کھوار سفر نامہ پڑاو 5

کھوار سفر نامہ: قزاقستانار گنی ازبکستانہ پت پونجو پڑاو: سَری شاغنآر گنی شُوا پت نیویشاک: نور شمس الدین اُف اے ژان ۔۔۔ جم ݱاق تروق چائے بیرائے۔ اورارو کوئے بغائے۔ ریل اچی راہی کوری شیر۔ ہیہ سُم شُو رے ہے اسٹیشنہ بی روپھوئے۔ بیری روشتی گیتی شیر۔ دودیری یور روشت باؤ گویان۔ چھویاری روشتی نیسیک زندگیو سلسلہ۔ ہے سلسلہ ریلار بیری چالو شیر۔ سری شاغنہ یو نیسی بیریو ہوا دی بدل باؤ گویاں۔ ہیہ نہ صرف کراگنڈہ صوبہ ختم بیتی زمبیل صوبہ شروع بویان بلکہ ہتے نیم شغور علاقہ لش لش باؤ اوݯ میدان غیراؤ گویان۔۔ ریل کندوری تیزیہ شو وادیو ویݰکی کی بیران ہانی زندگی درونگار باؤ گویان۔ ایہہ میدانو غون ہایو زندگیو عمر ای کما مس نو بلکہ پوار ای یوران ، وا یورانو ہر مسی زندگی مختلف۔ سری شاغنو ہے اسٹیشنہ مہ اورارو گیکو تروق چائیو بچین اف خومی اسیتم۔ مہ خیالہ کورا لوٹ اسٹیشنہ ہاتم اف خومی لاڑیم رے پساتے دامہ ناؤر راے اسیتام۔ ریل صرف بیشیر منٹو تے روپھویان رے متے پتہ اوشوئے ہتیعین تیزے اف خومی اسیتم ۔ مہ سار علاوہ بو کم روئے کا اف خومیتانی۔ ہتیت دی ہوا خوریو بچے۔ ای کما ژون پھارو ہیرا بی کافی گنیکو بچے لائنہ روپھیتانی۔ ای جو نن تت دی څیڅیقان گنی اف خومی آسیتانی مگر سراؤاوشوئے ہݰ کی ہیت څیڅیقان جہلار مجبور بیتی یو خومی اسونی کیہ خوشانیہ نو۔ ریلو اندرینی مسافران سف پوری اسیتانی وا ہے اسٹیشنہ دی کا ریلی نیشاک غیچی نو ہانی۔ ہے پھانو بہکی اسٹیشنہ دی ݰا ویلاغبیلو ݰا چائے ملاؤ ہوئے۔ ہمیت ہوتے کافی رینیان۔ نوغ نسلو قزاقن تروپ چائے ہیس۔ چائے دی پینیان ہسے دی زیادہ قہوہ یا ݰا چائے۔ بو کم کا ݯھیر چائے پینی۔ مگر میتان ݯھیر چائے اسپہ سار خور تروق چائیو لاچھے تہ پیالو درے ملک پیک تتے تارینی تن چیتہ ہو دیتی پیے رے۔ ہݰ چھیر چائے پیکو سر تروق چائے جوش جم رے سران۔ کافی ریکو مہ کیا خاص خوش نو اوشوئے ہیہ جو سال ہوئے عملی بیتی اسوم۔ عملی ہوتم رے تن اچی مہ یادی گویان کی مس اچا دوروت بوغیلیک۔ اورغوچانو ہتے ڈق کراچیار ایہہ بی چھییو جوش بجا زینگیر برگر مݰکیرو غون اوا زئیتہ بی کافی کی مݰکیتم مہ سُم کیہ سلوک بوئے۔ خائے تھے ہسے اچھو لو۔ ہیا ملاؤ باؤ اوشوئے بیکو څیق اپاکی بیتی امریکنو مت دیت رے ای پیالا کوری گنی نیوٹنوغون کھیو دی بارا دونیک شروغ اریتام۔ اسٹیشنو عمارتو لوڑی وا مسافران دراک و سراک نو بیکو یہ ویلاغبیلو یہ پھانو بھکی ژاغا بشیر منٹوتے کھیوتے روپھیک بیرائے؟ رے ریلو شیڈولو بارا دوناؤا "پالوغ یو دیرؤوغون" کھوڑی ویݰکی کیاغ ہواز اریر۔ پھار لوڑیتم کی ای څیق ہوستہ بوتھالین ٹھونی کوری دویان۔ جم لوڑیتم کی ہیس ای بورڈو ٹھون۔ ہتیرا بی ہانی ہوݰ اریتم کی قزاقی وارا اسٹیشنو بارا کیہ لوٹ داستان نیویشی شیر۔ موبائلو ایی نے ہیہ نیویشیرو متے ترجمہ کو ریکو سَری شاغنو اسٹیشنو بارا کافی معلومات ملاؤ ہونی۔ روسو میزائلان ساؤزیکو وا سہی ساؤز ہونیا نو رے پیݯھی لوڑیکو بارا کوستے کی پتہ ہتیتن کارا سَری شاغن نام خماخہ بوئے۔ سَری شاغنو ہے اسٹیشن قزاقستانو برابر موژا بیٹپاق ڈالا نامین شغورو نسہ ساؤزے شک بیرائے۔ ہے اسٹیشنو برکتہ نسین شہر آباد بی شک بیرانی ہتو نام سَری شاغن بیرائے۔ شہر کھیو لا قصبہ راکی۔ کُھل آبادی جوش ای ہزار۔ شہرو ای ویݰکی لوٹ چھت شک بیرائے۔ چھتو نام "لیک بلخاش" یعنی بلخاشو چھت۔ لیک بلخاش سنٹرل ایشیوسفن سر لوٹ چھت بیرائے۔ ہے چھتو کمال ہݰ بیرائے کی ہو مغربو ویݰکی اوغ صفا یعنی پیکو قابلہ مگر مشرقو ویݰکی اوغ سمندرو غون ݰور۔ چھتو درنگاری 506کلومیٹر بیرائے وا بیروغنی سفن سر باریکی ژاغا تروئے کلومیٹرار پھوک رو زیادہ وا سفن سر بیروغون ژاغہ چھور بشیر کلو میٹر۔ ہیہ چھتو مغربو ویݰکی انگیتی سَری شاغنو ریلوے اسٹیشن 1953 عیسیوا ساؤزے شک بیرائے۔ ہے اسٹیشنو ساؤزیکو وجہہ ہݰ بیرائے کی ہتے وختہ ہیہ ژاغا روس اینٹی بیلسٹک میزائلان ٹیسٹ کوراؤستائے۔ کی چانگیک بیرائے مہ ہم سفر یرسلانو گردانہ۔ یرسالان مہ سوم ہیہ ریلی اسور۔ ہمو لوان اچی پستے دوم۔ ہیہ ہݰ ران کی 1961 عیسیویہ ہیہ ژاغا انسانی تاریخہ اولو مرتبہ ہݰ تجربہ بیرو بیرائے کی ای ملک خور ملکو ویݰکی کوری میزائل کی پیڅھتائے ہتے ملک تہ میزایلین دُݰمنو میزائلو تن زمینہ توریکار پروشٹی ہوا کوری لت دیکو بیرو بیرائے۔ ہݰ قسمو میزائل ساؤزے وا ہتیتین تجربہ کوریکو بچے روس ہیہ سَری شاغنہ فوجی چھاونی ساؤزاؤ اسیتائے۔ چھاونی ساؤزاوا سامان انگیکو بچے ہیہ اسٹیشن ساوزینو بیرو بیرائے۔ سَری شاغنو معاملاتن اوروسو لوٹ سوری ہیہ نسہ پِریوزیرسک ( Priozersk) نامین ای شہرا ہال بیتی لوڑاؤ اسیتانی بلکہ ہنیسے دی ہݰ تن بیرائے۔ روس کیہ دی قسمہ تجربہ کی کویاں ہتے بچے سائنسدانار گنی ٹکنیکل اسٹافہ پت سف ہیہ شہرا ہل بک بیرانی۔ ہمی میزایلان وجہین روس قزاقستان آزاد بیکو باؤجودا دی ہے شہرو سُم کوری پورا سِری شاغنو سوری پوری اسک بیرائے۔ 