وا نیمیژ خامیک دی گوی

وا نمیژ خامئیک دی گوئے نیویشاک: گل خان گل لوٹ نمیژ خامئیکوتین ای جو بس بہچی اشوئے لوٹ دیہو موژی ہتے وسع توریرو څیق سو لوٹو تان خوشانیان سوم مصروف بیتی نمیژ خامئیکو بھر پور تیاریان کوراؤ اوشونی وا بعض وسع توریرو قربانیوتے مال دی گنی اسیتانی وا کا خصوصی مال حالئے اسیتانی کی ہیہ عیدا قربانی کوروسی رے۔ کندوری دورین ژورگینیار گنی ژیژاوا پت جو تروئے جوڑا نوغ چلائے دی کوری اسیتانی۔سفو ہردی خوشان کی ہیہ عیدا تان بیروان پاشیسی، ہتیتان دورین بیسی وا کوس دورا بو قیمتی طعام دی پاچئیکو بندوبست دی اوشوئے۔ چارہ دار بیروان مݰکیکو تیاری دی اوشوئے وا کوس دوری ناموسو یعنی لوٹ نمائیشو انتظام دی کورونو بیتی اشوئے۔ تنخواہ دارار گنی کاروبای' علاقو جاگیردار وا خور چارہ دار تان عیدو بچین ہر قسمہ تیاری کوری اسیتانی، وجہ ہیہ کی ہر ایوالی تان ننگ ناموسو، تان دولتو، تان حسن و جمالو پاشئیکو انتظارا اسیتانی مگم ہے لوٹ دیہو موژا ای کما ہروݰ بے وسع، ناچار، بے زبان غریب کھوشونو روئے دی اسیتانی کی ہے قربانیو نیمژ صرف نامو سورا ہیتانتے معلوم اوشوئے کی ہتیتان ہے دورو څیڅیقان دی آرزو اوچےارمان ہروݰ تان اوشونی کیچہ کی لوٹ دورو ہے څیڅیقان۔ ہے څیڅیقان موژی کوس شیرین تت نو استائے وا کوس شیرین نان۔ کا ویسورو دی اوشونی وا کا وے اژیرو دی۔کوستے مزدوری ملاؤ نو باؤ اوشوئے کوس وسع نو اشوئے وا کوس ویزینوتے بوت نو اوشوئے۔ بس ہے بے وسع روئے تان سورو وا تان دُݰمن اژیلیان ہݰ رے دلاسہ دیاؤ اسیتانی کی وا نمیژ خامئیک دی بوئے ہیہ نمیژ خامئیکا پسہ ہے پرانو چلایان سورا تان گزارا کورور وا کا نفسو بچین وام دار بیتی تان اژلیان خوشانیان ژونو ماراو اوشتانی ۔۔کا دولتو سورو لیݯھاو اسیتانی وا کوستے غیچہ تارئیکوتے میسر نو اشوئے۔ بس زندگیو ہیہ سفرا کندوری نمیژ ہروݰ تان بیتی شوخڅی گیتی شینی وا کندوری شوخڅی گونی مگر تتے گلائی ہرونی شیر اے حضرت احساس تان گوڑو کتاچپان درے خورو دسے دریرو چلایان لوڑی تہ ژان پولوئی اوشوئے وا تان دیدانگہ پوچیرو طعامان پوشی خورو ویبوتو دور دی تہ اندینی گیلیک اوشوئے وا تان انجیرو کاوݰان پوشی خورو دسے دریرو بخ پونگی ݯاکینیان لوڑیلیک دی اشوئے۔ تہ اے چھور بسو زندگیو احساس، اے نرم ملائم بسترا اورئیاک احساسان خورو بخ ژینہ ای چستان تہ غیچی گیلیک دی اشوئے۔ تو بو خود غرض کیہ اے دولتو پوجاریان، اے بے حس احساس ہمی ننگو ناموس سف نو بہچونی، تہ لوٹ دوریو نمیژ خامئیک دی شاخڅور مہ ناچار کم دست مجبورو گیاک نمیژ دی گوئے۔۔۔ پیشکش: #مئیرݯھترار