کھوار سفر نامہ پڑاو 6

کھوار سفر نامہ: قزاقستانار گنی اُزبکستانہ پت چھویو پڑاو: شُوار گنی طَرازا پت نیویشاک: نور شمس الدین فروسکی ویݰکی دُودیریہ پت ݯھیتور، کورا شینجور اسپرو، کورا جنگلی گمبوری۔ کھوڑی ویݰکی دی ہݰ تن مگر آخرا زوم شینی۔ پُھورین ہیم موڑی اوݯ۔ ہموݰ ژاغو درے ریل شُوو اسٹیشیناری طرازو ویݰکی بیران۔ کھڑکین بیری لوڑیکو ہر ویݰکی تاؤق اوݯ میدان۔ ایگان څیق څیق دیہہ دی گونیان۔ کورا ݯھیترو اوغ ݯوکی شیر کورا ژویو اوغ بیران۔ ہر جوش منٹہ شینجوران جنگل گویان۔ ٹونگ ٹانگ شینجور اسپرو۔ وؤریو شومکھیکو واسہ نکی مگر اف لوڑی سران مست کوئے ہے ژاغا کی بین بوئے یا ریلو شیشہ کی کھولاؤ بونی رے۔ کورا ݯھیتور کی شینی ہیت یا گومو یا سبزی کیاغ کیݰی شینی۔ دُور کورا نکی تن۔ بو کوسیکو ہانیہ ای څیق دیہہ گویان۔ اوا شوو اسٹیشنوتے ݰوئیے پسہ بھروسا اورے اسیتم۔ اورے وا ہوشہ نو گے۔ دیخ دیخ کی نو شوو اسٹیشنو ژانک نو بیتی سورین نیسیم۔ انگہہ ہوتم کی ریل اسٹیشنہ توریکوتے ٹُھک پونچ منٹ شیر۔ تن دُورو رویان نسہ کی ہݰ ریتم رینی کی تو تھے اوریرو بوس کیہ مہ نسی تروئے ژون خور اورے اسونی راے اسیتاؤ ہتے ناچاراگان کوکیچہ ہونی۔ دُورو رویان ہݰ دونیک کیہ غلط دی نو۔ فروسک لو ہیہ کی اوا انگہہ ہوتم کی پروشٹی سیٹہ سفرو ملگیران سخت بد طبیعت نیشی اسونی۔ ٹیکتو پوریرو ہتے جوالی دی یو خومی گوݯو ہتو نسہ نیشی مہ لوڑاؤ استانی۔ اوا غیچھان مژی ہیلو، گڈ مارننگ ریکو یرسالان ریتائے کی اسپہ تانتے کیڑے اچی تن غیچھان کوئے ماژیسان۔ اوا قوریتامہ ریکو ژالینہ روسی وارا کیاغ ریتائے۔ سف ہوسیتانی یرسالانوتے ہیہ کیاغ ریتائے ریکو جوابہ ریتائے کی۔ ہیس ران کی اسپہ نوغ ریل لش ہواز کوئے رے امبوخ پسہ دیتی ہائیی نیشی اسیتم۔ تہ پرانو ریلو سار دی دوڑ ہواز بیرائے۔ ہموݰ لُو مہ دُورا دی مہ سم بونی خاص کوری مہ ژور ہیہ حوالا کافی قائیی وا خفا بیکو بݰ لو دوئے۔ ہتیعین متے عادت۔ کیا خاص اچی غیستی نو ہوتم۔ شکر! اوہو اوا ہمی رویان نامان پیستے لو نو دیتی اسیتم نا! میراتو نامو روخچی اسیتم۔ خائے تھے اسپہ ہیہ ڈبہ (کمپارٹمنٹ) چھور ژونان موژا۔ ژالینہ تیمور او چے آسیب مِرات ساوتھ قزقستان یونیورسٹیہ سبق راک بیرانی۔ ہتے انگریزیہ پیدل رے لو دیتی اسیتم ہتیت ہمی جوالی۔ ہمیت ای ہفتو بچے کوساؤ آستانو تے گیرو بیرانی۔ قزاقستانی ڈاق اوچے کومورو ملگیری بیک یا ای بیتی سفر کوریک عام معمولو لو۔ ہیہ ژاغین ہو ثقافتو تباہیو یا ہونان سم کہ تعلق ہمونیہ پت ساؤز نو بی شیر۔ اچہ کیہ خبر کیاغ بوئے خدایوتے پتہ۔ پریشان نو بور۔ اچی ہیت اسپہ ایغو "کزن" رے بہانہ دی نو کونیان۔ ژالین اوچے مراتو انگریزی دانیو لوؤ پیستے دیتی اسیتم۔ ہتعین اسپہ تن موژی گوگل اوچے یرسالانو مددو سورا مشقول بوسیان۔ یَرسالانو پورا نام یرسالان بقتیار۔ نیوشیکا بختیار بویاں رینیان بقتیار۔ ہیہ کمرائی اسیرو چھورو نفری ہیس۔ انگلستانہ سبق رے اسک بیرائے وا فلحال قزقستانو شِمکنتہ ای کمپنیو سم کوروم کوراک بیرائے۔ دفتری کورمہ آستانہ گیرو بیرائے ہینسے اچی بیران۔ ہمیت تروئے سف قازقستانو جنوب مغرب ویݰکی مختلف صوبار۔ ہمیتن سم مشقولگی متے قازقستانو ہے حصو ہوݰ کوریکا بو مدد اریر۔ خاص کوری شِمکنتہ بی کیہ کیہ ژاغین کی مہ کوسیکو منصوبہ اوشوئے ہتے حوالہ نہ صرف متے راہنمائی ارینی بلکہ ژالین اوچے تیمور شمکنتہ تہ گنی کوسیک اسپہ ذمہ داری دی ریتانی۔ بقتیار مہ غوش نو بوئے مگر پسہ کوسی چشٹو تے کیہ ژاغہ کی بغاتمی متے لو دیور اوا دی تاروم ݰاپیک ای بیتی ژیبوسی ریتائے۔ قزاقستانہ ای بیتی ژیبیکار مراد ݯھتراری وار نو جما۔ ہیس ݰاپیک اوا پستے دوم نو ریتائے ای بیتی ژیبوسی ریتائے مطلب اسپہ ہر کا تن ݰاپیکو پیسان تن دوسی۔ خائے تھے مہ غیچ کھولاؤ بیک او چے ہمیتن مہ ہے قورئیکو سورا طنزان موژی مہ غیچ بیری بغائے کی شینجوران جنگل وا ٹونگ ٹانگ شینجور اسپرو۔ ہیس ختم بیکو سم اسٹیشن ہائے ۔ تیزے اف خومی ݯت ہی ہائیی لوڑیکو ریل اچی راہی بیکو وخت ہوئے۔ ہانیوتے اف خومیک کھیوتے بیرائے ریمی۔ اف خومیکو اصل وجہہ اسٹیشن لوڑیک دی نو اوشوئے۔ بلکہ مہ خویانو چوڑاؤ اوشوئے۔ اوا بوتہ دی باوؤری نو بیتی ریلی نیشی اسیتم۔ چوچھو چھور بجہ سِری شاغنو اسٹینشنہ ہتے ݰا چائے اوچے میراتو ہے ݱاق ݯھیر چایان سورا اسیتم۔ ہے اسٹیشنو نام شُو رے پستے لو دیتی اسیتم ۔ 1931 عیسویہ ہے اسٹیشن ساؤز بیرو بیرائے مگر لوڑیکو پتہ بویان کی نوغدار مرمت بیتی ای کما سال بیتی شیر۔ ویزین بوتہ پاؤ کم اوشٹ بجا قزاقستانو دارالخلافہ آستانا ریلی نیشی چوچھو پاؤ کم اوشٹ بیکو ہیرا ہاتم۔ شُو قازقستانو جنوبو ویݰکی ای څیق قصبہ۔ مگر لوٹ وا معروف ریلوے اسٹیشن۔ کرغزستانو بونڈریو ویݰکی بوغاوا ریل ہیا گیتی دامہ نے قازقستانو تروئے لوٹ شہرانتے بینیان، بلکہ ہموݰ کی ریتم دی غلط نو کی قازقستانو چھور ویݰکی بوغاک ریل ہیہ اسٹیشنہ گونیان۔ مگر ہے باوجودا دی کیہ بو ہلہ گولہ معاملہ نو پوشیتم۔ څیق رو اسٹیشن، اسپہ ہیہ ریلار دی کا اف نو خومیتانی۔ مہ ہیہ ݰویا بو ار بو نیوف جوش خواتین ای جو کولانو۔ ہیت دی سگریٹ ݱینگئیکو بچے۔ قق بیرو بیرانی ہوستہ کوراؤ یو خومیتانی۔ سگریٹہ قزاق نوغ نسل خاص کوری کوموران بو عملی۔ اکثریتو نوغ دورو ہمی مشینی وے کھوشونو سگریٹان ݱینگئینی۔ ہیہ مُلکہ گاڑیو اندرینی، یا بلڈنگان اندرینی سگریٹ ݱینگئیک بند۔ لوٹ شاپینگ مال یا پلازو ہر فلورا سگریٹ ݱینگئیکو تے الگ ختان ساؤزے اسونی۔ مگر اکثریتی ژاغہ بلڈنگار نیݰی ای کونا سگریٹ ݱینگئیکان بچے مختص۔بینج، ایش ٹرے وا سوری چھت بوئے۔ ہیہ ملکہ بیشیر ای سالار موڑی عمرو نفریو تے سگریٹ گنیک بند۔ دکانداروتے کم عمر کی سریتائے شناختی کارڈو مݰکی لوڑی تسلی کوری تھے بیزیمیر انگارا نو۔ ہݰتانچقہ شراب پیک، گنیک ، بیزیمیک سف قانونی ہیا مگر ہے سورا دی عمراوچے ژاغو پابندی شیر۔ کورا پارکہ یا سینو گوݯا یا شرانہ نیشی شراب پیکو اجازت نیکی۔ وا خاص کوری شراب پی موٹر کاسئیک سخت جرم۔ ہݰتانچقہ شراب پی چھویو جوش ای بجار اچی تن دوری دی قوژد قریاٹاؤ کوریکو اجازت نکی گرامبیشو تہ خلافہ رپورٹ کوریکو بوئے۔ شُوو ہے اسٹیشنار ریل مشرقو ویݰکی بی الماتیہ، مغربو ویݰکی بی شِمکنتہ، شمالی ویݰکی بی آستانہ وا جنوبو ویݰکی بی کرغزستانو بونڈریا وا کیاوت کیاوت دارلخلافہ بِشکیکو تے دی بوغک بیرانی۔ قازقستانہ تروئے شہر ہݰ شینی کی ہتیت مختلف صوبا بیتی دی ہتے صوبو نو بلکہ وفاقو حصہ جوݰونو بویان۔ براہ راست وفاقو کنٹرولہ بونیان مگر رینی ہیتان تے خود مختار شہر۔ اسپہ گلگتو غونہ رو۔ اوّلو دارالخلافہ آستانہ، جوؤ الماتی وا ترویو شِمکنت۔ ہمی تروئے سف قازقستان بو مشہور وا آبادیو حوالہ اولو تروئے لوٹ شہر۔ ہمی تروئے شہران موژی ریلہ سفرکوراوا شُو و ہیہ اسٹیشنہ گیتی بین بویان۔ کوریکو کی مشرقی ویݰکی کیہ راہ کی سایئبیریار گویان ہسے وا موژو کیہ راہ کی آستاناری گویان ہمیت کھاڑ ہیا گونیان وا ہیا مغربو ویݰکی بیکو شِمکنت گویان۔ ہتیغین ہیا اسٹیشینو تے قازقستانو ریلان ہردی راک بیرانی۔ اف خومی ریلان ہردیو لوڑی تن معدو حالتو روخڅیرو بیراتم ہیغین باووری بیکو دی نو بیتی اچی ایی نیسی اسیتم۔ ہنیسے ریل شواوچے شمکنت موژی شاریغان موژو بیران۔ ہیہ مشہور شو ویلیو حصہ۔ ہنیسے قدیمو ہتے سلک راہو خومیتم ریکو بوم۔ ہیہ علاقو شو دریا کندوری ہزار سالاری آباد ستی گویان۔ کراگنڈو ہتے نیم شغور میداناری یو نیسی بیٹپاق ڈالا و شغورو نسو یونیسی ہایو نیسیکو یوموناری بوسونی نیسیرو غون۔ ہر ویݰکی زندگی روان دوان۔ ٹھینگ میدان سف اوچ، بویئکرا آزاد، انسان آباد۔ ہیہ ریل تن شیڈولو مطابقہ 18 گھنٹہ شِمکنتہ توریلیک۔ شُوا تن مقررہ وختہ توری راہی کوری شیر۔ ہموغار شِمکنتہ بیکو تے ݯھوئے گھنٹہ خور لیگور۔ شِمکنتار نست شو ویلیو طراز نامین ای تاریخی شہر گویان۔ اوا ہیرا اف خومی بیچے طرازو لوڑی گور چھویو شِمکنتو تے بیم۔ شمکنتو تے بیمن رے رے اخیرا طراز اف خومیک کھیوتے بیرائے رئیک دی پسہ لو سہی۔ طراز واقعی مہ پلانہ نو اوشوئے ۔ مہ ٹکٹ دی آستاناری شِمکنتو، مگر اچانک پلان بدل ہوئے۔ چال ہݰ ہوئے کی اوا شُوو ہے اسٹیشنہ کیاغ لوسیکو نو بیتی ریل راہی بیکو خویانو بارے ریلو اندرینی ریسٹورنٹو تے باتم۔ ہتیرا بی ای پلیٹ منتوق گنی ژیباؤ ہی ہائیی لوڑیتم کی پھارو ای ہم عمر خاتون ڈیکو ڈیکو سوری درے تھائقہ دیتی نیشی کتاب لاڑیران۔ کتابو نام “A Carpet Ride to Khiva” اوشوئے۔ ہے کتابو پوشی اوا ہوݰ اریتم ہیہ خاتونوتے انگریزی دی گوئے وا تاریخو بارا دی ہوݰ کوئے رے ۔ موخو بوسک کوری ہو نسہ بغاتم۔ بشار احوال بیکو پتہ ہوئے کی ہو نام اینا توکاشوف بیرائے۔ ازبکستانار کراگنڈو ای یونورسٹیہ کیہ تحقیقی کورمہ گیرو بیرائے وا اچی مہ غون شِمکنتہ ای بس بیتی چھوچھین تاشقندوتے بوغاک بیرائے۔ ہو ہوستہ شیرو کتابہ ݯوکی مشقولگی اژیتائے۔ ہتے قدیمی سِلک روٹ تنار موضوع ساؤز ہوئے۔ متے ازبکستانی کیہ پلان ریکو اوا تاشقندا ݯوکی بخارا پت بی لوڑی اچی گوم ریتم۔ ہے لوؤ کار کوری وا مہ سِلک روڈو سُم جوستہ کوسی قدیم تاریخو لوڑیکو شوقو پوشی ریتائے کی اوا خور مشورہ دوم۔ تو شِمکنتہ درونگار ہل بیکو سر پروشٹی طراز رے کیہ شہر کی گویان ہیرا اف خومے۔ سلک روڈو شہران لوڑیک اسان طرازو نسین نیسی بیک ظلم۔ پیشینہ ہیرا تاروس۔ شامہ پت ہو لوڑی گور چھییو خور ریلہ اچی شِمکنتوتے گے۔ شمکنتہ پوری جم خسمتی نے ایہہ کی روپھیتاو چھوچی پورا انوس تہ سم شِمکنتو لوڑیکو بچے وا دی بوئے۔ نمازدیگارا شمکنتہ ٹیکسی نیشی بارڈرا بیکو بوس۔ تیرا پیدل پھار نیسی تاشقندا۔ شمکنتاری تاشقندا تروئے گھنٹہ لیگور بو ملال کی ہوئے۔ توکاشوفو دلیل متے پون دیتی اوا یکدمہ طرازا اف خومیکو فیصلو اریتم۔ ہݰ دونی ہوتے طرازا توریکوتے کندوری وخت شیر ریکو کھڑکیہ نیشی لوڑی ریتائے کی زوم تہ غیچی گونیانہ؟ اوا ریم کی اے زوم نو پوشیرو ٹھینگ راکی ٹھینگ زوم کوئے ریسان۔ ریکو ران کی ہیت الاتو زوم یعنی تیان شیانو زومان حصہ۔ ہمی الاتو زوم طرازو ݰویہ شروع یا ختم بونیان ریکو بوسی۔ ہو مطلب ہݰ کی اسپہ طرازا توریکو بیتی اسوسی۔ ہیت ہیا بو پست سہی مگر پھار بی الماتیا وا کرغرزستانا بلکہ چینہ پت بولونجی شینی۔ تیان شیانو زوم بو ݰئیلی پورا کرغزستان وا قازقستانو ہے مشہور شہر الماتی دی ہے زومان اوانہ شیر۔ تیان شیان اوچے الاتو زوم ہیہ علاقا واقعی بو مشہور۔ اوا اچی گیاوا ازبکستاناری کرغزستانی نیسی ہتیغار الماتیہ گومن ہتے وختہ پسہ گنی تیان شیانو ہے زومان ٹیکٹو نیسیم۔ ہنیسے طرازو تے تن بی سی۔ ریلو شیڈول لوڑیکو جوش ای بجا ہیہ ریل طرازا تاروران ہنیسے بشیر منٹ شیر۔ شامو پاؤ کم سوت بجا ای خور ریل طرازار شِمکنتو تے بیران۔ موبائلہ قزاقستانو ریلان افیشل اپلیکیشنہ بی ای ٹکٹو تان نامہ کوری ایناتوکاشوفو تے شکریہ کوری آخری منتوقو اپاکی پݯیھی تان ڈابوتے اف بغاتم۔ ڈابہ کھیو لا جواریان اڈہ راکی اونو (پتی) چالو شیر۔ میراتو ہتے ݱاق ݯھیر چائے سفان پروشٹہ لکھی شینی۔ اوا یو توریکو سم ریلو اسپیڈ دی کم ہوئے۔ طرازا اف خامیمان رے ہمیتن تے لو دیتی خدایار کوریتم۔ ژالینہ او چے میرات چھوچی شمکنتہ تہ کاسئیسی رے اسیتانی ہتغین جوش بجا تہ دواختہ ٹھاخیسی رے مہ اپارٹمنٹو پتو گنیتانی۔ ریل دی روپھیتائے اوا بیکھان بارے اف خامیم۔ پسہ دی دامہ ناؤر۔ طرازو لوڑی گور چھویو شمکنتو تے بوغاوا طرازو قصان پستے کوم۔ پیش کش: #مئیرݯھترار