راحتی ݯھوئی

راحتی گیتی شیر مگم ݯھوئیی گاری نوما بیر نیویشاک: احتشام الرّحمٰن مہ ای کما خوش قسمتیان موژار ای ہیہ دی کی ݰئیلی محفل نصیب بیتی شینی۔ خاص کوری ڈاکٹر عنایت اللہ فیضی صاحب اوچے استاد الاساتذہ مولائی جان صاحبو محفل۔ ماڈل کالج شرانہ نیشی مشقولگی کونی وا ہیتانتے کار کوریکو آرمان چھییاوتائے۔ ای دفعہ قدیم زمانو دراغانݮیو لوؤ دیتی وا ہتے ٹیمہ کیہ حالات اوشونی رے لو دیتی ڈاکٹر صاحب ریر کی پروشٹیو دورہ زاغ یا دون بوئے۔ ہورو زاہو ہوݯ کوراوا چمچ گنی یا کوتیر گنی چھینینی نو بلکہ تاؤتو کھاݰھینی۔ مطلب ہانی مادیری کوریک بیرائے۔ ہے قسمہ تان انگار کوریکو بچین ماچس نو بلکہ پوراوا انگارو دوپھئیک تاکہ چھوچی وے انگارو بین نو بائے۔ پرانو وختو لووان دیتی وا موجودہ دوروسم موازنہ کوری مولائی جان صاحب ہیہ دورو اسقانیان ذکرو کوری ای قصہ اریر۔ دورو ݰپیک مہ ژاؤو بو خوش۔ اوا ہیا تن ژورو ݯاکے پاچے گنی اسلام آبادوتے اوئیتام۔ ہاتیرا بی لوڑیتم کی ہتے چاپوتی ایشلاک۔ اوا ژوروتے کال کوری ریم کی "اے ژور ہے ݰاپیک ایشلاک بیرائے وا "ریکو ژور ریتائے کی "اے دادا خمیرا نو شیرائے۔ اے ژور "سے کیاغ ریکو میاہ ریتائے۔ اے ژور میاہ دوری بوئے وا" ریکو ژور ریتائے کی "نو اے دادا ہنیسے کا میاہ پیڅھی ݰپیک کویان۔ سف بازاری میاہ گانینیان" ریکو مولائی جان صاحب مذاق کوری ریرو کی "شاباش مہ ژور مہ دورو میاہو چھینیورو بیراتمی۔" زمین ہتے ٹیمہ دی شاؤتانی وا روئے دی کم اوشونی۔ مگم ݯھوئیی بو اوشوئے۔ قدیم زمانہ بریک دوریہ دُعوتے بیکو ای وجہ ہیہ دی اوشوئے کی پون غوس بوغاوا یا گیاوا ݰپیک بندے ژیباؤ بیرانی۔ ہے قسمہ تان اختیئن ݰپیک ای کوس ݯھارہ نصیب باک بیرائے۔ ہنیسے خدائیی ݰپیکو ژیباک لین نو بویان۔ ہدایت صاحب ران کی پروشٹو روئے بو درونگار کوساک۔ دستیاب دستاویزاتن مطابقہ بو درونگار کوسی اشٹوک لوڑاؤ بوغاک بیرانی۔ ہدایتو خیال ہݰ بیرائے کی قدیم ݯھترارو روئے جسمانی طورہ بو مضبوط رے۔ تاہم، ہدایت صاحبو مطابقہ ہے درونگار کوسی اشٹوک لوڑاو بیکو ای لوٹ وجہ ہیرا ہیا بی ݰپیک ژیبیک بیرائے۔ ہیہ ݯھوئیو حالات ہنیسے دی ݯھتراریان لیئہ شینی۔ مثلا، ہنیسے دی ݰپیک دیکو تے بو اہمیت دیونو بوئے۔ ای موش کوس مینو بیتی شہرو کی بغائے جام امبوخ پیسہ دیتی ݰپیک ہتوتے کی پرائے تانتے فخر جݰور۔ ہے مقابلا کی ای جوڑا زاپ ہوروتے گنیتائے یا پیسہ ہوروتے پرائے شوم جوݰونو بوئے. حالانکہ ہوروتے ݰپیکو سار زیادہ زاپو ضرورت بوئے۔ ہے قسمہ تان ای لہازو پوشاؤ بوغاوا ݰپیک کوری یا میوہ گنی بیکو جم جوݰونو بوئے۔ حالانکہ ہے ݰپیک ضائع بونی وا ضرورت دی پیسہ بوئے۔ تاہم ہورو تان سوم توہین جوݰونو بوئے۔ ای خور پہلو دی شیر ہسے ہیہ کی ݯھتراری کوروم کوریکو تان سوم توہین جاݰونی۔ خاص کوری پیسو بچین مزدوری کا نو تان کونی۔ مگم، یاردوئیہ بی کوروم کونی وا ݰپیکہ موشو څاکے برانو کوݰے ژوتی گونی۔ یار دویو کوراک پیسو بچین مزدور نو لے یار دویو کوئے باوجود ہیس کی ہے یار دوئیہ ہورو زیادہ نقصان بویان۔ ہیہ ای معاشرتی مسئلہ۔ پیسو بچین کوروم نو کونی مگم خویانو ٹیپئیکو بچین کوروم کونی۔ ای ٹیم پروفیسر ممتاز صاحب ای پوسٹ اریر کی ہنون زمانہ کورہ سیلوتے بیکو مقصد کیاغ کوݰی ݰپیک ژیبیک بیتی شیر۔ ہے وجہین دیتی ژاغان ایکسپلور کوریک، ہے ژاغو باریہ معلومات گنیک وا قدرتی مناظران مزو گنیک ختم بیتی شیر۔ ہیغار دی ای لوٹ پہلو ہیہ کی ہے ݰئیلی ژاغین بوغاؤ ݰپیک پاچے ژاغان برباد کونیان۔ ہے ژاغو فوٹوان دیکو ژاغہ ہیرا بی دی ݰپیکو فوٹوان فیس بکہ دیتی ہتے سورہ لوٹ فخر کورونو بویان۔ لو دیکو مقصد ہیہ کی قدیم زمانہ بو تنگی وا دراغانݮی بیرائے۔ ہنیسے بو راحتی بیتی شیر۔ کھوار متال شیر نا کی "خویانو اختی مگم غیچ ݯھوئے" رے۔ ہے قسمہ تان اسپہ ݯھترایان لئیہ ݯھوئیو اثرات ہنیسے دی شینی۔ راحتی پوشی دی ہیغار نیسیکو تاپ نیکی۔ ہمیت معاشرتی مسائل۔ ہیہ سورہ لو دیکو ضرورت شیر۔ کیچہ کی جام ݯیݯھور، چانگور نو، کوس دھوکہ نو دیور رے تعلیم دیونو بویان, ہموش مسائلان سورہ دی گیاک نسلو تے 'روشت استاری' نامین ہے نصابہ ژاغہ دیتی تعلیم دیکو ضرورت شیر۔ نہ کہ بقول نور شمس الدین صاحب "دوبارہ ٹائر ایجاد کوری څیڅیقان سورہ بوجھ پیݯھیکو۔ کردار سازیو سار زیادہ ذہن سازیو ضرورت شیر۔ کردار سازیو بچین مواد آلریڈی نصابہ شیر۔ معاشرتی وا جغرافیائی حالاتانتے لوڑی ضرورتو مطابقہ ذہن سازی کوری وختو چیلنجزانتے تیارئیکو ضرورت شیر۔ پیش کش: #مئیرݯھترار