کولانو ڈاق
نیویشک: شہانہ عزیز
جبین سَلانو ٹیکھار پلاشٹیکو موژو تھسو دیتی ژو ایھ نیزاؤ اوشوئے، تھس تو ہوستار نیسی شومو غیری ژؤ پھولوک اوݱورین ہونی۔ انوار دورو دواہتہ اندرینی گیتی، موبائلا لوڑی سورو ایہہ نو کوری، شومو ژؤ پھولوکان لیݯھی دُوری بیندہ گیتی نیشیتائے۔جبین نَخار یُو خومی توعو ٹیکہ گیتی ریپھی ریتائے 'ہانی پھولوکان لیݯھی گیتی بےغم نییشیتاؤ۔ کندوری ناشکری ہیس تت پتہ؟
نن کی تہ پوشیسیرتہ پھوستان نیژیسیر۔ اوا لاڑیمان انوسار انوسوت تہ خُو شُم باؤ گویان۔ ریکو انوار قہری بیتی جبینو موخار گیتی ریتائے 'اوا نو پوشیتام پھولوکان، مہ کھاکوایہہ نوناوے، ریکوجبین اچی کوری توتے ریتائے۔
موبائلار نیݰی دُنیو کی لوڑیتاؤ، تھے پاشیس البت، ہے قبرو سورو کی ݯاکوسان وا دُنیو ہوشہ نو گوسان، ہیراہَݰ کیاغ شیر کیہ خبر۔ ناچارتت میہہ ݯھوماوا، غیژی ادراختو دارانتے بغائے، خوئے ای کاڑوم کوروم کو تو دوری، سکولار خود نیستاؤ ہےقسمہ کوساؤ۔ گرانیش بیکو ریپھی بیسان، کیاوت غیردی انوسو چھوچھو ناذانوت گیکو گوسان، کیاوت کورا کیاوت کورا بس باؤ گوسان۔ ہݰ کوئی بیسان وا کوسوم بیسان تو؟ سگریٹ پیک ریکو تَتو پوشی تت نست نیسی شیر، ای انوس موخاسار تو شکست ارو، ہانی شُم بیرائے تان کھیوت پیسان، وا مہ ݯھیݯیسان رے'۔ جبینو لو ختم نو بیتی اوشوئے، ہے موژی انوارو موبائل بوشیتائے۔
انوار: "جام اوا اف ہاتم" رے ایہہ ریپھی ٹیکہ بی پانہ پانوسہ گلاسو یو گانی، گیلیٹیار اوغ یی گنی پیکا پرائے۔ جبین باشار اریر'کوسوم لو دیاؤ اوشو کوئے بیسان ہیہ وختہ؟ شاموت ہائے۔
ہے بھائی جان رے کوس فون گویان تت، مہ ہردیو کھیوت شانیسان ، مت لو دیت کی؟
'ریکو انوار اوغ پیکو موژی وقفہ گنی ریتائے' کوئے کی بغاتم تہ کیاغ خاچ ہوئے، تہ اوچے تتو ہمی جنجالان کوری ہیہ دورو سار مہ ژان ویران کویان۔
ہیس کا کی اسور مہ تان دورو رویان سار ݰئیلی مہ خیالو لاکھویان۔ رے بہچیرو اوغو پی بیندو اف نیسی شومو اوݱورین پھولوکان وا لیݯھی دورو دواہتار اف موخینو نیستائے۔ جبین تو اچتو اف کوری قوئیتائے، چھویو ملال نو بوس کوئے کی بیسان، نانو ہردی شینی اورئیکو نو بویان۔ انوار وا لُو جواب نو کوری انگوٹی بغائے۔
