کھوار نظم

کھوار نظم شاعر جلیل جلالی بوسونی اوتیکو گیرو، چوڑاوا مایون پالوغان گوغینی کوری، ژوڑیان پاچے زوالی ویخال ہونی رے، گُرزینار اولوئی ݰا بیرو کوئیتار ژوتی غوٹ بیتی بغائے څاداران دوسور متے رے، پیشتازی کوری ڑاے دیرو آرمانان زاڑے نو پوچیکا پت کمبوخی کوری تھاغوتے جو دستہ لکھی نلانگی آرزوان ہسے، جام ݯھانی بغائے زورکوری پیڅھیرو لاوان کانہ تان بہچے جام پوچی زووالو بیکو، نو ژوتی ہسے گانہ یو غیریران څوپاٶ، یوروتے اولے ݯار بیرو وافو کیٹوریان نو گانی بغائے تھاواژو ریژانتے دوناؤ خوماری بیتی پوترومی نیژدیرا توری، اچی گویان رے بایو غیر اورارو پالے، پائیتاوان بوتی کُھوشیرو تھوئیکو گانی ڈاز روپھی بغائے اݰکارو اچہ، اف نیسی، آن چوکی کوساٶ ژان ماری مورکیچ چوڑینیو، بیچانہ تارے بے صبری کوراک بنی آدم باسیسیو پیݯھی اونارار لوسی تروق چایو سے نو ٹھوری بغائے گان دیتی گولان پیڅھی بی، اوݯھییہ توری پھوک مدا قرار گانیرو، نائیکو اوا دودیریار دوژاوا پوشی، پیڅی نو لاکی گریش مورو توقومیو گانی آن ݯوکی بغائے پلاغی تونیݰو ماری، پھوست کوری بارے کوماڑین گیرو ورغانو، ڈاشڈی رے اوندی لوݯھیرو پازو ڈوسکیو، شورباری ٹھوراٶ بیژاارو راندیݱو کوری، جام ژوتی بغائے اوغ دیتی خاݰکئیرو کھینیئے، توق بیکو لیݯھی زاہ شیکا داپھیرو کھولو رائے کوری ماوݰین ہیٹ بیرو لوغاران پوا، مس بوئے رے نݰان پریزونان نسار نسینین، ݱاخت دیتی بغائے یوروتے روپھیرو باوان، چار کوری پیڅھاٶ اِستاوا ݯونگوان سیری، ݰویا دائے دیتی پختاوے باٶبیتیان نیزی، مئیروتے جیرے تان چیتہ لیݯھاو ہتیتان، جام کرامی بغائے لونگ کوری یوروتے پیڅھی، تھرینگوڑین ڈاخاٶ بلاݯھیرو پلالان، پھیئین، گانوتے اولیئے، پھونیرو اوݯھوران راشو، راشینتو کوری، دوغوڑو شونگولان ہاسے نو ماژی بغائے۔ چاھنییان آووغ ݯوکیکو، مدوکو ڈانگیئے، بے رشق خورو نسورو، اوغ دیتی لوڑی، بٹونیک چیقھار نسائےرے، روشوکان بڑاڅھاؤ، ݯھئیر دیتی پیݰیرو کھایان، سف ماژی بغائے۔ پیش کش: #مئیرݯھترار #جلیل_جلالی