کھوار سفر نامہ پڑاو 4

کھوار سفر نامہ: قزاقستانار گنی ازبکستانہ پت چھورو پڑاو: ژانارکای سری شاغنہ پت نیویشاک: نور شمس الدین ریل ای دربت ژانارکاو اسٹیشن روپھی اوشوئے۔ ہیرا ریل تن نو زندگی دی روپھی شیر رے سریتائے۔ آستانا روئے پھیروال موڑتو درے مزدوری کونیان۔ سکون رے اشناری نکی تان۔ چھوئے تا انوس دے اسونی۔ یونیورسٹیہ داخلہ بیرو ڈق اوچے کومورو تن سورو تان ساتینی۔ نہ صرف تان سورو ساتینیان بلکہ فلان ژاغہ فلیٹ گانیتم یا فلان ملکی کوساؤ بغاتم رے شیلوغ تن دونی۔ چنگی شیلوع نو سہی۔ کوسیک او چے تن نامہ فلیٹ گانیک آستانہ والان سخت خوش۔ شہرو ہر ویݰکی ہیتان فلیٹس موژا "خان شتر" نامین ای لوٹ شاپنگ مال شیر۔ ہیس پورا چاتیرو ڈیزائنہ۔ نام دی خان شُتر یعنی لوٹ چاتیر۔ قزاقی قدیمہ خانہ بدوش زندگی شخڅاؤ اسیتانی۔ ہر خانہ بدوش گروپو ای لوٹھورو باؤاسیتائے ہتو چاتیر موژا څوکاک بیرائے عام چاتیران سار لوٹ باک بیرائے۔ ہتے تاریخو زندہ لکھی آستانو موژا خان شُتر ساؤزے اساک بیرانی۔ خان شتر دی ای لو دویان کی کیہ ڈاق اوچے کومورو ہنون اژیکو سُم فلیٹ گنیکو عملہ اسومی پسہ بپ گینی چاتیرین ہل بیتی اسونی۔ ہتیت پسہ غون ہر کھیو کھانجان اندرینی نو دیتی اسیتانی بلکہ آسمانو تانتے چھت کوری کوسی اسیتانی۔ ریلی نیشی ہیہ میدانو موژو انگار نیسی بوغاک ہنونو ہمی قزاقان بپ گینی راہو نو بلکہ موسمو مطابقہ کوساؤتانی۔ گرمیہ اوݯھی اوچے اوغ اوشاکیہ خشکی اوچے پیݯی مݰکی کوسیک ہیتن زندگیو حصہ اوشوئے۔ کوسیکہ ہنیسو قزاق دی شوقین۔ قدیمو قزاق کوساوا کوݰکی اژیلی کریمتو بار پروشٹہ لیش پائے باؤتانی۔ ہنیسو قزاقان کریمتو میک بُک ہوستہ موبائل کارو ایئر پوڈ، کُوݰکی کتاب یا آئی پیڈ۔ مال داری ہتے وختو ضرورت اوشوئے میک بُک اوچے آئی پیڈ ہنیسو۔ آستانو ہیت مالداریو ختم کوری ٹیکنالوجیو اختیار کوری آسونی۔ ژاناکارو ہیہ ضلعا دورین ہنسے دی لیش پائے اوچے لیپ ٹاپ کھاڑ شک بیرانی۔ ہیہ ضلعا کندوری ہا دیہان سورا مشتمل۔ کورا جوش گھرانہ کورا شور۔ قدیمو قزاقان دیہہ ، دور، وا مستقل پتہ نو شیرانی ، کورا کی لیشپایان بچے راحت اوشوئے ہسے ہیتن دیہہ اوچے دور باوا بیرائے وا جوش اوچے اوغ کھول بیکہ پت ہیتن پتہ۔ ہنیسے ہمیتن نہ صرف دور شینی بلکہ تن امریکہ نیشی ٹیکنالوجیو ذریعا قازقستانہ تن دورو کرایان دونیان۔ شہرو ہیت خیر ہیہ میدانتو ہمیت دی دور ساؤزے اسونی مگر کوسی ہیرا ہیا بیک وادی ختم نو البتہ کم ضرور۔ مالدارہ استور، لیشو، کیڑی وا بخہ ہالینی۔ استور ہمیتن سواری سُم جوستہ خوراکو ذریعہ دی۔ استورو پوشور سنٹرل ایشا و ملکین زیبیک عام وا جم مینوئیتیو علامت ہیہ کی ہتیرا استورو پوشور دی بوئے۔ اوا اوچے پروفیسر میر افضل تاجک ای کرغز پروفیسر دیشون شمتوف سُم بیتی جو سال پروشٹی کرغزستانو نارین نامین صوبا بی اسیتم۔ ہسے ہموݰ میدانی علاقہ وا روئے دی ہمیتن غون اوشونی۔ ای انوس پروفیسرو مینو رے ڈاکٹر شمتوفو ای ملگیری کا اسپہ تن دورا روچی درئیکو تے مݰکیتائے۔ نمازدیگارا ہوٹلار یو نیسی چَچل بوݰاوا گاڑیہ اسپہ گنی ان ݯوکی غاریہ بغائے۔ تیرا بغاتم کی اسپتے استور کوݰی اسونی۔ پروفیسر تاجک صاحب کوڑوچیو ڈیکو ژوتی اہتی باک خائے استورو کھیو زیبویان کیہ۔ اوا اوچے شمتوف پھوک گزارہ اریتم دی، مگر پورا زیئتو تے بیکو بݰ پوشور اسپہ سار بیݰ ہونی۔ راہی بیکو پستے "سپوئے" کوسی ریکو اسپہ سفر کوسیان خراب بونی رے اوا اوچے پروفیسر میر نو زوئیتم۔ ادینہ اوچے شمتوف پھوک گنیتانی دی۔ البت قدیمہ خانہ بدوش بیکین دیتی پوشور ہمیتان بو خوش۔ اسپہ غون کڑاہی کوری ݰاپیک کھاݰے نو زیبونی۔ سوپ ساؤزے ٹھوریکہ بو شوقین۔ پوشوران یی نے چُھری کانٹا گنی ژیبونیان۔ کم کا ہوستین۔ ایوکون پچے دی ہتو چمچین ژوتی راہی۔ خانہ بدوشیو وختو بو اشناریان روخڅی اسونی مگر ای کما روایات ہنیسے دی پھتی دورین زندہ شینی۔ ہیتن موژی کُومِس اشپیری کوریک دی شیر۔ کُومِس سنٹرل ایشا و خانہ بدوش زندگیو علامت۔ نوروزو انوس یا عام انوس دی شہرار نیشی کورا دیہہَ بیکو پیالو کُومِس درے انگیتی تتے اشپیری کونی۔ شہرو اندرینی دی کیاہ دورین کی اکھابیر اسونی ہتے دورین دی ہݰ بویان۔ کُومِس استورو ݯھیرو لکھی پرانو کوریکو ساؤز بویان مہ خیالہ۔ پھوک شُوت غونی رو۔ ہیس عام مارکیٹہ دی ملاو بویان مگر ہسے کیمیکل دیتی محفوظ کاردو بویان۔ البتہ ہموݰ دیہہ ژاغین خالص ملاؤ بویان رے ہمی روئے بو ہمہ جانا بونی۔ ہتے کرغزستانی بیکا تن پروفیسر شمتوف طلاسار گیاوا ای میدانہ جو تروئے ژاغہ گاڑیو ہالے بشار اریر مگر ملاؤ نو ہوئے۔ تھیوسُم، غاری نیسی اسیتانی بلکہ ای جو ژاغہ یورتن بوئیک شروع اوشوئے۔ شمتوف تن نو گرمیو وختہ گاڑیہ کوساک دویو ہموݰ میدانین پاژالان نسہ روپھی کُومِس پیاؤ بوغک بیرانی۔ اسپہ شیتو پیرو غون۔ کھومس ریکو مہ یادی ہائے اوا ژانارکا و ہے اسٹیشنہ فریش ملاؤ بویان ریکو خالو لوڑاو اف خومی اسیتم مگم افسوس نو شیرائے۔ کُومِسار علاوہ ہمیتن روایتی خوراک "بشبرمک" بو مشہور۔ ہیس دی استورو پوشورو سورا ساؤز بویان۔ منتوق دی میتان خوش رنگ رنگہ ساؤزینی۔ اگرچہ شہرا بو اشناری بدل بیتی شینی مگر ہموݰ دیہی علاقین قدیمو روایت زندہ شک بیرانی۔ آستانہ، الماتی یا شمکنتو رویان لوڑی اچی ژانارکاو چقہ خور دیہی زندگیو لوڑیکو جو مختلف دنیا سرینیان۔ روایاتن حسابہ کیہ مالی حالتہ کھاڑ مضبوط۔ شہرا ہیتان زندگی وختہ قید، ہمیت آزاد۔ ہیت دوری بوتین ہمیت میدانہ موسمو لوڑی کوسی اسونی۔ قدیمو ہاتیتان غون خانہ بدوش نو مگر زندگی ہیہ میدانتو ہنیسے دی نیم خانہ بدوش۔ ہنیسے ریکو چھییو بیری لوڑیکو نگہہ کورا روشتی گویان۔