1996عیسویار ہے شہر روسو سو لیزا شک بیرائے۔ وا 2005 عیسویا پت بومکی رویان سر غیر خور کوستے ہے شہرا بیک بند بیرائے۔ ہنیسے کوساک دویو ہیرا بوغاک بیرانی مگم خاص خاص ژاغین بیکو بچے ہنیسے دی اجازت گنیک ضروری بیرائے۔ جو سال پروشٹی دی ہیہ سَری شاغنہ ای میزائل تجربہ ہوئے رے قازقستانی انسٹا گرامہ بو شغل لیگے اسیتانی۔ اسپہ ݯھترارا فیس بکہ کیہ کوروم کی بونیاں ہتیت سف ہائیی انسٹاگرامہ بونیان۔ فیس بک ہمیتن کیہ خاص خوش نو۔ سَری شاغن و ہے اسٹیشنار پھوک کم چھور گھنٹہ ریل کی کوسیتائے شُو نامین اسٹیشن گوئے۔ اسپہ راہی بیتی کافی زمانہ ہوئے۔ شو و ہیس بو مشہور اسٹیشن۔ بیری یور توری شیر۔ مگم تروق چائیو اثر ختم ہوئے یا خربوزہ و غون اوا دی نسین ہمی رویان لوڑی رنگ گنیتامہ کیاغ بوئے۔ سخت شرین اورارو ہائے۔ تن ناسین ہمیتن لوؤ نو دیتی اسوم نا۔ خائے تھے اوا ریلو کیہ ڈبائی کی اسوم ہیہ چھور ژونان موژا۔ مہ سار علاوہ تروئے ژون خور ہیہ کمپارٹمنٹی اسونی۔ ای جوڑا ڈاق اوچے کومورو۔ ڈاقو عمر21سال کومورو20 ۔ ہیتن سار علاوہ ای 30 سالہ جوان اسور۔ عُمران لوؤ دیکو حیران بیکو ضرورت نی کی ۔ قازقسانو روئے بسم اللہ و سم عمرو بشار کونی اچی تن عمرؤ لوو دی دونی۔ ہݰ کھیوتے ہیس پتہ نیکی۔ بہرحال ہمیت سف اورے اسونی، جم ہونی پوری۔ انگہہ ہل بیتی اُونُو رے پتی تان کونیان۔غیرزیک لڈو کاردوغون۔ مہ دی تونجیتانی تان سم کوری۔ روشتی خومیکار اچی اوا وا پتی نو کوم۔ ژاغہ لاڑیم ریکو جام رے اسونی۔ بلکہ روشتی خومیکو اورے اسونی۔ پتی گرم بویان مگر ہے کومورو اوچے ڈق کھاڑ انگریزیہ پیدل۔ ٹک انگریزی میتانتے نو گویان۔ کیہ لو دیاوا پتیان اف لکھی موبائل یی نے ہتے ٹرانسلیٹرا بی ایغو سم لو دیلیک۔ وا یونیورسٹیہ قون ژیباک بیرانیا ہیت انگریزی کوریکو نو بونیان ریمی البت۔ ہائی اسکولین روسی وا قزاق زبانہ تعلیم دونیان۔ جوش ای جماعتہ پت اسکولہ رینی ہتے سم یونورسٹی بوئے۔ کا کی سبق نو ریتانی جوسالو بچین ہے وختہ ظلمی فوجہ بھرتی بونی۔ سبق کی ریتاؤ بھرتی نو بوس حتیٰ کی بیشیر چھور سالہ پت سبق تن کی ریتاؤ جو سالہ بھرتیاری بچ۔ ہیغار پروشٹی کی سبقو پیݯھیتاؤ دوسی فوجہ بھرتی کونی تان۔ تنخواہ دیتی بھرتی کیہ مفتہ نو۔ جوش ای جماعتار اچی کیچہ کی میڈیکل یا انجینرینگ یونیورسٹی شینی ہݰ تن پیڈاگوجیکل یونیورسٹی دی شینی۔ یعنی استاذ بیکو بچے دی تہ مخصوص سبق ریلیک۔ مگر ہے تمام سبق ہمیتن تن زبانہ ہتیغین انگریزی نو بونیان۔ ہائیی انگریزی اسکول بو کم۔ ہیہ ای کما سال ہوئے شروع بیتی ہݰ جوݰور۔ تقریباً تمام روئے روسی اوچے قزاق کھاڑ زبانہ لو دیکو بونی۔ کمپوٹرار گنی کتابہ پت سف ہمیتن تن زبانہ۔ ڈاکٹرو نسہ بیکو تہ لہازیو پتہ کوری دوائی تتے نیویشیران۔ مگر واٹر ریکو دی نو بویان انگریزیہ۔ خسو خس یونیورسٹیہ فُل پروفیسر دی پوشی اسوم اوا ہسے انگریزا کیچہ اسوس ریکو دی نو بویان۔ انگریزی وا دی خیر ہے ڈق تن چائیو عملو گنی ایمیتی ویخالی کویاں۔ بشیر منٹ نو بیکہ پت چائے کومن رے ایہہ روپھی بیران۔ ای مُدا پیالین پیݯ اوغ درے انگیتی چائیو خلتان ہتے موژو پیݯھی مِلک پیکو ہتے ٹیکو درے ݯھیر چائے رے اسپتے دویان۔ نہ تو تروپ نہ شوکھور۔ ریلو ای گوݯہ کورا بی چھور پیالو پیݯ اوغ درے انگویان پیݯ کھیو لا ہاؤل لوش۔ مِلک پیکو ہتے ٹیکو درئیکو سم ہتے پھوک پیݯی دی بی ایمیتی اوݰاک بویان۔ ایی گنی ٹُھوریکو سم جم بی شیر رے مہ شکریو دی کورور رے تہ سار لوٹ غیچ دی کویان۔ مہ سم کافی اوچے قہوہ ساؤزیکو اسباب شینی۔ مگر ہو ہے ݯھیر چائیو کوری تن عالمار اختی بیتی اسوم۔ میتان پورا تعارف کوریسام مگر ہے ایوالیو نامو روخچی اسوم۔ ہنیسے استور بیزیمی پوری اسونی۔ مذاقو پھارو لکھی لُو کی پھریتم بوجم ہم سفر ہمیت تروئے سف۔ عام طورا ہمی روئے بو تان دنیا مست۔ نسہ کا اسور کیانی بویان ہیتن سورݯھومیک نو ہیس۔ کیہ اشناریو کوسُم نو باژینی۔ ضرورتو لوار غیر بیݰ لو نو دونی۔ څیق سو لوٹو ہرکا ہمیشہ ایئر پوڈان کارو دیتی اسونی۔ ملگیری تہ گنی ای پیالا کی چائے پیتائے دی تن چائیو پیسہ تہ تن دئیلیک۔تان ہتو ہسے تان دوئے۔ ای ژاغہ نیشیکو باوجودا دی موٹیونگ بیتی ہر کا تان ݰاپیکو الگ کوری ژیبونی۔ مگر مہ ہمی ہم سفر پھوک ݯھتراریان طبیعتہ غونی۔ اسپہ ہیہ ڈبائی کا غیژی کیاغ نہ ژیبونیان نہ پینیان۔ بِسکٹ ایی نے دی ست کوریک شیر وا ست کا کی ارینی قبول کوریک دی ضروری۔ تتے ست کوریکو کی نو گنیتاؤ شوم جاݰونیان۔ اسکوردی لو ہݰ کی سفرو جم ملگیری بیتی اسونی بس میتان ای شومی شیر۔ ہسے ہیہ کی اورئیکو سہی نو باک بیرانی۔ ہیس وا کیہ اورئیک انسان کی نو قوریتائے۔ نسکارین دم نو نے اورے اسونی۔ ہمیتن پوشی مہ دی غیچ یوہانی پسہ ہیہ ژاغا ای خور داما ناؤر اوا ای دربت میتان قورئیک ژانک کوم۔ ریل شُوا کی تورتائے نو روخڅی مہ روپھاؤر شو ویلیو لاڑیسی ای بیتی۔ پیش کش: #مئیرݯھترار