طالع مند کیہ مہ غون بے طالعہ؟ اوا "سینو نسہ بیکو سین ݯُوݯھو بوئے" رے مہ ژاؤ پھوکیہ تان تان سورو بے طالعو رویان جیرا رُوپھے تان قسمت اوچے تقدیرو عیب ناک نیزی نیشیتائے۔۔ ہے موژی اسیتام ہانیہ تان بیریو ای چینیخی، ژان پازتُو گیرو څیق گیتی "یومونو پوشی ٹیکہ_ نواہڅ" بیرؤو غون نواہڅ بیتی میلیسو ویخال کوریکو مہ دون دونتُو پرائے۔ زیان کار ہے څیق کیہ شیطانی کوری مہ ژور گینیان اُونگوشے ایتُو ݯاکیتائے۔ زاق ژور غیچھان موݰی غیرے دونان بروناؤ څیقوتے گیکو څیق ژور دی "ذوخ اژاوا تُوکھونُو" رینی ہݰ تان فقط کیہ اَنگار غیری "ڑؤوتے شیر مہ سامون" بازوریان وہتی "چیلینگی آسمانوتے دعویٰ" کاردؤ غون میدانہ پرائے۔ اوا پھوک دودیری نیشی "خڑاؤو ژان گیاوا پوشیوتے اشٹوک ساریرو" راردو تماشہ لاڑیمان۔ کو ریکو کی "کاہک تان ٹُور ایوکونُو جام ہوݰ کوئے۔ مہ ژور گینی تان موژی بو محبتی، بس اینگار څیقیو قہر وا پھینو غون ݯت پتہ کوئے سار غیری بیر، ایغو دونی نو رے مہ یقین۔ مِجازا ژور گینی کیہ جُو کھاڑ پینہ جٹ طبیعتہ ہیتان موژی "پالوغ پھت نو بوئے" ایغوتے نو خومیلی پھوک لوا بٹابٹ نیسینی۔ تان ژاؤو لڑیم کی تان سورو جام سنجیدہ کوری اوا ہمیتان موژی زق رے تان لوٹ بیکو ذمہ واریو پورا کوریکو خیالہ بیتی تان اسپڅار گینیان سوم تُھون بیتی اے مغزا گان توریروان کیانی بومیان۔ "بزبار بزبارو کی پرائے ڈوموتے پوؤݯ ݯھارُور" کیہ رے اچی نیزی صلح کوری ہیتان خئیݰیکا کامیاب ہوئے۔ پھوک ژُوروت قوئیے تان نسہ مݰکیکو مہ نسہ گیتی مہ گوڑی ݯوکی بشار اریر دادا ! کا ݰئیلی بیتی اسور لا، کوس زاپ ݰئیلی ؟؟ اوا ریم کی اے مہ دردانہ پِسہ سف ݰئیلی لا سفان زاپ دی ݰئیلی۔ پِسہ غون کا بویان۔ آخری کیہ پورا دیہہ پِسہ۔ تُو تھے ایمیتی *پری* غیری اسوس کیہ ریکو، اوہو دادا اینگار اسپہ ٹیر دوسان لا "ݰا گوغُو تان نانو غیچہ ݰئیلی" وا رے ہوساؤ مہ گوڑی ݯوکیتائے۔۔ مہ ژاؤ گُویا بیتی ای خور سوال اریر، ریتائے کی دادا تہ خوش کا اسپہ موژی ؟؟ اژیر وینی بیتی ہیہ اژیلیان ویݰکیار اولو بشار گانیک اوشوئے۔ یکدم بشار گنیکو کیہ جواب دیکو نو بیتی دُوندُونہ اسیتام پُھوک ژور جواب دیتی مہ ژانو خلص اریر۔ ریتائے کی "دُھوبیو طاقت زاپ نیگاوا پتہ بوئے۔ مہ ژاؤ اوچے لوٹ ژُور لکہ اپاکوتے وال بیتی اسیتانی لا، متالو غلط کوریکو سوم تان واق کوری توغو سورا دیتی مذاق کوراؤ ہوسیتانی۔ مہ ژاؤ متالو صحیح کوری ریر کی اے ناکہوار ہݰ نو رینی کیہ "دُوبیو حالت نمیژوخامئیکو انوس پتہ بوئے"رینی متالو مطلب ہݰ گنیتام کی کا کی جام ہوئے، لوؤ کار کوراک ہوئے، خذمت اریر ہسے خوش بوئے۔ مہ جواب ملال بیکو سف ای بیتی وا بشار ارینی دادا ! لو دیت لا کا تہ خوش ؟؟؟ اوا ریم کی مہ ژاؤ لوو کار کوراک، مہ سوم سف کورمان کورویان، بازارو بی سودا انگویان، نمیژا دی پِسہ سف اشناریان بازارو بی مہ ژاؤ الائے ۔۔ لوٹ ژُورو لوڑیتام کی خوروݰی بیتی فروخو اف لاکیتائے، پین یومونو، کٹر اوݰاکیہ شوخولیپی کوری انگیاوا جوش جُو بجو غون فروخو شُوت کوری گلائی شُرغیتائے۔ ران کی دی لا اوا کوروم کوروم وخت کی توریتائے۔ "ماچوڑیو خذمت انگارتُو زوہچ مہ کاردُو اوغو بینی۔ تھے مہ ژاؤوتے نست نیسی ریر کی بس اے گلائی موخی تان غلطی غیچی نو گوئے دوݰ تان نان زاپ نیگاوا زاپان مہ سوم بیتی یوراوے ریکو، لوو کاری تان نو لاکیتاؤ۔ ژور ریتائے کی برار ! مہ ژان ݯھامیاؤشتائے کیہ، انداؤ کوریکین کِٹ کوریکو طاقت نو بیتی چاغ نیسیتام۔ "بیردُو کفانو سوم خوشان گورو عذابار کیہ خبار" تتے کورا نو گیتی شیر انداؤ صبر تتے پتہ بوئے۔ مہ ژاؤو ہردیار نو نیسی ران کی بس بس "پھونیک نو بیتی شومو بہنہ" مو کورے۔ تہ حالت متے جام پتہ۔ تُو دراشخ گیژالی تان۔انگار لو مو ساؤزاوے۔۔ مہ ژُورو قہر ژان گیتی تھے ایہہ ݯوکیتائے۔ تھے شُروغیتائے پروشٹو لؤان "خراسانی بی ہائے" څوپی څوپی مہ ژاؤو عیبان اݰمارے الائے۔ تو وا کورا موژین بیسان تو دی لوو کار نو کوراک نافرمان رے کوئے بی کوئے ہائے۔ تان کُوٹُھوئی سنجیرو نو پاشیسان مہ ای درو تہ غیچی گویان" رے مہ ژاؤو اپاکی لکھیکو مہ ژاؤ څرپ بیتی تان لو دیکار پیݰمان بیتی۔ "رینی دون ژُوردؤو غون بیتی بغائے۔ ݰئیلی ہیہ مشقولگی متے مزہ کوری اوا شُونو موڑا ہوساؤ ادبی لوان کار کومان، پُھوک ژور دی درونگارا پت پھیک بیتی کار کوراؤشتائے۔ دُونی دُونی بو ݰئیلی متال دیتی ریتائے کی بس لا بو شخڅیتامی پِسہ۔ "ڑاغ ڑاغوتے کیہ طعنہ" پسہ کیانی بومیان۔ ہیہ متالو کار کوری اسپہ سف ہوسی ہوسی کِٹ نیسیتام تان دی ہوسی پُھورا ہوئے۔ "متال ہݰ نماکین سریتائے کی ہے موژی اتفاقاً مہ ژاؤو کپال ڑاغ اوشوئے۔ بس بو ایغوتے کیہ ریتامی دی جنجالو نسی نیزیسی رے اوا تان نسہ مݰکی لوو خوری غیریتام۔ "ݰاوار ݰاؤ کوستے کیاغ دین بوئے" ریکو نصیحت اوا دی وختو غنیمت جوݰی، موقعار فائدہ گنیم رے نصیحت کوری ریتام کی اے اژیلیان مہ "نصیحت کھانجتُو بیرموغ" نو بائے. غورو سورا کار کوری عمل کورور مہ لوان سورا۔ ݰئیلی بیتی ای شوترو اویرو ݰاوایان غون ایغو سوم محبتو سورا ہال بور۔ "اتفاقہ برکت شیر" رومار کی نیسیتاؤ شپیر غاری بوس۔" کی شوم ہوتامی ایغو ژوتی کی زندگی تیریتامی زندگی ݱار بوئے۔ کو ریکو کی رینی کی شُوم ہوئے ڑؤ استانی گوئے رینی۔ غاؤ غاؤ کوری جنجال کوراؤ ایغو بُوکا کی دوسیتامی روئے تماشہ کونی۔ عزت پھیرا بوئے، پِسہ پُورنیکا نان تتان ویݰکی روئے چموٹ اوسنینی۔ لہذا ہموغار اچی مذاق مذاقہ دی ایغوتے کیہ نو ریمی۔ اِسکوردی کوری نصیحت کوری جام صحیی نا ریکو سف ای بیتی مہ سُوم وعدہ ارینی عمل کوسی رے۔۔ نصیحت کوری ای نیسی پھوک ژوروتے اے ژور یان گے تان پیسان اوا لکھوم تو تونجیس ریکو متے دیتی ران کی تان سوم لکھے کیہ دادا اوا وا نمیژا تانتے برقعہ گنیمان، پونگی ݯاکینی گنیم وا پینڈورو اوانی (فراک) پیران دی گنیلیک۔ تھوبہ مہ ژور تہ ہمیت پیسہ کی "جَم جُمو کھماڑ"؟؟ ریکو مہ لوو کیہ دراکہ نو پرانی، متالو مطلبو ہوݰ نو کوری بشار گنیتانی یہ کیہ نوغ لو کارا توریتائے رے۔۔۔۔ ہُوݰ نو کورِیک خیر مگم "ہُوݰ نو کوراکو سُوم بلاہہ ݯھونین بوئے رینی" جام ہݰ ہوئے کی پُھوک پروشٹی تان لوٹ نانی گیتی اسپہ سوم میلیسہ نیشی اسیتائے۔ اوا کیہ لُو دیکو نو بیتی نانیو موختو لوڑیکو نانی اسقان کوری متالو ہوسکیتائے۔ لوٹ نانی ریتائے کی کیہ اشناریو بو وخت لکھیکو دی خراب کی نو ہوئے، یا ختم نو باک اشناری کی اوشوئی ہتوغو بارا رینی یہ کیہ جَم جُمو کھماڑ بیرائے وا رے۔ موش رے اسور نا بریکہ پت نوغ لُو کارا تارونی" رے۔ تھے خائے لوٹہورو ژورو واریہ گیکو ہسے ریر کی اوا تان پیسان تان اخیرتوت پوندی کومان (یعنی صدقہ دومان) ژُورو جوابو کار کوری اول خو نستو رویان ای جام متال مہ یادی ہائے۔ "غریب کی مالدار ہوئے خور کہوار کوئے" رے اسونی مگم ژُورو نیک جذبو پوشی حیران دی ہوتام، خوشان بیتی غیچ غیچہ اشرو ٹیپ ہونی۔ غیچہ باہ کوری شاباشی پھریتام۔ بہیل بوس ہموݰ نیک کورمان څیقیہ تان کورور رے پِھیرِی اریتام۔۔۔ آخیرا ژاؤ ویݰکی غیری اے ژاؤ تان بابا ایوبو زمانو جوش کیو متے دیت تتے اوا نوغ لوٹ نوٹ دوم ریکو شار لا دادا # "چان کھماڑو سوم دی شکر" رے ہوساؤ تان ڑاغ کپالتو کوری دیتی اسپہ دی ہوسے ہوسے شنگُور څینی اریر۔۔ جام خمارا مشقولگیو موژی اسیتام، میلیس گرم اوشوئے دیہو مسجدا امام استاذو ققنوزو سار دی ݰئیلی ہوازہ خفتانو اَذان کارا پرائے، ایہہ رُوپھی آب دست کوری استاذ ہائے وا کیہ خیر رے نمیژوتے مسجدو ویݰکی راہی ہوتام۔ پیش کش: #مئیرݯھترار