خائے ہائی دورا ہمونی چھوئے ہاتے سلک روڈان وختہ کیچہ بوئے۔ ہمیت ہتے وختہ دی دُنیار الگ تھلک ہال بیرو بیرانی۔ اف گوݯو سلک روٹین رون چھوئے تہ انوس کوسیرو بیرانی مگر ہمیت تن مالداریو دُنیا مست ہال بیرو بیرانی۔ لو اچی ہاتیرا تن بیران۔ یعنی گوݯو سلک روڈین روئے کوسیتانی۔ ای ژاغو اثر ایغو سورا ہوئے ہائی ہمیت تن طریقا تن بہچیتانی۔ قدیمو ہے سلک روڈ کاروبارو بچے ساؤز بیتی اوشونی۔ مگر کیہ راہین کی انسان کوسیتائے ہتے راہین صرف کاروبار تن نو کاسیر چاہے کوسیکو مقصد کاروبار دی کی اوشوئے۔ سلک راہین دی کاروبار تن نو مذہب اوچے پیسہ ہے خوش اشناری یعنی ثقافت دی کوسی بولنجی شیر۔ ہیت وا دی خیر ہے راہان برکاتہ یوروپو روئے کاعذ اوچے بارود ژانک ہونی وا ہنون ہیتن گنی اسپہ کھاکہ ڈاخینیان۔ تن وختہ ہمی سلک رہ بو آباد اوشونی ہے راہین چینیان طب اوچے فلکیاتو علم پھار بغایا ریکو پھارار یونان والان فلسفہ یی ہایا ریکو موژا مسلمانن فزکس اوچے ریاضی چوٹ نیتانیا ریکو ہموݰ ہلہ گول معاملہ اوشوئے۔ خاص کوری اوشٹار گنی جوش چھورعسیویو موژی ہمی روڈان وجہین ہیا علاقہ پورا دنیا نام پیدا کوری آستائے۔ کوریکو کی تقریبا پورا دنیو یعنی ہاتے وختہ مشہور عربو، مشرقی وا جنوبی یورپ و جوستہ افریقو وا چایئنو تن موژی ہر قسمو علمی، تجارتی وا ثقافتی تعلق ہیا راہین درے باوشونی۔ ہاتے وختہ مشرق ہانی ترقی کوری استائے کی مارکوپولو مشرقہ کوسی حیران بیتی نیوشی اسور کی آوا معربہ بی پورا لووان دیکو دی نو بوم ہموش معاملہ شیر رے روئے مہ چانگاگ نینی ران۔ یعنی کیا وختو تے کی مسلمانن ترقیو وا یوروپو چھویئووخت رینیان ہاسے ہمی سِلک راہان آباد بیکو زمانہ اوشوئے۔ تجارتو سو جوستہ ہیا راہین علم کوسیتائے۔ علمو براکاتہ بغداد، تبریز، خیوا، ثمرقند وا بخارو غون شہر اوچھار اوچ باو ہانی۔ علم و ووری بولونجی دور دوری بغائے۔ وا ہاتے برکتہ ہمی راہان ناسار نس مختلف ژاغین الفارابی، البیرونی، الخوارزمی، الرازی، عمر خیام، العزالی، بو علی سینا وا امام بخاری نامین روئے پیدا بیکہ پرانی۔ قدیمہ روئے ہیہ سلک پونین بسی کوراؤ کوساؤتانی اوا پسہ گنی انگار نیسی بیکو چق ہوتم۔ تیز بیک وا دی خیر ازبکستانی بیمن رے دے اچی بی قازق خانہ بدوشان موژی غیرتم۔ ہیس وا دی ݰوئے اوشوئے سلک روڈا دیتی ہزار سال اچی بی قسطنطنیہ توریکو بیرو بیراتم۔ جم ہݰ ہوئے کی ریل سری شاغننو اسٹیشنہ توری روپھیکو اوا دی ہوشہ ہاتم ورنہ بازنطینی سلطنتی بی رائے راخن بیسام۔ تھے ریل روپھیتائے اوا دی ہیا روپھوم۔ بیری روشتی نیوریران۔ جام ہیا کی ہہ اسٹیشنہ بیشیر منٹ ریل خیسماتی نیزیران۔ پسہ دی پھوک دامہ ناؤر وا اوا اف خومی تروق چائے پی اورارو داڑے گیتی تھے پسہ مشقول کوم۔ پیش کش: #مئیرݯھترار