پک تازہ روچی

پک تازہ روچی نیویشاک:کلثوم رضا ای "اوݯ" نامین دیہہ "سور ݱانگ" نامین موش اسیتائے۔ ہیس تان دوروینی گریو سوم جوستہ تان نمیژکھون بیک اوچے تروئے چھور حج کوریکین دی دیتی مشہور بیرائے۔ روئے ہوروتے ہے وجہین دیتی بو قدر کوراؤ بیرانی، ای انوس ویلاغبیلو سوم ہے دیہو مسجدو لاؤڈاسپیکرا ہوئیی پرانی۔ سور ݱانگ حاجی پھوک معمولی لہازیاری اچی ہنون شوخڅیتائے دیہو روئے ݰاوار ݰاؤ قبرو ژاغہ تورور۔ بیروان اوچے یار برابرانان غمو بوژیکو بچے بو امبوخ روئے غمگین ہردیان سوم اشرومان غیچھان گنی سور ݱانگ حاجیو پرویزیکو بچے جمع ہونی۔ تو جنازو کوری پوتھور کوریکار اچی کیاوتکی روئے پھوک دودیری بغانی ہے رعب، دبدبہ والا موشوتے فرشتہ گان تشریف الانی۔ سوال جوابو سلسلہ شروع ہوئے، کیھو جوابو سور ݱانگ حاجی پاز نیزی پرائے وا کیھو جوابو پھوک اچی غیستی بیتی پرائے۔ بہرحال فرشتہ گان تان سوم نیویشی گنی بغانی۔ تھے سور ݱانگ حاجی اچی دیتی قبرو کھانجتو تھائقہ دیتی نیشیتائے۔۔۔ پھوک دون دونہ اسیتائے ای خور فرشتہ رجسٹر ہوستہ کوری گیتی بشار اریر۔ سور ݱانگ تہ نامہ؟؟؟ دی! مہ نام۔۔۔۔ تھیسو تان جو فرشتہ گان مہ سار سف سوالان کوری بی اسونی ۔سف لوان دیتی اسیتام وا رے سور ݱانگ حاجی گیرو فرشتو تے لو پرائے۔ دی لہ، لو پرانی۔۔۔لیکن تہ حساب کم شینی۔ تہ سف نمیژان نیمئیکو دی تہ حساب پورا نو ہوئے رے فرشتہ حاجیوتے لو پرائے۔۔۔ مہ جو حج تروئے عمرا دی اوشونی لہ رے حاجی فرشتو یاد دہانی اریر۔ دی لہ تھے عمرا کمپنیو ویݰکیار ہتیت حسابہ نو ہانی۔ بہچیتانی جو حج ایوالیوتے تو حقدارانان حقو تیتانتے نو پیزیمیکہ پت بی اسوس۔ ای اچہ بی خالی طواف کوری کمرا گیتی پوری اسوس۔ نہ شیطانو دیکو تین بغاؤ، نہ قربانی تان ارو، سستیہ کاردو عبادت کوئیی نو ݯاکور نا رے فرشتہ توتے واضح اریر۔ اللہ!.... دی کیچہ بوم ۔۔۔کیہ طریقہ کوم؟ سور ݱانگ حاجی بشار اریر۔ کیچہ کوس خور۔ ہݰ کیہ خور اشناری تہ دستہ شینیہ تہ ہے حسابو پورا کوریکو بݰ، فرشتہ بشار اریر۔ شینی شینی کو نِکی ۔۔۔ روچیان دروستئے جو بیشیر جوش پونج سال بیتی اوشوئے، ایغو دی پھتوکی نو کوری ہو دیتی لکھی اسوم رے سور ݱانگ حاجی ای صندوقو ویݰکی اشارہ اریر۔۔۔ بو جام بیرائے تھے ہیتان یی نیزے ریتائے فرشتہ توتے۔۔۔۔ سور ݱانگ حاجی ݯھیو بیتی جیپو تاڑو یی گنی قلفو آزاد کوری صندوقو لوڑی روچیان بنڈالو یی نیزی تو پروشٹہ پیڅھی ریتائے، لوڑے پورا جوش ݯھوئے شور اوچے پھت روچی ہو شینی۔ تھے فرشتہ توتے ریتائی کی۔۔۔ جام جام تو ہیتان موژی تازہ روچیان لوڑے۔۔۔ای دی پک تازہ روچی کی لیتاؤ تہ کوروم بویان۔ اوا ݯت نستو ہے قبر والو سار کیاغ بشار کوری گوم۔ ای تازہ روچیو لوؤ دیکو سور ݱانگ حاجی چھیو بیتی تان روچیان بنڈالو زراٹھئیکہ پرائے۔ بیشیر جوش، بیشیر جوش کوراؤ جو بیشیر جوش پونج مڑاغ ہے بنڈالو موژو شیرانی۔ ایگان ایگان کوری ہر مڑاغو جام غورو سورا لوڑیتائے کی، ای دی تازہ روچی نو نیسائے ، کیاغ کانو،کیاغ کھوٹو،کیاغ کھوݰی، وا کیاغ کولی۔ سخت پریشان بیتی وا دی جام مہڅی مہڅی لوڑیتائے۔ کیاغ تازہ نِکی رے تو یقین بیتی اچی بوتی صندوقو دیتی سور دوسی نیشی اسیتائے فرشتہ اچی ہائے۔ گیتی کیہ بشار نو کوریکہ پت سور ݱانگ حاجی ریتائے۔۔۔۔ "ہیش کیاغ تازہ نِکی۔ ناموس کوریک،پاشئے کیاغ کوریک ،ایستاؤسیک وا دیشلو کوریک ای بیتی مہ روچیان کانو، کھوٹو کاردو بیرانی، اوا بے خبر اسیتام، نیسے مہ سم وا کیاغ نکی۔ راکھیݰی جہنمو کیہ پہانو کی پیڅھومیان پیڅھور رے غیچھان دوسی سخت ژیرغئیتائے۔ فرشتہ پروشٹی گیتی تو سورو دوسی ایھہ کوری ریتائے۔ اے تو کیانی بوسان ناامید بیتی، اوا تتے لو دیاؤ گیتی اسیتام تان مڑاغان اچی بوتے، اسپہ دفترو ریکارڈا تہ نامہ ای ہݰ پک تازہ روچی نیسائے کی ہسے تہ حسابو پورا اریر۔ تتے بو بو مبارکی۔ سور ݱانگ حاجی حیران بیتی بشار اریر سے کیچہ بیتی؟ فرشتہ تو قبرو جنتو ویݰکی نیساک کھڑکیو کھولاؤ کوری ریتائے تہ ہتے تان غریب گرامبیشوتے روچی دریک انځئیک"۔ سور ݱانگ حاجی جنتو ویݰکی کھیڑکئین گیاک ووریہ مست بیتی یکدم سجدا بی شکر اریر۔ "اے اللہ تہ سوم شکر لہ، مہ عملان موژی ہیس دی نو بیروا اوا کیچہ بیسام۔ اوا نیسے کا ݯھوئی رے کوستے روچی دریک انځئیکو کیہ نو جوݰاؤ اوشتام ہے ای دفعہ انځئیک تان مہ جہنماری خلاص اریر۔ پیش کش: #مئیر ݯھترار