خیال خیالو لو

خیال خیالو لو نیویشاک: مستنصر حسین چھوچہ ݱوت روپھیک، ریگیݰو ساؤزے وا کیڑی گنی کوئے بیک، تروئے سف ہتے مشکل کورمان صوبیدار چسپان صاحب پینشن بیکار بو اچہ پت دی ٹھیک ٹھاک سلیقو سورا کوری انگیاؤ اوشوئے. دسمبر مس صوبیدار صاحبوت تمامو دودیری ژاغا ای دعا نیسیتائے، گاڑی لئیکو خود دی کیہ روگاہ نو اوشوئے صوبیدار صاحب آرامہ بیم کیہ دودیری گھنٹو پون رے اسیتائے مگر چسپانو آرامہ بیک وا جوش ای بجا یور شرانی توریکو سم صوبیدار دی مونو پرویزی ای ژاغا بی چائے دی پی دورا تورتائے. چائیو ژاغا فروسکیو دست موزو روخچی گیتی آسیتائے ، ہوستان اف کوری نیݰیو دواختہ گیکو ہاؤلیو پونگہ غیچ بائے کی گولڈن پالوغ پراݯغار دیتی یوز بیتی شینی یورو ݰخور پالوغو ٹکیہ توری پالوغ ڑپ ڑپ کونییان، صوبیدارو پھوردو کریسمسو پھوردو او غون روشتی کویان. چسپان تن نامو قولہ چسپان اوشوئے ہیرا ہیا څپ کوریتائے دُݰمنو مورچو ٹیکہ حملہ کاردؤ غون دار بوہتان پالوغو ژانہ اریر. پالوغ دی ہے موڑو ڈوم ہونی, ای کمائین گنی دوری التی تن ژور مرگستو دیتی ریر کی دا اوچھیت نیگی چھینی ڈونگو درے منقل میزو موڑو لکھے رے تان میزو ٹیکی خڑانگن ایہہ کوری ریتائے ، ای کو چھیت مہ ژور چاپئیو.. اوا قونو گوڑیم مہ اوݰک کوری شیر! ژور چاپئیو یو تارئیکو سوم صوبیدارو موبائل وریزئیک شروع اریر ، چاپئیو نسہ لکھی موبائلوت خݰپ کوری صوبیدار ہوشو الئیتائے. "یورجی" گیتی اوشوئے (ٹاؤرو جنریٹر خراب بیتی یور توریکو سگنل دی مستحکم باؤ اوشوئے وا فور جی دی گیاؤتائے، ہیغین دیتی صوبیدارو ای ملگیری فور جی اوت یور جی نام لکھی اسیتائے) واٹس ایپ اوچے فیس بکو نوٹیفیکیشن ای نسی ، صوبیدار نوغ ہانیسن ٹک ٹاکہ دی گیتی استائے، وا ہوست ڈئیکو دی روخڅیتائے، مرگست پالوغان دی نیگی چھینی انگیتی قون درینیو نسہ لکھی نیٹ کوریکوت تان کمرائی غیری آسیتائے، باورچی خانہ مرگستو نان چاپیو مݰکی چھور دفعہ ہوئے دیکو صوبیدارو ݯت کاری ہائے تختان کوری چاپئیو ہتے موڑی التی پالوغان گُوڑے چاپئیو نیزی ٹیکتو پیڅھیتائے. پالوغو پھوٹ مرگستو ننو ہاضمو ݯھماؤتانی، مرگست ای کما نسان ٹکتو پھوٹان نیزی ننو نسہ دی لکھی اسیتائے۔ یو صوبیدار غیچھان موبائلو ٹیکہ دیتی سے پھوٹو پھیرومان پالوغان بے شیبہ بے شیبہ الاؤ اوشوئے. ایہہ مرگستو نان دی آلوان نیگی زاہ ہوستو ٹکیی پیٹیکو انگیتی موبائلو دوسی بخاریو پروشٹہ ہائے۔ ہوستن کیہ علاجہ ݯت زانتو کھاݰیتائے ݯت انگاروت دوسیتائے موبائلو سکرینو ایہہ دیک شروع اریر۔ ختانہ کی ہاؤ صوبیدارو ہے موبائل ریکو توپتو دویان، مرگستو ننو موبائلو ہواز دی ہمیشہ فل بوئے۔ مرگستو ناچار ہاضمہ ݯھومک نن دی ای خݰپ کوری امو آلوان اویوئے وا کمہ پالوغو نسان آلوان موژی کوری زاہو موژو پرائے ۔ مگم بوتہ پت نہ ہو ہاضمہ ݯھمیتائے نہ صوبیدار زاہو موژو پالوغان دراکہ پرائے. مرگستو نن وا دی قباہتی کوری بوتو پختیو دی عملہ ہوئے مرگست تان یور اف غیریکہ پت نہ کمرار یو نیسائے نہ گرانیشو ݰاپیکو اویوئے.. یورو سم ایغہ نیٹ دی پوروزیتائے. مرگست دی دوری اوتیتائے لاڑیران کی صوبیدار جندی بیتی اسور، کیہ معاملہ ہوئے ریکو نان ریتائے کی ہائے ژور ہے ڈونگو گنی کورا پھیرو نیرو بیرتم تو دی نو لوڑی ہُو پالوغان لکھی تان تتوت دیرو بیراؤ۔ ہانیہ صوبیدار اچی ای غیرتائے. "اے کیمیری اندازہ کو، ژورو ٹیکہ پھان نو دیت ہس ہے موبائلو ٹیکو ݯوکی نہ کھیو خیال کویان نہ سبق ریران، ہتے پالوغو موڑا پھیرو درے اوشوئے تہ ژور نو نیگی مت دیتی اسور". مرگست بی پالوغو موڑا لوڑتائے ہتیرا دی خھݰکے پھیرو درے اوشونی۔ نن بی ݮیھترا لوڑتائے انوسو اف نیرو پھیرو ہتیرا اوشونی مگر ہو یادی نو ہائی ہو کو درے التی اسیتائے۔ پالوغان نیگیک دی مرگستو یادی نو گیاؤ اوشوئے۔ بوت بیکو پختیو سوم انوسو زاہو پیݯے یو الانی۔ ہنیسن صوبیداروت زاہو تروپ ݰور سارئیتائے. پھوک داری پالوغو نسان زاہو موژو پوشی ٹارے ݰاپیکو پیݯھی تانتے کیٹوری انگیتی ژوتی پوریتائے. مرگست اوچے تو نان زاہو پختیو ٹیکہ دیتی ژوتی گورا پت ڈرامہ لوڑیتانی۔ اونزیخت پالوغ شخو موژو گیکو وا کیاغ بوئے روشتی خومیکہ پت مرگستو ننو ہاضمہ ݯھومیتائے۔ پیش کش: #مئیرݯھترار