کھوار کپالہ تاج

کھوارو کپالہ تاج، امین الرحمان چغتائیؔ نیویشاک: ڈاکٹر عنایت اللہ فیضی (تمغئہ امیتاز) ای انوس بنکار خبر ہائے کی تو کیچہ اسوس؟ جم اسوسا؟ مہربانی کوری ای سرٹیفیکٹ انگئے ہتیرا ثبوت بائے کی ہیہ پنشنر زندہ اسور پھار نوما بیر ہائیی اسور رے، اوا ڈاز باز روپھی سرٹیفیکٹو اچہ بغاتام، سرٹیفیکٹو پونگہ خالی ژاغہ اوشوئے بنکو افسر متے ریتائے کی ہیرا کیاغ کی نیویشیک مݰکیسان نیویشے، اوا یکدم قلمو یی گنی نییویشیتام "زندہ اسوم ہنوز کی مولا ساتک بیرائے"، بنکو افسر چوروٹی موش بیرائے کاغذو اچی متے یی تارئے ریتائے کی شعرو پورا کاردوا جم بیسیر۔ اوا یی گنی نیویشیتام۔ گردش بطوق گردن و گردن بطوقِ عشق زندہ اسوم ہنوز کی مولا ساتک بیرائے بنکو افسر شاعرو نامو خبر گنیکو فخرو سورا ریتام کی امین الرحمان چغتائیؔ صاحب۔ متے ہیہ فخر حاصل شیر کی چغتائیؔ صاحب مشاعرا کلام ریکو پورا کلام متے یاد باؤشتائے، سفو سار نست ہیہ غزل متے یاد ہوئے اے عشق بے شعور کی ہردی ݯوکک بیرئے کھسپو لوڑاک بیرائے نہ ذاتو پوشک بیرائے در مکتب حیات. نوشتہ بہ تختِ در تقدیر ہر کمال کی پستی پوشک بیرائے در طفلگی کی ہائے ریکو دوہ اشٹوراک اوشوئے ظالم ہنون بہ جنبشِ لب روئے مرک بیرائے امین الرحمان چغتائیؔ صاحبو لوٹ خوبی ہیہ کی ہسے کوس ہوستی نو گوئے ناگہہ کی کوس ہوستی ہائے ہسے بو خوش نصیب بوئے۔ ستمبر 1980ء پشاور یونیورسٹیو 8 نمبرو ہاسٹلہ مشاعرو پروگرام ہوئے بو مشکلو سورا چغتائیؔ صاحبو گنی صدرار یونیورسٹیہ، ہیرار ہاسٹلہ الانی مگم ہاسٹلہ گیتی مہ سوم ڈائری نِکی کلام نِکی اوا کیاغ ریکو نو بوم رے چک و پک ہوئے اوا ہمت کوری ریتام کی تہ غزلو اوا ریم نو نیویشے، ہتو یقین نو بیتی مانیتائے اوا شروع اریتام۔ تہ یہ حسن و عشقو معاملہ کروئیی لیگینی ہوئے ݰا کپالوتے کورا چار لوڑے مہ جنونوتے کی بقا نو لیسان تان جمالوتے مطلع گیکار اچی ہوئے لہ جی ہیہ غزلو کی خوشئیرو بیراتامی اوا پِسہ خذمتہ پیش کوم رے اسپہ شیروستو اریر، موژا ای شعرو سورین نیسی بیکو لقمہ پھریتام۔ تھےظالم ریتائے تو شاعر بیراؤ کوراعشق مشق دیکوروس دیا دی دونیکہ دیت اے مہ شوم عقل کیہ جواب کی بیرائے یہ سوالوتے ای خور شعرو سورین نیسیکو اوا جوبارہ ہمت کوری عرض اریتام، تہ یہ شہرو غلغلو موژی۔۔۔۔۔۔ہمونی ریکو سوم ٹھیخ ہوسی شعرو ریتائے۔ تہ یہ شہرو غلغلو موژی جو کٹاکان سار دی ویر ہوتام کورا چھیت نو ہوئے کورا آہ نو ہوئے نہ تھرونیو چھاغ ای پژالوتے تہ محرابوتے اوا گوم غیری مہ نسین لوڑی مہ بہیل دی کو تھے غیچھان نیشئے انتظار اوا کوم نشونو کنو کی دجالوتے مشفق خواجہ کراچیہ ای انوس نیویشی اسیتائے،"ہم اردو ادب کے عہد یوسفی میں جی رہے ہیں" ہورو انگوڑی اسپہ موژار ای موش ہموݰ ریکو بوئے کی اسپہ کھوار ادبو عہدِ "امینہ" اسوسی، متے شاعرانہ تعلّیو اجازت کی دومی اوا ہݰ دی ریم کی کھوارو ادبو شوخڅیرو زمانہ دی امینو گیاک زمانہ دی امینو بوئے۔ امینو کلامہ بیدلو تخّیل، غالبو روزمرہ، میرو سہل ممتنع، اختر شیرانی اوچے شیرازو رومانویت، فیض اوچے جوشو فنی خصوصیات ایمیتی روئیتو دونیان۔ اردو کلامہ کورا ای شاعرو رنگو گنیکو ژاغا تانتے ای غیژی مقام حاصل کوری اسور۔ ہیرار اچی اردو شاعری کفِ خاکسترو رنگہ بوئے، کتاب چھاپ بیتی پونج سال پورا بیکار پروشٹی یونیورسٹیو شعبہ اردوا امین الرحمان چغتائیؔ صاحبو شاعریو سورا ایم فلو تحقیقی مقالہ منظور کورونو ہوئے۔ کھوار زبانوتے امین صاحب ہرونی نوغ تشبیہات اوچے تراکیب انگیتی اسور کی ہیتان اݰمارئے کورا تارئین نو بوئے۔ ٹمبوکی، ووری، استاری، روشتی دردانہ نغمہ کیہ دونی لکھونیان تہ ہمی نامان تانتے تہ غونہ لاکھ بائے سہی تہ وفا تہ تان تہ ادا تتان اوا مس نو ریم سے کی ہو بہو اوا حور نو ریم تہ مثالوتے کھوارو روخڅونو بیرو الفاظان دی ہیہ زائیلہ ݰیلی کوری انگیتی اسور، ای شعرو جوؤ مصرعا کندوری اشناریان نام شینی وا کیچہ ݰیلی بیتی گیتی شینی۔ عشقو باروتے سامون اریر جملہ سرانجام تھے کوس شیمینی، کوس آؤرینی کوس کوڑوس اریر غزلو شعرا ملکو حالاتان ہروݰ نازک کوری انگویان کی راکوچے کارکوراکوتے مزا کویان۔ قتل، اغوا، ݯھوغی، بم، ڈاکہ، دھماکہ ہیلو کوراؤ لو دوسان اوا پاکستانہ اسوم ہنگامِ سحر خوشپہ ہر ای کھانجہ نقش ڑائے اوغو غوݯھار ݯوݯھوا خورا غیردیکو ارواحان پھانینیان بیڑہ پارو سوم کیچہ کی انیس اوچے دبیر، فیض اوچے اقبال، غالب اوچے سودا زبانوتے نوغ نوغ تراکیب دیتی ݰیلی کوری اسونی ہے زائیلہ امین صاحب کھواروتے بے حساب تراکیب دیتی اسور، سفان اݰمارو ژاغا تروئے فارسی امیشتی تراکیبان مثالو دوم۔ وا بشار مہ گنیس کو کی تہ میکدہ کیوالی ہسے رندِ ݯیغ کوراک کا تہ شرابو پی اسور ہیہ شعرا رندِ ݯیغ کوراک اسکیم زاپہ دردانہ صدف غیری شیر، ݰئی ٹھور بویان، امین صاحبو ای مصرعا جو ہروݰ تراکیب گیتی شینی، تاریخ دیاک ججوتے ریران کی۔ در مسند قضا تو زن کھیݰ و ڈق نواز ہیہ مصرعا زن کھیݰ کیچہ فِٹ گیتی شیر، ڈق نواز کیچہ چست بیتی ݯوکی شیر۔ امین الرحمان چغتائیؔ صاحبو کھوار کلامو کتاب تھک نہ تھکی چھاپ بیتی بو زمانہ بغائے، اسپہ شِپ نہ شِپی گوئے رے انتظارہ اسیتام ہورو ژاغا کفِ خاکستر ہائے۔ جون ایلیا نیویشی اسور کی تان کلامو اوا بڑاڅھئے مڑاغ کوری نو لکھوم مہ دوستان مہ کلامو ایغو نسہ انگیتی کتاب باتینی، ہیہ حالت امین الرحمان چغتائیؔ صاحبو دی ہݰ تان۔ ہنیسے مہ اوچے پِسہ ذمہ داری کی استاذو کلامو ایغو نسہ انگیتی ای خور کتاب چھاپ کوروسی۔ پیشکش: #مئیرݯھترار #ڈاکٹر_فیضی