جبین درون ماژینیو گنی پھولوکان بڑاڅھے ایغا انگیتی تھسو درے گنی گیتی، موخینو دواہتہ ریپھی کہاکان ڈئیہیکا پرائے۔ ہے موژی موٹرسائیکلو ہواز تو کارا پرائے۔ کہاک ڈئیہیکو سوم سف بڑاڅھین بیتی تو نسہ توریتانی۔ پھولوکان کہاکانتین درے ہتے نسہ ریپھی اسیتائے، انوار موبائلا لوا ݯوکاؤ یو نیستائے۔ ہرونیہ جبینو تتو عمرو موش موٹرسائیکلو انگیتی ژویو ٹیکا ریپھیتائے۔
انوار ݯھیترو موژتو ایہہ نیسی ژویا پھار نیسی موٹر سائیکلو اَچو نیشی ہتے موشو سُم بیتی بغائے۔ جبین کہاکان بڑاڅھے دُوری گیتی تاؤ پیڅھیتائے۔ ہرونیہ تو نان دی شالار ہائے۔ ݯھیرو ݰیݯئے گونجی لکھی گیتی جبینوت اَنگار کوریکا پرائے۔ جبینو نان ریتائے 'مہ ژوریئے تہ تت گُور ہوئے، سے کوئے بغائے' ریکو جبین ریتائے' تت گوئے لہ نان، تان ژاؤو سوم ہردی شانے، چھوئین کاسیرن، انوسی لوڑیکو نوغ موبائل ہوستہ بویان، تیتان کورار انگویان، ہوسار کیاوت بشار کھیوت نو کومیان؟ پسہ ہردی کیچہ نو شانیران، جوش ݯھوئے سالہ ڈق نہ کیہ کوروم کویان، نہ مہ غریب تتو سوم پیسہ شینی ہݰ کی بوئے ریمی اسپہ ہوتے گانیتام رے۔ باشار کی نو اریتامی کورا ݯھوغی کوری پسہ بے عزت کوئے، څیق ڈق کا ہو اوشوپے ہو ݯاکے غلط کوروم کوریک گران نو۔
ہنیسن اوا تو لوڑیتام، تتو عمرو موشو سُم بیتی بغائے۔ ہیہ شامو وختہ، بھائی جان رے کوس ٹیلیفون ہائے ۔ مہ خیالہ اسپہ دیہو کا اسور رے اسیتام، ہسے کا نوژان زارو موش۔' ریکو تو نان موخو دیش کوری' بس کو لہ مہ ژور یہ اذانو وختہ شوم لُوان کیچہ تان اپاکی انگوسان۔ کھیوت ݯھوغی کویان مہ ژاؤ، اَف تھوئے۔ کولانو ڈق ہسے چھویو کی کوسیتائے دی، عورت ژور بیروا ہردی شانیسام۔ مہ ژاؤ تان ملگیریان سُم بیر دی کیانی بوئے۔ تو اوچے تہ تت ای ݰئیلی کوری تو سوم لو نو دومیان، ہمیش تھون بومیان۔ څیقو سُم رخمو سورا لو دونی، پیسہ جنجال کوراؤ مہ ژاؤ دورار ہردی چیھن اریتامی ' رے جبینوت تھون ہوئے۔
جبینو تت ادراخار گیتی ہوست نیگیکوت اوغ مݰکیتائے۔ جبینو نن ٹیکہ گیتی مشاربو اوغ درے توت پرائے۔ وا ای مشاربو اوغ درے تان نمیژوت ہوست نگیکو بغائے۔ جبین تاؤو ایہہ نے بیندی ماژیتائے۔ اذان ریتانی۔ جبینو نن گیتی نیمیژینی نخہ نیمیژ اریر وا تو تت دی بی انگوٹی نمیژ اریر۔ بوتو ݰاپیکو موژی جبینو تت بشار اریر ' انوار کوئے بی اسور؟' ریکو جبین ہے انوسو برو واقعو پورا تن تتوت لو پرائے۔ جبینو تت انواروت ٹیلیفون کوریکو انوار ٹیلیفونو نو اوسنیتائے۔جبینو تت ݰاپیک ژوتی دسترخوانو ایہہ بڑاچھے نیݰی نیسییتائے۔
