وے نامو نمبر

وے نامو نمبر نیویشاک: فریدہ سلطانہ فَری ای موژی منقالو نشیی اسیتام مہ موبائلہ کال ہایے۔ یی گنی لوڑیتام کی نمبرمہ سوم نوشیرو، موبائلو پھارو لکھیتام . مہ پھوک ژاو مہ نسہ اَسیتائے، ہے نمبرار تان وا کال گیکو مہ ژاو ریتاے ....نان اۡوسناویلا یا متین دیت اوا لودوم ،خبار بیکو کا ضروری بوے ،بوکا ل اریر وا.کال ریکو ای لو مہ یادی ہائے۔ اسپہ چھتراری عموماً ہار اِی جدیدٹیکنالوجی یاسَہولتو منفی معنہ استعمال کوری جام لت ژوتی تھے ہو فائدو بݰ استعمالو بارا دونیسی۔ اَولا کیہ وخت کی موبائل ہائے،سیم کارڈ ہار ای دوکانہ عام ملاو باوشونی ہےسیِمان گنی رویان سوم لوٹ لوٹ گیم ہونی، وا عوراتان دی کافی مشکلاتان سوم دۡوچھار ہونی ، کیہ وخت کی سِیم قانونی طورا رجسٹرڈ ہونی تھے ہے واقعات پھوک کم ہونی ، جۡوو کیہ وخت کی انٹرنیٹ عام بیتی نیٹ پکیجز سستہ ہونی ۔تھےفلم دڑامہ وا گیمان سلسلہ شروغ ہونی ہے برونہ، ہیہ برونہ، ہے گوݯہ ہیہ گوݮہ نیشی سف ݮیق سہ لوٹۡو موبائل چونگیکا پرانی ،ہے ہانی تان نو فیس بۡکہ فیک ائی ڈی کومورو نامہ ساوزئے، عورتانان سوم ہراسمنٹو ، وا بلیک میلیلنگو وقعات دی عام ہونی. ہیہ وجہین رویان دۡور دی برباد ہونی.کوس دی گمانہ ہیہ لۡو نو ہائے کی گیمزیوٹیوب،فیس بکو زریعہ اسپہ وقتو ضیاع،کوس عِزتہ دخل دیک وا دݰمنی نزیکار علاوہ کمائی دی کوریکو بوسی رے، مگر اسپہ نست نقضانو رہا بیکو بچین شوت چھوئی اسوسی. پھوک مودا پروشٹی اوا ای اَفیشل فیلڈاچتھرارو ای دیہا بغاتام ،مہ ہتیرا تیس نوجۡوانان سوم لائف سکلیلو بارا سیشن گنیلیک اوشوے،ہتیرا بغاتام کی ٹھوک پونچ نفری اسونی ،ہتے اَرگینازیروسار بشار گنیکو ریتائے کی اے مہ کائےہیہ دیہا اَنوسو جۡوانان نولیس، ہمیت چھویو پب جی فِری فائر کونی وا انوسو پرینی، متین سخت تعجۡب سریتائے. ای خور مثال دوم کیہ وخت کی ارٹیفشل انٹیلجنسو یعنی اے ائو دَور ہائے تھے اسپتین مزید نست نسیتائے۔ کوسوم کی زاَتیت یا دۡݰمنی اوشوئے ہتو گوردوغو،موکوڑو ،وا کوس رینیو شکلہ کوری زاتی وا سیاسی انتقام گنیک یا کورا کومورو تصویر کی ہوستی ہائے ہتو ایڈیٹ کوری بے پردہ کوری سوشل میڈیا اپلوڈ کوریکو اوچے بلیک میلینگو سلسلہ دی شروغ ہوئے اور خور روئے ہے سہولتو اوچے ٹیکنیکو استعمال کوری پیسوموژو ہونی اسپہ ساو روپیہ نیٹ پکچ کوری رویان سوم ہش شومی کوریکا پھریتام...تان دی بےروزگار وا ذہنی مریض و خوران دی ذہنی ازیتہ مبتلا. ہے لو ہیرا شار ہے قِصو خۡور کیہ وقت کوروسی ۔ متین کال گیتی اوشوئے اوا بیݰ نمبار جوݰی نواۡوسنیتام پھوک دوری مہ وٹسپہ ا ی زنانہ وائس مسیچ ہائے ،کائے کالو اۡوسناو کی اوا بو تکلیفہ اسوم . اوا ہے نمبرا کال بیک اَریتام ،مہ اوچے ہتو ہموش لو ہوئے اوا : تو کا اسو س ا ے ژان ہسے :اتو فَری کائے اسوس نا؟ اوا: دی لا ژان ہسے :ہائے کائے اوا فلانی اسوم، اوا سخت پریشان اسوم ،تان سورو ماریکا توری اسوم( ہش رے کیڑیک شروغ اریر ،ہتو پھیکے نارمل بیکار اچی ) ہسے :ہاے کائے، مہ کم بختی، مہ اوچے ای نفریو موژی ۵ سال رابطہ اوشوئے، مہ عام پیٹیک پوردی تصویردی ہتوسوم اوشونی، مگر ہنیسن نہ مہ الویان اور اولٹہ مہ ہتے تصویران کورا فلمی کومورانان جسمو سوم ݯاکیئے، بے پردہ کوری مہ بلیک میل کویان.ای انوس تیس ہزار روپیہ مشکیکو اوا انزیکو نو ہوتام ،ہتے سوم مہ تصویرو ہش کوری مہ دادوتین انزیتائے، دوری مہ دیتی زخمی اَرینی مہ نان مہ نہ بہیل اریر۔ اوا کایو دورا گیتی اسوم،تصویرا کورا بیریو ملکو ژغہ شیر ہیس اوا نو ریکو دی نہ مہ دادا مانیران نہ مہ نان. مہ شیرین کائے،متین کیاغ کولا ،کی نوبویان اوا خودکشی کومان۔ وا کیہ راہ نیکی مہ سوم۔ ہیہ کیس حل ہوئے، اللو ناموسوم شکر .صرف اصلاحو او چےسبق گنیکونیتہ اوا ہمو شییر اَریتام تاکہ ۡور روئے ہموغاری سبق گنینی. مگر مہ سوال ہیہ کی ہیا قصور وار کا؟ ہے ڈاقہ ،کی ہیس ای جدید ٹیکنالوجیو غلط استعمال کوری کوس اژیلیو ہݰ بلیک میل اریر یا ہے نان تت کی تان ژورتین ہݰ ماحول دیکو نو ہونی کی ہیس بیری محبت و اعتماد مݰکیتائے یا ہے ژور کی ہیس نان تتان پیڅھی ای اجنبیو سورا بھروسہ اریر؟؟؟ پیش کش:#مئِر ݯھترار