کٹاہیڑ گرگٹ وا ٹیکی کھونگیر بوتیرو

کٹاہیڑ ، گرگٹ وا ٹیکی کھونگیر بوتیرو فرید احمد رضا رینو بویان کی تاریخ ماضیو غیرجانبدارانہ ریکارڈ۔ کیہ قسمہ کی ریکارڈ ساؤزین ہوئے ہیس ہݰ نیویشونو بوئے وا گیاک زمانہ ہیس بدل نوبوئے، کی بدل ہوئے خیانت جوݰونو بوئے۔ ہنونو سرگرمی وا کردار چھوچھو بچین تاریخ۔کیہ کوروم،کیہ کردار شوم یا جم، ہیت نیویشونوبونی۔ کیچہ کی ہنیسے اسپہ سیاسی لوٹھوروان تان کورمان اوچے کرداران صورتہ اسپہ پروشٹہ اسونی،ہیت سف ہیتان نامہ نیویشونو بونیان۔گیاک وختہ ہرین لوڑیروغون ہمی کوروم وا کردار روشت بیتی کتابی شکلہ پروشٹہ گونی۔ دی لا کیچہ نیویشونو نوبونیان۔ ہیہ کٹاہیڑ گیکار اچی سف ݯھتراری تھیش مݰکاک بیتی اسونی۔مگم سفو مݰکیکو انداز جدا۔کا پھوک پلیٹہ بسکٹ پیڅھی ، کا گوڑو ہار دریئے، ، کا راہو بچین،کا مدرسو نامو گنی، کا ژویو پاشیئے، وا عبادت خانو پروشٹہ لکھی ،کا ژورو لوق پردوئے، وا کا یوغیریرو دورو پاشیئے،مگم مݰکینیان سف ، نیت سفان ای ۔۔۔۔۔۔۔۔۔۔۔۔۔۔۔۔۔۔۔ دی لا تھے کٹاہیڑ گیکار پروشٹی مہ خیالہ ݯھترارو روئے بو خودار راؤ ٔ اوشوتام، ہمیت تھیش نو مݰکینی،ݯھوغی نوکونی، روڈا روپھی کوس پروشٹی ہوست نو بیلنجینی ،تان حالتو سورا شکر کوری قناعتو سورا زندگی شاخڅینی ، ۔مہ ژانہ ہیہ لو اوشوئے کی ݯھترارا حال باک زیاد رویان تعلق معاشی طورا درمیانی طبقو سوم شیر،ہمیت نہ بو غریب وا نہ امیر۔سفان تان دور شینی،پھوک زمینو نس کیݰیکوتین دی ، اکژیتی روئے سالو پونج ݯھوئے مسو ژیباروم تان ݯیھترو فصلو سورا گنینی۔ میوہ،شاخ وغیرہ کیہ نو کیہ شکلہ پھوک وختو بچین صحیح، مگم بونی۔ اوا ہمو ای وجہ جوݰاؤ اوشوتام کی ہمیت تان زندگیہ خودار وا قناعت پسند ۔ مگم کیہ وت کی ہے کٹاہیڑ افار گیتی اسور وا ہائی ای کمہ ڑانڈا ہور ہوسوم جوست بیتی اسونی ،دجلو اجتوݯوکیکو کورا روایاتان کارکوری اسیتام ،مگم ہتو عملی مظاہرہ ہائی پوشین ہوئے۔ ہتے خوداریو تاثر بالکل ختم بیتی شیر وا متین ہݰ ساریران کی اسپہ ہیہ خوداری نودیکو نومݰکیک بیرائے۔ دی لا تہ لو صحیح، مگم لوٹ بدقسمتیو لو ہیہ کی ݯھتراریان ہموݰ قسمہ بے قدر وا بے وقعت کوریکا ہتے روئے شامل کی ہتیتان کردار معاشرہ خودیو اوچے عزت نفسو خیالو لکھی ای ݰئیلی معاشرہ تشکیل دیک شیر۔ مہ مطلب اولانو ݯھتراریان بے وقعت کوریکہ وا شوم ݯھیݯھیکا لوٹ ہوست اسپہ معاشرو گرگٹ صاحبانان شیر۔ کی ہیت تان سیاستو یا ذاتی مفادو بچین ہے کٹاہیڑٔوتین معاشرہ ہانی ژاغا پرانی کی ہیس ہاݰ جوݰیتائے کی ݯھترارتو سف اشناری واغہ پوری شینی،مثالو طورا ہوتین اشپیری کوریکو دی اولانیتی پلیٹہ مٹائیان لوڑی ہتے پیسو دویان، اچہ ہے نفریو لوؤ کارکویان۔ہومطلب ہݰ کی ہوتین کاکی اشپیری کویان،ہسے دی پیسہ مݰکاک۔ دی لا ، ہنیسے ہے کٹاہیڑ گرگٹ صاحبانان پیڅھی ٹیکی کھورنگیر بوتیران سوم شامل بیتی اسور۔ہیت دی ہو سوم کیہ کوئی نو بیچھینیان، مگم ہمی مقامی ٹیکی کھونگیر بوتیران حیثیت ہانی تان، کندوری کی ہو پروشٹہ گرگٹان اوشوئے۔ ٹیکی کھونگیر بوتیران بے وقعت بیکو ای مثال ہیہ کی ہمیت پھوک پروشٹی ہائی باک براموݰیوبچین نفریو ضرورت بیکو تان کارندان سار امیدوار بیکو درخواست مݰکاؤ اوشونی ، کٹاہیڑ مرکزا ہے براموݰیو امیدواریو تان ژاؤنامہ کوری ہار گوڑو دریئے نیشتائے۔ہمیتان سوم لودیکو دی عار اریر۔ دی لا ،مہ دی ریکو مطلب ہیہ کٹاہیڑ کندوری کی ݯھترارو گرگٹان بے وقعت اریر ، بلکہ ہموݰ ریک بہتر بوئے کی ہوبچین کندوری کی گرگٹ تان سورو بے وقعت ارینی ، ݯھترارو تاریخہ کیہ وت دی کا نوبیتی اسونی۔بیکو گیاک وختان سورا ہمی ٹیکی کھونگیر بوتیرو دی ہاݰ تان بونی۔ صحیح لو دوسان ،پروشٹی گرگٹ وا اچی ٹیکی کھونگیر بوتیرو ہوسوم بیتی کیہ کردار کی کونیان ہو ژانہ ہیہ لونیشی شیر کی ݯھتراریان غیرت،خودی حتی کہ ایمانو دی جیپو ہوست التی کرینین بوئے۔ ہیس کوسوم دی ہمدرد نو،وا نا مخلص، ہیس صرف پیسہ دیتی ہیتان ذریعہ تانتین حمایتی بڑاڅیکوموژی اسور۔دی بیشتائے ݯھترارو رویان ضرورت، غریبی،محتاجی، بے روزگاری، کیہ ہمی مسائل ہیہ پونج سالو موژی سورا نیستانیہ نو ہمیت پروشٹی دی اوشونی۔ دی لا تھے اسپہ کیہ ریسی صرف ای کمہ بوس موخی ݯھتراری تان ضرورتو دفعہ کوریکو بچین ݯھترارو معاشرو بے وقعت ارینی وا قومی شناختو نیلام،ہیہ اسپہ سفوبچین دونیکو بݰ لو۔ ایئے دی لا، لو بوشینی مگم اوا ہے انوسو انتظار اسوم کی گیاک وختان سورا کٹاہیڑ ٹیکی کھونگیر بوتیران وݰکیاری مقابلوتین پروشٹہ کی پرائے، گرگٹ کیہ لوؤ سورا وا کیاغ ریئے ہو مخالفتو کونی، وا ہیغار دی مزو لو ہیہ کی کیہ لوان ٹیکی کھونگیر بوتیرو پروشٹی ہوتین دیاؤ اوشونی ہتیت کیہ موخو گنی ہو اشتکھینی۔ دی لا ہمیت تاریخہ نیویشیکو بݰ لو ، ،ݯھترارو تاریخہ کٹاہیڑ ،گرگٹ اوچے ٹیکی کھونگیر بوتیرو وا ہیتان ملیگریان کیہ مقام بوئے،ہیس تاریخو فیصلہ وا اچھو لو۔ ہیہ مشقولگی ناسی نو نیسی اوشوئے ساحلو ہیہ شعر مہ یادی گیتی خیال کوئے غیری باغائے۔ مہ کانانتین راہ پیشیلیک کاروٹان سوم لو دئیلییک تہ صرف غرور کوریلیک مہ بو مجبوری شینی پیش کش:#مئیر ݯھترار