چیلی بوختو

‎چیلی بوہتو (افسانہ) ‎ ‎نیویشاک: علی نور البرق کوشٹ ‎ ‎بیشیرجوش کھوشون دیہو صرف نام راحت دوری، زاروان فہمیدہ بیتی ہنیسے گورو پونگ درے نیشی اسونی مگم راحتیو موخو کا نو پوشیتانی۔ پھتی بیری نیسیرو ہݰ دی راؤ اوشونی کی ہیہ دیہو نام اصلہ دراغانݯ دوری بیرائے، مگم دیہو دنیا نو پوشیرو بپ گینیان خیالہ ژونو حال بیکو بچے موݰیچ شخو سوم سیرائے دنیا وا خور کورا ملاؤ تان نو بویان رے تان دیہو څیق دی توری پاشئیکو بچے بہشٹ راحت دوری راؤ اوشونی۔ ‎ ‎کیچہ کی دیہو خالی نام راحت دوری اوشوئے، روئے گری بپ دی خالی نامو روئے گری اوشوئے، ݱوغ باریکی فقط ژان نیسیکو بیرو، کھپوڑو چوٹیکی لکھی، ٹوقی لال روئے گری بپو سار دیہہ ہمونیہ پت کا روئے گری نو پوشی اسیتانی، ای مکالہ پیلیلی ہتو شختالو بیان بڑاڅھئیرو بیرانی، ہسے شختالو بیان اچی انجیلہ کوری ݯھیتری اولئیکار اچی ہردیار نو نیسی ای دم دے دورا بی شاداغیزو ٹیکہ لاٹینو گنی گیتی ݯھوتیو تیلو پیڑیک کوری پیلیلیان ماڑو درے ماچس دیتی ݯاکئیرو بیرائے، ہیغار اچی روئے پچھانہ ہتوتے پیلیلی ماراک دی راؤاوتانی۔ ‎ ‎روئے گری بپو ای پھولوک ژاؤ پردوم، څیقی گنی چوم چوقوت، نہ بیری نیسیک، نہ څیڅیقان سوم اشٹوک، نہ کیڑیک، نہ ہوسیک، نہ کیاغ مݰکیک، نہ جنجال، پھارو دیت ریکو پھارو، ییرو گئے ریکو ییرو، ہیچ کیاغ کی نو ریتاؤ کوراکی پیڅھیتاو ہتے ژاغا اسکوؤ دیرؤو غون پیڅھی شیر۔ څیقی گنی روئے گری ژاؤو ݯیݯھئیمان رے ہواز یی نیزیکو سوم کھاکو موشٹین دیتی تان تت بیکو حقو ادا کوری انگیتی اسیتائے۔ ‎ ‎تت خوشان ژاؤ لوا باک رے مگم ہتو بہکی بہکی ملگیری سف ہتو سورا ہوساؤاوتانی، "پردوم جنگلہ ژانوران دوسی پھت کویان، اسپہ پردوم ہاؤل کپالتو ژوغان دوساؤ پھت کویان۔" پۡردومو سورا کیہ اثر بویان کیہ، پھیک بیتی کپالتو کوچھیاؤ سورو موڑو دیتی حال بوئے۔ ‎ ‎جوش سالہ بیتی اوّلو مکالہ ݯھونݮیر ہوستہ کوریکہ پرائے۔ دروکاڑا ځوخان موژو تھاغ تھاغی ٹینځاوا چیلی بوہتو پوشی دیتائے، صحیح غیچھئے ݯھونݮور بوہتو جام یی ݱینگئے پھا لاکیکو ای ٹھک ہواز اریر۔ دے ځوخان موڑا بی لوڑیتائے کی ای چیلی بوہتو لشٹہ دیتی پراٹھئیران۔ یی گنی ہوستہ کوکو ہتو سور اف لیچالیچ ہوئے۔ ہے ہائیی لوڑی ݰویہ تان ای توکھونو کھوشنالاکو یی گنی ہتو بوکی لکھیتائے۔ ‎ ‎چیلی بوہتو لئیے ہتوچموٹان رنگ کوری لشٹہ چوٹیکہ پرائے، ݱاق، پیݯ لئیے۔ ‎پردوم ہے لئیو پیݯیو تان اندرینی محسوس کوریکہ پرائے، ای عجیب پیݯی، ای عجیب خوشانی، ہتو ہیچ کیہ ہوݰ نو اریر، ہیچ کیہ نام دیکو نوبیتائے۔ ‎روئے گری ژاؤو ہوستہ چیلی بوہتو پوشی اوّلو مکالہ موخو روشت کوری ہتو ویلٹی لوڑیتائے، دھپ دھپ ہوازا جو ایغو سورتو ہتو کریمتو کوری پنجہ دیتی "شاباش! موش غیرتاؤ موش" ریکو اوّلو مکالہ پردوم تان تان سورو لوڑیتائے وا تان سورو پوشیتائے۔ ‎ ‎پردوم تان موژا پردومو پوشیتائے۔ ‎ ‎پردوم لاڑیران کی چیلی بوہتو قالبار لئیے اف چاٹوران، ای دربتو موژی تان ہتے لئیے پورا دریاہ غیریتائے۔ روم چیلی بوہتو ہتے موژو دیتی اوسنیکہ پرانی، ہتے لئیو دریاہو موژو ژیرغست کوری اشٹوک کوریکہ پرانی۔ ای دربتہ سف لئیا مڑاغ ہونی۔ چیلی بوہتو تان سورو تان نو، ہتو دی زپان سوم پورا بدنو لئیا مڑاغ ارینی۔ زران بیتی ایھہ روپھی لاڑیران کی خیلہ مڑاغ بیتی اسور، سخت اوغ پیارو گویان۔ مشاربا اوغو پیڑیک اف دریکار اچی دی تھروݰنی گری ختم نو بیکو دونی دونی ہیا نتیجا توریتائے کی ہتو تھروݰنیو صرف چیلی بوہتان لئیار غیر کیاغ ختم نو کوروئے۔ ‎ ‎پردومو چیلی بوہتان سوم دݰمنی شروع ہوئے۔ ‎ ‎پردوم لوٹ باؤ ہائے۔ ہتے سوم جوستہ ہتو تھروݰنی گری دی لوٹ باؤ ہائے۔ چیلی بوہتو لئیے ہتو غیچی نو گیکہ پرائے۔ ‎ ‎سوتسوروک، کالکور، غوڑی، ہر ژانورو ماریکار اچی تتو سار موشی گریو سرٹیفٹیکٹو ضرور گناؤاوتائے۔ ہر لئیو سوم جوستہ پردوم تان سورو پروشٹو سار لوٹ محسوس کوریکہ پرائے، ذیاد طاقتور، ذیاد مکمل، پروشٹو سار لوٹ پردوم۔ ‎ ‎اوّلو مرتبہ کیاوتکی ای انسانو لئیے ہتو ہوستہ چوٹیتائے، ہتوتے ہیچ کیہ نوژان نو ساریتائے۔ ہے وختہ دی چیلی بوہتو ژیرغست کوریکو ہواز ہو کاری ہائے۔ ‎ ‎کوموران ہتو بچے ݰئیلی چیلی بوہتو سار غیر وا کیاغ نو ہونی، کندوری چیلی بوہتو ژیرغست ارینی، کندوری پھیک ہونی، کندوری ہمیشو بچے پھیک ہونی۔ ہر مکالہ ہتے خوشپ تان، ہتے چیلی بوہتو، ہتے لئیے، ہتے دریاہ، ہتے ژیرغست۔ ‎ ‎زرینو عمر تان کیاغ بیتی اوشوئے، نافہمیہ څھوؤ، نہ اچہ کا نہ پروشٹہ، کوس وسع کی ہوئے میݱئیتانی، سستئیتانی، څیقیاری ارمانان بوکھو پیڑی غوت دیتی دیتی، لوٹ کھیو بویان کیہ، ہے سوم باؤجودا چوموٹکیریوتین گیکو، اچی باریکی بدنو حسن لوق زاپان موژین دی پردومو غیچی گیکہ پرائے۔ ‎ ‎پردوم کیاوت دی کی ہتو لاڑیر، ځوخان موژو ہتے چیلی بوہتو ہتو غیچی گوئے، ٹُک ٹُک رونځاؤ، چوم چوقت، غیچہ اشرو۔ ‎ ‎ہتے انوس دی ہݰ تان، چیلی بوہتو موڑا دیتی اپھیکار اچی خیسمتی نیزیکو بچے ای دربت غیچھان نیشئے اوتھانو بیتی اسیتائے۔ ‎ ‎کیہ توکھونو اشناری ہتو کھاکتو توری ݯھامئیکو انگاہ بیتی زرینو ہوستہ دارخاچیو پوشی ای دربتو بچے حیران بیتی ہتو موختو لوڑیتائے، "ہیہ ہتے چیلی بوہتو تھے نو کوس کی اوا ای دربت پروشٹی پوݯھان اپھئیاؤ اوشوتام؟" ‎ ‎لئیے ہتو غیچی غیری چھوئے بیکو بازوریو گنی غیچھان ماژاؤ اوشوئے، ہانیہ دارخاچی پروشٹو سار دی دوڑ ہتو کارموٹیاہتو خومیتائے، وا خومیتائے، وا خومیتائے، وا۔۔۔۔۔ ‎ ‎نیم بے ہوشیو حالتہ لوڑیتائے کی ہتو لئیے اف بی لوٹ چھت ساؤز بیتی شیر۔ پورا دنیو چیلی بوہتو سف ہتے موژو دیتی ژیرغست کوری اشٹوک کورونیان وا تان ورازنان ہتے موژو دیتی پراٹھئیاؤ پورا دنیو لئیا مڑاغ کوریکہ پرانی۔ ‎ ‎پردوم زرینوتے ہوئیی دیکو بچے اپاکو ہوریکو کوشش اریر مگم ہواز یی نو نیسیتائے۔ ‎ ‎پردومو غیچ بند ہونی۔ ہیسوم جوستہ ہتو ذہن دی ای ٹونگ ٹانگ چھوئیو موژو تونج بیکہ پرائے۔ پیش کش:#مئیرݯھترار # علی_نور_البرق