متروکیک

قدیمو ای مشہور فال دریک "متروکیک" نیویشاک: رحیم تبسم متروک گوغو رے ای اولواروم ڑائےے گوغو نام پِسہ کارا بوئےے۔ ہے گوغ تان گیتی ہوستہ نیشیکو یا ہو دوسی تان ہوستہ لاکیکو کوسی چموٹو پھورا بی کی اولوئےیتائےے مہ کیہ کوروم مثلاً اݱغال داری، سفر، نوکری، امتحانہ پاس بیک یا خور کیہ ارمان پورا باک بیرائےے راؤتانی۔ ہݰتانچقہ ہر ای دیہہ فال دراک باؤتانی۔ ہمی روئےے دزبے یا شوتروغیران سورا فال درے مستقبلہ کیہ کورم بیکو یا نو بیکو بارا لو دیاؤتانی۔ ہیہ فالو دنیا متروکاک عورتان دی باؤتانی وا ہیت تان فروسکیو ہوستو لوٹھورو چموٹو کھوڑیو بازؤ کورکونو برابرا یورو ٹیکہ دیتی خاتون جنت نانو ݰینجیکار اچی ہوستو سیدھا کوری پھیسکی چموٹو ہوست بندا توریکو اچی ہوستو بڑاڅھئے لوٹھورو چموٹو بندا دوسی پھیسکی چموٹو ہے کھوڑیو ہوستو موژو چموٹو سوم نیمار کوریکو ہے چموٹ کی ایھہ نیسیتائےے بس کوروم ہوئےے وا کی نو نیسیتائےے نو بویان راؤتانی۔ ہیہ متروکاک نانو دیہہ ای لوٹ نام باؤتائے۔ کوس دوری تان کی بغائے یا کی مݰکی اوانی ہوروتے جم چھمانی وا جم خومبوخ دیتی چائے کوراؤتانی۔ سال یورانو کیہ دی مسی ہورو کوروم کم نو باؤتائے۔ بوسونو وختہ مزدوریار گیاک کی ملال ہوئے ہتو اہل متروکاکو نسہ گونی۔ اچی کی بو بوݰی جوش توݰ کھل بیکو چق کی ہونی دنیا کیچہ بویان رے ہورو نسہ گونی۔ گریݰپو وختہ کوس کاہک یا چھانی ویرکھو تونج کی ہوئے ہو نسوتے دینی۔ پھوک اچہ حیواناتان آنتو ہیٹئیکو کی اچانک کیاغ تونج ہوئے یا ہیٹار کی نو ہائے تھے ہورو نسہ گیتی کیڑی فریاد کوراؤتانی "مہ شرین نانئے متروکے مت لو دیت کی خیرتو شپیر اویویا کورا زومو بغایہ مݰکاؤ نو لے گونیان، اوشوئے څھار ای بتینو۔"۔۔۔ وا ہے متروکاک دی وختو نزاکتو ہوݰ کوری کوس پھوک چنگی لیس رے وختی طورا خوشان کوراؤر۔ وا کوستے کیہ جم ہوݰ نو اریتام ریکو ہتیت تان جم ہوݰ کوری اپاک پرویلاؤنی۔ شورو گور وختہ مزدوریوتے بوغدوان سفرو یا تان منزلہ توری کوروم لیکو یا نولیکو بارا لو دیک دی متروکاکو ڈیوٹیہ شامل اوشوئے وا اچی اکثر عورتانان محفلہ بحثو عنوان دی ہیس باؤر۔ ہائے کائے مہ چنگیتائے نا ریکو کا مت صحیح لو پرائے رے مشقول باؤتانی۔ بہر حال بو زیاد تجربان موژی صحیح اوچے غلطو سوم جوستہ جوستہ توہم پرستیو رواجہ کیہ کمی نو تان گیاؤر وا رویان امیدو محور ماتروکاکو ہےچموٹ تان بہچی آخر ہتے پینین دور دی پوروزیتائے۔ پیش کش: #مئیرݯھترار