جبین اوچے تو نن، جبینو تتوت غیچ کوری نو پوری اسیتانی۔ جبینو نن غیچھان ٹی ویا دیتی موژو دیاؤ ݰاؤکان لوڑاؤ ژراپ کویان، وا جبین ٹی ویا ہے روئے کیاغ رینیان رے تن ننوت کھوارا ترجمہ کوراؤ لو دویان۔ ہے موژی جبینو تت وا دیہو ای کمہ تت گینی وا برار گینی ای بیتی ہانی۔ سلام بشار احوال کوری لیکچرر برار ریتائے 'برارو نن پھوک انگار کو اوچھے ہوست کٹر ارینی۔ وا پیݯ اوغ کی شیر مت دیت، گولئیو ژیبیکو روخڅیرو بیرتام'۔ انگار دوپھے اوشوئے ، جبین منقلو ڈکنو ایہہ نے قونو پھاری ییری کوری، شومو بی څھوکو ایی گنی تیتانتے څھوک دیتی انگار اریر۔ جبینو تت برداشت کوریکو نو بیتی اشرو نے کیڑاؤ ریتائے 'موݰ تان سورمو پھولوکو کوس غاری اریتام، توت کھیو تت بیرو بیریتام ، تو حقہ بیردو بیریتام نا'۔ جبینو نن ورختا بیتی کیڑی ژیرغئے بشار اریر'اے مہ دوردانو کان مت لو دیت کی، کیی معاملہ ہوئے، مہ ژاؤ کیانی ہوئے ؟' لیکچرر برار جبینو ننو مخاطب کوری لو دیک شروغیتائے' اے نان ہیش کیہ معاملہ نو بیتی شیر۔ پسہ پریشان نو بور۔ اسپہ ہنیسے بیسیان، انوارو گنی گوسی، اوا تھیسو انوارو سُم لو پھیرتام۔' رے ہتیتان دلاسہ پرائے۔ 'اے مہ ژانو ځاہی ہݰ را کی، تہ دادا اسپہ ژانو نیتائے، مہ خیالہ مہ ژاؤ کیانی بیرو بیرائے رے۔' ہتے برار ریتائے ' نو لہ نان پریشان نو بور۔ دادا ، ہیہ جو مس پروشٹی پشاورا ہوٹلا ای پھوک ݯھتراری ژاؤو لاش ملاؤ بیتی اوشوئے، ٹی ویا دی گیتی اوشوئے ، لوڑیرو بومی، ہتوت دونی بوختی اسیتائے۔ بدقسمتیو لو اسپہ معاشرہ ایگان بو شُم کوروم عام بیتی شینی، ہتیتن باریہ پِیساتے پتہ بیک ضروری کوریکو کی ہموغار اچھوت اختیاط کومی۔ برار گنیک رے ای لہازی اسپہ ݯھترارو ایگان کولانان موژا شیر۔ ہمیت انواروغون څیڅیق ڈاقانانتے پیسہ وا قیمتی تحفہ؛ موبائل، موٹرسائیکل وا خور ہَݰ اشناریان بُوینت دیتی ہتیتان سُم غیر اخلاقی وا جنسی تعلقہ بہچونیان۔ ہے څیڅیقانتے وخت دیتی وا کیہ قسمہ اشناری کی ہیت مݰکینیان، ہیتانتے دیاؤ انگیاؤ ہیتان تان سُم ݯاکینیان۔ تان وامن موڑتو بینیان، مگم ہے څیڅیق کیاغ کی مݰکیتانی ہیتانتے پیدا کونیان۔ ہتیغین دیتی ہے څیڅیق ہیتان تانتے ݰوئے جݰونیان، بیکو ہیتان بچے ہے معصومانان سُم کیاغ دی کی کوریک مݰکینیان کوریک مشکل نو بویان؛ ہیتان شراب پئیاؤ، نشہ کوراؤ غیژی کمرین وا ہوٹلین الاؤ ہیتان سم شُومی کونیان، ہتے ہوٹلہ کوس لاشو لے اسیتانی رے ذکر کوریتام، ہتے پھوکو سُم دی ہݰ واقعہ تان بیرو برائے۔ ہسے جوش جو سالہ برائے۔ وا ای درندہ تان جنسی خواہشاتان پورا کوریکو بچین تان نشہ بیتی ہتو دی نشہ کوری ہتو سوم ہݰ نا زیبا وا ظالمانہ حرکتان کوری اسور کی ہتے معصومو ہولولو وجود برداشت کوریکو نو بیتی تو ژان ایہہ نیسی شیر۔ مہ برار،جُمہ خانوت پتہ بیرائے کا انوارو برار گانی اسور رے، مگم ہوت علم نو شیرائے ہیہ برار گنیک اصلہ کیہ اشناری رے، ہوت پتہ نو بیرائے ہموݰ روئے برارو نامو دیتی کھوشت التی ہے چیچیقان ݱار ٹھورنیان رے۔
خدایو سُم شکر وا دی ݰاؤ اسپت پتہ ہوئے۔ انوار کی دُوروت ہائے تو سُم قہری نو بور، ہسے بو کم عمر، بالغ تان نما بوئے، ہتو گَناسو پھولوکو بہکی دی غلطی نکی۔ ایگان جم ہوݰ کوراک برار گینی مہ نسہ ہݰ دی رے اسونی کی ہے څیڅیق دی تان خوشانیہ ہݰ کورما ملوث بونیان۔ اے برار ہے عمرو پھوک ڈقوت دنیو کیہ پتہ، کیہ اشناری جم کیاغ شُم رے توت کیہ پتہ۔ ہتو کیہ ویلٹی کی الین ہوئے ہتی بیر وا ہتے پونو مسافر ساؤز بوئے۔ ہیہ اسپہ معاشرو بو لوٹ مسئلہ۔ کیہ څیڅیق کی ہݰ حیوانان اݰکار بونیان ہیتان پورا زندگی ہے لو ہردیہ بہچوران،کی ہیتان پاک وجودہ تن درندگیوغلاظتو ݯاکے اسور رے ، ہے وجہین ہیت تان تان سار دیݯھونیان وا کیاوت کیاوت خودکشیو ویلٹی دی بینیان۔ ہیغار علاوہ پیسہ اوچے خور اشناریان بچے ہے کولانان ٹیکہ اعتبار کوری، بیشیر سالار توری نیسی ہوشہ گیکہ پت ہیتان تان موژا کوروم کوریکو صلاحیت ختم بیرو بویان، وا زندگی ہیتان بچے مشکل بویان۔ وا پھتی څیڅیق ہے کورمو عادی بونیان، وا عمرا لوٹ بیتی خور څیڅیقان سُم دی ہݰ غلط کورمان کونیان۔۔'۔
ہے موژی لیکچرر براروت ٹیلیفون گیکو ݰاؤ گولئو اپاکی پیچھی اوغو ہتے سوری ٹھوری نیݰی نیسیتائے وا ہے کولانو سف تو اچتو نیݰی نیسیتانی۔ ہے چھویو انوارو دورو روئے اوچے تو دیہو برار گینی تو مݰکی کوسیتانی۔ ہݰ بیتی روشتی پستہ دیکوت گیکو انوارو لے الانی۔ انوارو غیچ ایھ نو باؤ اوشونی، نشہ اسیتائے وا اُلٹی کوری تو زپ دی خراب بیتی اوشونی۔ وا ہردیار نو نے ہمی لووان دیاؤ اوشوئے ' تو خور برار کھیوت گانیتاؤ، اوا تہ ہر لووا بومن، مہ سُم کیاغ کی کوراؤ اوشو تہ لاکاؤشتام، ہنیسن دوری دی مہ سُم جنجال تان کونیان، اوا کیچہ بوم' رے خڑیکھاؤ اوراری بغائے۔
پیشکش: #مئیرݯھترار
#شہانہ عزیز
Linguistics
کولانو ڈاق
Iltaf Hani
June 7, 2026
0