شادی مبارک

مبارک ہو تم کو یہ شادی بلکہ اب یہ بے بی تمہاری!!! نیویشاک: فرید احمد رضا ہو سوم غائبانہ تعلق فیس بکہ ہو نیویشیران لوڑی بیتی اوشوئے، ہیس نیویشیر نو فقط زار ݯھارئیر۔ اچہ ای وخت ہݰ ہوئے کی ݯھترارا ای میڈیکل سینٹرو کیہ کورمہ بی اسیتام فیس بکو ہیہ ملگیری ہتوغیچی ہائے۔ لیچالیچ بدن، ڈیکان سورا برداشتاری زیاد وزنو زور، بے وضع ڈریس ۔ ہمو لوڑی متین ہتے نیویشرو ہمو نو سارئیتانی، کیہ خبر اوا شاید ہتے نیویشیران سار متاثر بیتی تان ذہنہ نیویشاکو البت الگ خاکہ ساؤزئے اسیتام۔ اچی دونی ہو کریمو چوڑائی اوچے گردانو قڑیچو سوم مہ کیہ کوروم، ہو نیویشکہ مزہ شیر رے تان سورو تیہا پھریتام۔ ہتے وختہ ہو نسہ نوبی "خالی دیدار کوروم ٹچ نو کوروم رے " راہی اریتام ۔خیر تھے ہݰ بیتی اچی ای ملگریو وساطتہ ہوسوم ملاؤ دی ہوتام ،مگم ہو برادریو اوچے وا ای ڈیپارٹمنٹ والان سوم دوستی کیہ اعتبارو بݰ نو رے، بوختونیہ تان ہے تعلق ہیغار پروشٹی نوباغائے مگم الیک سالیک برقرار بہچیتائے۔ ای انوس مسنجرا تان شادی کارڈو انزیئے ریر کی اوا دی بوک گنیمان ۔ ہو ہے جملو لوڑی اللہ جنت نصیب کورار "شیرین زادہ مرحوم"مہ یادی ہائے۔ہسے اڑغانی اوشوئے مگم ہموݰ کھوار کوراؤ اوتائے۔خیر تھے ایڈوانس ممبارکی اریتام وا کوشش کوم رے کیہ خاص وعدہ دی نو اریتام۔ ای کمہ بس اچہ مہ ای گروپہ ایڈ کورونو ہوئے،گروپو ٹائٹلو دیک کیہ ضروری نو چاݰومان،کوریکو کی کیہ لوا قہرگوئے۔ گروپو ہیہ لوؤ دیونو ہوئے کی ملگیری اسپہ نامان گنی ارڈر کوری اسور کی پیسہ خوشانیوانوس نو، ہتیغار اچی، ای انوسو تعین کوری ای بیتی گیور، مشقول بوسی وا ژاغا ژاناک دی،ہے گروپہ سف ݰوئے ملگیری اسیتانی ۔ ے دوستو شادیو دعوتاری پروشٹی تان ارمان اوشوئے کی اسپہ ہو غریب خانہ کی تشریف الوسی ،ہو ژاغو ژاناک بوسی وا ہے وختہ ہیس ای پایو قربانیو دی ارادو ظاہر کوری اسیتائے۔ کیہ وت کی اسپہ ہو دولت خانو ژاناک بیکو ارادو ظاہر اریتام ، تھے ہو بہانہ شروع ہونی۔ ہنون چھؤچی ریاونامہ نامہ کوری انگیکہ پرائے، کیہ وت پائےلحاظ اسونی، کیہ وت ہیہ موسمہ پائے غاریہ بونی وا کیہ وت پایو پوشور ہیہ وختہ زوالو نوبوئے وا کیہ وت ہیہ موسمہ پایو پوشور پیسہ ݯھامئیر ریئے تان چال والیو کوری گیاؤ اوشوئے،الغرض بہانہ دی ختم بیکو بیتی اوشونی۔ ہیہ وجہ اوشوئے کی شادیو ہیہ دعوتو دی ملگیری ہو ای چال جوݰینتانی۔ مگم مہ یقین اوشوئے کی شادیو خوشانیاری اچی، ہیس ہو أخری آزادانہ فیصلہ ہمو یقینان پورا کوئے۔ تھے ہݰ بیتی ملگریان ہیہ واٹس اپ گروپو بو زیاد غاؤغاؤ بیکاراچی فیصلہ ہوئے کی سف ای بیتی ای گاڑیہ ژاغا ژاناک باؤ بیسی۔ ہے انوس تقریباً نیوف نفری تیار ہونی، وا جوٹی لشٹہ بی پروفیسر ممتاز حسین صاحبو امیر دوسی راہی ہوتام۔ پونتو دنیاجہانو سورا نامکمل وا تفصیلی مشقولگی ہونی۔ای بس پروشٹی پروگرامو کنفرم کوریکو سوم جوستہ دی، اسپہ کندوری سالو ارمان حقیقتہ بدل بویان رے یقین نوباؤاوشوئے۔ ہݰ بیتی شیشی کوہ وادیہ داخل ہوتام ، اسپہ منزل بیرگہ اوشوئے۔ امیدو بیمو موژی ، روڈتو ایھ بوغاؤ اوشوتام کی ایھ ہتیرا غیچھین پوشیروغونی ای نفری روپھی اسور ،مگم قالبو خدوخال وا بیروغنی ہسے نو کوس کی اسپہ ژاناک اوشوتام۔دی ہیہ کیوالی اسور ریئے ،فرقئیکو نو بیتام، غیچھان ماژاو اوشوتام ، ہنیہ ہیس دی گیتی روڈا ہائے، وضع قطع پروشٹو ہسے نو۔ خوشانیار اچی سوت بس نو بیکاپت تان بندہ بوری بی اسور۔ اݰکامو دراک نکی، موخ دوغورا بہچی شیر مگم پروشٹوساری موخا نورو اثر زیاد،مطلب ادھا نورانی ریکو بوسی،شاید بازاری نورو اثر دی بوئے،مشقول بیتی اطمینان ہے سورا ہوئے کی خوشان اسور،پریشانی نیکی ۔تھے ہیرا بو ݰئیلی مشقولگی ہوئے،علاقو سیاسی،ثقافتی وا رسم رواجان باریہ اگاہی دی۔بیرگاہ گیکو اصل مقصد خوان و طعام دی ہتار افزوں، پوشورو کیہ نس نو اوشوئے، مگم مولانا فصل ودودو ای کٹک لو دونیکو بݰ اوشوئے، کی ہیہ موسمہ پائے دورا نوبونی وا پایو پوشور دی ویخال بوئے، کیہ پوشور کی اسپہ اویوتام ہسے بو زوالو اوشوئے۔ ہیہ انوسو محفلو سفوسار زیاد خال دیوکو وخت ہسے اوشوئے کی اسپہ دوست مینوانتین خوش آمدید ریئے نثری ادبو شاہکار نیویشی اسیتائے، فضل بھائی کیہ اندازہ کی ریتائے ہسے ہیغار دی ہردی ݯوکو نو اوشوئے، وا شپیک ژیبیکار اچی وخت دی ہے بچین بوسازگار اوشوئے ۔مگم ہیغار دی مزہ دار مولانا فضل ودودو گروپو بچین نغارہ یا لواریہ طعامو اغلان اوشوئے۔اسپہ ہمو دی دل بخوشی قبول اریتام وا ہمو اسپہ تان ہے دوستو سوم نیشیکو اثر جوݰیتام ۔ القصہ مختصر بو ملگیری ہنونو ہیہ دعوتہ طعامو دی گجرچال جوݰیتانی کی شادیو خوشانیو سوم جوستہ اسپہ پروشٹو ݰپیکو پروگرام دی پروزیتائے،وا پھوک شک پوشورو خالو سورا دی ہوئے۔مگم اوا ہیرا دی مطمئن اسوم کی گجر کیہ وت دی غلط بیانی نوکوئے۔ہنون کافی اچہ روداد نیویشیکو وجہ ہیہ ساوزہوئے کی بونیہ متین بیرگا شیشی کوہو ای ملیگری ملاؤ ہوئے وا ہسے مذاقو موژی گجرچالو زکرو کوریکو اسپہ ای پھولوک ملگیری مہ یادی ہائے۔أخرا دوستانان،ملگریان سوم خلوصو بچین تان ہے خوش ملگیری وا جملہ خاندانو بو شکریہ ۔ اللہ تہ گیاک زندگیو خوشانیاری ٹیپ کورار ،وا یاردوستانان سوم تہ محبت تاآیندم برقرار بہچار۔آمین نوٹ ہیہ نیویشیرو ہتےایاری جو بیکو وختو اوشوئے، مگم کوس ویریغی نو نیئے اسیتام ، پھوک پروشٹی اسپہ ہے دوست جواری تروئے بیتی روداد نیویشیکو ہتو لوڑی ہیہ مہ یادی گیتی صرف ہیہ امیدو سورا "ٹاٹیٹلو "بدل کوری پیسہ سوم باژیمان کی ہیس پھوکو ٹیکہ گیکو غیژی نوکوئے یقیناً تان خوشانیہ اسپہ دی شامل کوروئے رے۔ پیش کش: #مئیرݯھترار