کھوار سفر نامہ پڑاو 3

BaboWar Home Profile Create Post About Sign Out Back Linguistics کھوار سفر بامہ پڑاو 3 Iltaf Hani Iltaf Hani June 7, 2026 0 کھوار سفر نامہ: قزاقستانار گنی ازبکستانہ پت ترویو پڑاو: کراگانڈہ گنی ژانارکا پت نیویشاک: نورشمس الدین جوش منٹوتے ریل روپھی اوشوئے۔ غیچھو څیپہ اف خومی اچی ایی نیستم۔ ہیہ اسٹیشنو نام کراگانڈہ بیرائے۔ کراگنڈہ ہیہ شہرو نام دی۔ اسپہ کراچیوتے روشتیان شہر ریسان ہموتے روخنیان شہر راک بیرانی۔ اصلہ ہیہ مشقت باکن شہر۔ ہنیسے ریکو قزاقستانو صنعتی شہر، مگر اوروسو زماناری ہیہ شہر تن نو بلکہ پورا صوبہ محنت مزدوری کوراکن علاقہ بیرائے۔ معدنیاتہ مڑاغ ہتعین کولانو ہیا کورومغار بو۔ کراگنڈو ہیہ اسٹیشن 1956 عیسیویہ ساؤز بیرو بیرائے۔ سخت ݰئیلی اسٹیشن۔ سال پروشٹی کوسک دویان ای گروپو سُم بیتی انوسو وختہ ہیہ اسٹیشنہ گیتی اسیتم۔ چھویو ہتیغار دی ݰئیلی نویاک بیرائے۔ کراگانڈہ قزاقستانو رقبہ لحاظہ سفان سار لوٹ صوبہ بیرائے۔ ہائی پھتی روئے ہوتے قراقانڈہ رینیان نیوشیکہ کراگانڈہ بویان۔ رقبو حسابہ اسپہ پاکستانو نصفو بہکی غیژی ہیہ صوبہ تن مگر ہمو آبادی جوش ای لاکھ ہتے موژار دی پونچ لاکھار پھوک زیادہ روئے ہیہ شہرا اسونی۔ مُلکہ کُھل جوش سوت صوبہ وا تروئے خود مختار شہر شینی۔ ہمیت صوبانتے ریجن یا اوبالسٹ رینی۔ کراگانڈہ ہیہ ریجینو دارلخلافو نام دی۔ لکہ ݯھترارو غون لا ضلعو نام دی وا شہرو نام دی ݯھترار۔ کراگانڈہ شہر قزاقستانو پونجو لوٹ شہر۔ اسٹیشن شہرو جنوبو ویݰکی شیر۔ ہیا تروئے پلیٹ فارم شینی وا ای وختہ 14 ریل ہیا روپھیکو بونی۔ کراگانڈو ہیہ صوبہ معدنیات وا خاص کوری روخینی بو زیادہ نیساک بیرائے۔ ہے روخنی نیسیکین دیتی ہیہ صوبہ مشہور بلکہ بدنام دی بیرائے۔ اوروسو حکومتو وختہ ہیا ای لوٹ گولاک کیمپ(جیل) شیرائے۔ گولاک(Gulag) رے روس تن حکومتو وختہ جبری مشقتو ای ادارہ ساوزیرو بیرائے۔ اسٹالنو دورِ حکومتہ خاص کوری 1930 عیسویار گنی 1950عیسویا پت سیاسی مخالفینن، ژانگی قیدیان، مذہب خوش داراکن یا عام قیدیان سورا ظلم کوریک ہیہ ادارو بنیادی ذمہ داری بیرائے۔ کیہ کیہ ژاغین کی ہیہ ادارہ کیمپ ساؤزے قیدیان ہالے مشقت کوراؤاسیتائے ہتیتانتے گولاک کیمپ راؤاسیتانی۔ ہیہ کراگانڈہ شہرا ای لوٹ گولاک کیمپ شیرائے۔ ہتو نام کار لاگ بیرائے۔ ملکو مختلف کوناری قیدیان ہتیرا ہالے جبری مشقتو طورا ہتیتان ݯاکے چھوئے تا انوس روخنی نیزاؤاسیتانی۔ قزاقستان آزاد بیکار اچی ہتے جیلو میوزیم غیرے اسونی۔ سال پروشٹی ہیہ شہرا گیکو موقع گیتی اوشوئے۔ اسپہ گنی گیرو روئے اسپاتے گولاکان بارا لو دیتی اسیتانی۔ اچی اسپہ گنی ہے عجائب گھرا بی اسیتانی۔ ہے عجائب گھرو مختلف حصہ شینی۔ کورا ہتے وختو حالات مجسمان شکلہ فلم ساؤزیرو غون کوری لکھی شینی۔ کورا جدید ٹیکنالوجیو ذریعا ملٹی میڈیا ڈاکیومنٹری ݯوکی شینی۔ کورا ارٹسٹ تن قلمو ذریعا ہتے وختو ظلمان کاغذا پیش کوری اسونی۔ ہے عجائب گھری بیکو گولاکو جیلی اوتی ہتے وختو تمام ظلمان تن غیچھین پوشین بویان رے سران۔ تھوبہ ہی ہائیی نو بی پِسہ گنی ازبکستانی بیم رے بسم اللہو سُم پیسان اوروسو گولاکان قفی ارتیم۔ درونگار کی اریتم گولاکن ہیہ جیل اوچے جبری مشقتو قصہ اسپہ کارا شیر وا رے دونی دونی ای جو شور سال اچی بی خوشوخت اوچے آمان الملکو ݯھترار گولاکن جیل غیری پِسہ غیچی گوئے۔ ہے لو شانی خائے تھے آوا راؤشتم کی ریلو تروئے لوٹ رہ شینی، اوا موژو ہے راہو درے گومن۔ ریل کراگنڈہو اسٹیشنہ ݯت روپھی اچی راہی بی شیر۔ ہیہ راہین کوسی روس، چایئنہ، کرغزستان وا ازبکستانی بین بویان۔ وا ہے قسمہ ازبکستانو موژین ترکمانستانی وا کرغزستانو موژین تاجکستانی نیسین دی بویان۔ سنٹرل ایشاو سف مُلکان روئے ریلو، جہازو وا موٹران راہو ذریعا امبوخ ژاغین بغیر ویزا تن موژی ایغو ملکی بینیان۔ روسوتے ریکو قازقستانو بو ژاغار بو قسمہ ریل بینیان۔ ہمی ریلو روٹان دی روس تن واہڅیو بچین ساؤزے اسور۔ آزادیار اچی ہمی مُلکان حکومت ہے راہان مزید مضبوط کوری اسور۔ فلحال اوا ازبکستانی بیمن تھے ہے پھتی ملکین کیچہ بیتی بین بوئے ہے لو شانی۔ ازبکستانی کیچہ بیتی بین بوئے رے ہتے لووان دوسی ۔ قازقستاناری ازبکستانی بیکو بچے ریل اوچے جہاز کھاڑ وسیلہ شینی۔ خائے ہݰ بیرائے جہازا پھار نو بی اسپہ دی تن سُم کوری کوئے رائراخان کوسن مو راؤر ۔ جہازا اولی جو گھنٹہ تاشقندا بیکو ژاغہ ریلی نیشی پون غوسی کوری جو بسہ پھار توریکو اچتو وجہہ شیر۔ جیپو ہوست مو الور وجہہ غریبی نو۔ پونو خرچہ مہ سُم پورا شینی۔ ہو ثبوت ہیہ کی اوا جہازا نو بی ریلہ بیمن۔ جہازا خرچہ کم بیسیر پون غوسیہ زیادہ بوئے۔ ریلہ بیکو اصل وجہہ ہݰ کی ای زمانا یہ ویݰکی چایئنہ پھار ویݰکی رومی بادشاہ بیکو چایئنہ والا پھار ہے رویان سُم تجارتو بچے تروئے چھور قسمہ راہ استعمال کوراؤ اوشونی۔ ہیتانتے سِلک روڈز (اسکیمو راہ ) راؤاوشونی۔ ہمی راہین بو قسمو کاروبار باؤ اوشونی مگر ہتے وختہ ہیہ علاقا پیدا باک وا بیزیمونو باک اسکیم مشہور اوشوئے۔ ہتیغین چایئنار پھار ایرانی وا یوروپی علاقان سُم کیہ راہین دیتی تجارت کی باؤشوئے ہتوتے بلکہ ہتے راہان تے سِلک روڈز راوشونی۔ کراگنڈوتے گیاوا سِلک روڈان ݯت ذکرو کوری اسیتم۔ سِلک روڈان تروئے لوٹ حصہ اوشونی۔ سف چینہ شروع باؤ ایرانیان، عرابیان وا یوروپیان سُم بلکہ ہتے وختو تمام لوٹ ریاستن سُم تجارتو بچے استعمال باؤ اوشونی۔ ہمی روڈار څیق څیق روڈ نیساؤ ہی ہائیی بوغاؤ اوشونی۔ چونکہ ہتے وختہ سلطنتن جغرافیائی شکل ݰاؤ ݰاؤ بدل باؤتانی۔ ہیرا ہیہ څیق څیق ملک اوشونی وا ݯت پتہ علاقائی ژانگ باؤتانی۔ تھے ہمی راہ کیاوت کورین کیاوت کورین چولاؤتانی۔ تاریخو کی لوڑیتم عیسوی کیلنڈرار دی نیوف جوش شور سال پروشٹی سِلک رہ کیاوت کی شروع ہوئے ہیس چایئنار گنی موجودہ ایرانہ پت محدود اوشوئے۔ ہتے وختہ دی سنٹرل ایشاءو موژین تن بوغاؤ اوشوئے۔ وختو سُم جوستہ ہے راہہ بدیلی باؤ ہانی کیاوت ݯوکتو بغائے کیاوت موڑو کیاوت درونگار ہونی کیاوت اسکوردی۔ ہیہ دوݰا پت گیتی یعنی ای جو ہزار سال پروشٹی بولونجی پھار عرابیاں بلکہ ہتیغار دی پھار بازنطینی رومیان سُم دی توری اوشونی۔ قق لشٹو موژتو موٹر کاسے رہ کیچہ کی ہی ہائیی بینینان ہمی سِلک راہ دی ہݰ اوشونی کی ریتم نامناسب نو بوئے۔ مگم تاریخ نیویشاک بو روئے ہیہ لوؤ سورا متفق کی چوٹ نیسی ہی ہائیی بیکو باوجودا دی ہمیت تروئے لوٹ رہ اوشونی۔ اولو شمالو ویݰکیار جوؤ موژین وا ترویو جنوبو ویݰکیار۔ جنوبو ویݰکیار ہیہ رہ ہندوستانین دیتی بوغاؤ اوشوئے۔ بو اچہ ݯھترارو موژو درے دی ہے روئے بوغاؤ اسونی۔ شمال اوچے مرکزی حصہ کیاغ کی اوشونی ہیت کھاڑ سنٹرل ایشا و موژین ایہہ روسو پھار عربان وا مشرقی وا جنوبی یورپ بلکہ موجودہ دورو اٹلیا پت کاروبارو راہ اوشونی۔ اوا ریلان رہان لووان دیاوا پستے لو دیتی اسیتم ریلان تروئے رہ شینی رے وا اوا قازقستانو موژو درے کیہ راہ کی گوین ہیہ پھوک اف رو بی قدیمو ہے شمالی سلک روڈو غونہ کوسی بیران۔ سِلک روڈو شمالی یا مرکزی کیہ دی راہین بوغاوا قازقستانو وا ازبکستانو کیہ نو کیہ حصین درے بین باؤ اوشوئے۔ اسکوردی لو ہیہ کی پرانو زمانو ہے راہ کیہ کیہ ژاغین توراؤ وا کورا کورا پڑاؤ کی اوشونی ہتے شہر ہنون زمانا دی شینی۔ ہنون زمانا ریل دی تقریبا ہتے وختو قسمہ رو کوسی بیران وا قدیمو ہتے ہر شہرا روپھویان دی۔ ریلی نیشی ہتے قدیم تاریخو ای کما شہران اف خومی لوڑاؤ پسہ مشقول کوراؤ پھار بی گوم رے جہازو ژاغہ ریلی نیشی اسیتم۔ سلک رہ قازقستان پونگین یعنی جنوبین بوغاؤ اوشوئے۔ اوا آستاناری قزاقستانو موژو درے ہے ویݰکی بیمان۔ اف پونگہ شو رے ژاغا بی مغربو ویݰکی بیم۔ قدیمو سلک روڈ چینا یو گیتی ہݰین پھار بوغاؤ اوشوئے۔ کراگنڈہ یو نیسی کیہ ژاغو کی ہنیسے ہیہ ریل بیران ہیہ مشہور تن "قزقستانومیدان" نامہ۔ نہ بو آباد نہ غیر آباد میدان۔ کورا ایمیتی میدان کورا ٹھینگالی۔ ہنیسے ریکو بیری ٹونگ ٹانگ جو سال پروشٹی الماتیو بوغاوا انوسو وختہ ہایو درے بی اسیتم۔ کراگنڈہ یو نیسی وادی پھوک آباد موڑی بوغاؤ بیکو شُغور اموشتی باؤ گویان۔ ہݰ سران کی قازقستانو ہتے مشہور بیٹپاق ڈالا نامین بیابانوتے ݰوئیتم رے۔ ہتو اثراتن قزاقستانو گان ہائی نیزی شینی البت۔ ہیہ بیابان اف کھول بیتی پونگو بی سَری شاغنو شہر ہتے نسہ بیٹپاق ڈالا۔ ہتغین سَری شاغناری اف نیسی دی تمامو ژاغا پت زیادہ ݰوتار، بیابان۔ ہسے کی کُھل ہوئے تھے شو ویلی شروع بوئے اوݯھی پیدا بونی زندگی روان بوئے۔ قدیمہ دی سلک روڈو وجہین ہو زندگی روان دوان تن اوشوئے۔ ہو سلک روڈ بیکین قدیمہ ہے پونگین روئے سامان بارے پھار ایی بوغاؤ اسیتانی مگر ہیہ میدانتو ہمیت تانتے پژالی کوری ہل بیرو بیانی۔ ہیہ علاقو ہمیت ہنیسے دی نیم پژال۔ فرق ہݰ کی دور وینی پژال قدیمو غون گدائے پژال نو۔ دور شینی بس گرمیو وختہ ہیہ میدانتو ہیرا ہیا چاتیر دیاؤ مالان وال بونیان۔ چاتیروتے یورت رینیان، یورتہ کُومِس مشہور۔ ہیہ میدانتو ہیرا ہیا څیق څیق دیہہ بو۔ کورا جوش گھرانہ کورا بشیر۔ ہیہ ضلعو نام ژانارکا وا ہو لوٹ دیہو نام دی ژانارکا۔ ہے دیہا ریلوے اسٹیشن شیر۔ ہے اسٹیشنہ بو خاص کُومِس ملاؤ بویان رے مہ ای کلاس فیلو متے لو دیتی اسیتائے۔ جوش منٹ اچہ ریل ہے اسٹیشنا تاروران سوت منٹ ہیرا روپھویان۔ سلک روڈو خومیکار پروشٹی ݯت ہیرا اف خومی کُومِس پی گیتی تھے پسہ مشقول کوم ہانیہ پت آرامی کورور۔ پیش کش: #مئیرݯھترار